Read SEBR SÕNGO, 1998 Maan‑kʋʋre 25 Bible Online

Maan‑kʋʋre 25 - SEBR SÕNGO, 1998 bible

Maan‑kʋʋre 25

¹Sẽn-Ka-Saab yeela a Moyiis Sinayi tãngã zug yaa:

²«Gom ne Israyɛll nebã n wilg-b tɩ b sã n wa n tɩ kẽ tẽng ning mam sẽn kõ bãmbã pʋgẽ, bɩ b bas tẽn-gãongã t'a vʋʋse, tɩ rẽndã yɩ vʋʋsgo, Sẽn-Ka-Saab waoogr yĩnga.

³Yãmb tõe n bʋda y pʋtã yʋʋm a yoobã pʋga, la y yos y reezẽ tɩɩse, la y wob b biisã yʋʋm a yoobã pʋse.

⁴La yʋʋm a yopoeẽ soabã na n yɩɩ vʋʋsg yʋʋmde, tɩ y bas tẽn-gãongã t'a vʋʋse. Rẽndã yaa vʋʋsgo, Sẽn-Ka-Saab waoogr yĩnga. Yʋʋm-kãnga, yãmb ka tog n bʋd y pʋtã, la y ka tog n yos y reezẽ tɩɩsã ye.

⁵Yãmb ka tog n tigs ka-yogd sẽn yi wã biisi, la y ka tog n wob y reezẽ tɩɩsã y sẽn ka yosã biis me ye. Bala, yaa vʋʋsg yʋʋmde. Yʋʋm-kãng yaa tẽn-gãongã vʋʋsg yʋʋmde.

⁶Bũmb ning sẽn na n yi weoogã pʋg vʋʋsg yʋʋmdã pʋgẽ wã n na n dɩlg yãmb ne y yem-daadã, la y yem-pogsã, ne y tʋmtʋmdbã y sẽn dɩk n yaood-b ligdã, la ne nin-loogds nins sẽn yaa sãamb n be ne yãmbã,

⁷n paas ne yãmb rũmsã ne we-rũmsã sẽn be yãmb tẽngẽ wã. Bõn-kãng biisã fãa n na n yɩɩ b rɩɩbo.»

⁸«Bɩ y sõd vʋʋsg yʋʋm a yopoe-poe naoor a yopoe, sẽn dat n togs tɩ yʋʋm pis-naas la a wɛ.

⁹Kiuug a yopoe soabã rasem piigã daar sẽn yaa yel-wẽnã sugr kosg daarã, bɩ y kɩt tɩ b peeb baorg ne pãnga, bɩ y peeb baorgã t'a rãamdã ta yãmb tẽngã tɛk fãa pʋga.

¹⁰La bɩ y welg yʋʋmd pis-nu yʋʋmdã toore, n moon lohorem tõog yãmb tẽngã pʋga, nebã fãa yĩnga. Yʋʋm-kãng na n yɩɩ kɩdeng yʋʋmd yãmb yĩnga. La yãmb ned kam fãa na n leb n sooga a pʋto, la a lebg n leb a meng nebẽ.

¹¹Yʋʋm pis-nu yʋʋmdã na n yɩɩ kɩdeng yʋʋmd yãmb yĩnga. Yãmb ka tog n bʋde, la y ka tog n tigs bõn-koaadl ning sẽn yi a toor pʋtã pʋsã biisi, la y ka tog n wob reezẽ tɩɩsã y sẽn ka yosã biis ye.

¹²Bala, yʋʋm-kãng yaa kɩdeng yʋʋmde. Bɩ y welg yʋʋm-kãng toore. Bɩ y rɩ pʋtã biisi.

¹³Kɩdeng yʋʋmdã pʋga, yãmb ned kam fãa tog n leb n deega a sẽn dag n so.

¹⁴Yãmb sã n na n koos bũmb ne y saam-biiga, wall y sã n dat n da bũmb a nengẽ, bɩ y ra wẽg-a ye.

¹⁵Yãmb sã n dat n da y saam-biig bũmbu, bɩ y sõd n bãng kɩdeng yʋʋmdã sẽn loog yʋʋm sõore. La a tog n sõda yʋʋm sõor sẽn ket tɩ kɩdengã yʋʋmd ta wã n yaool n koos ne foom.

¹⁶Yʋʋmã sõor sã n keta wʋsgo, bɩ f yao wʋsgo. La yʋʋmã sõor sã n ket bilfu, bɩ f yao bilfu. Bala, yaa bõn-bɩʋʋngã sasa sõor la a geend n yaool n koos ne foom.

¹⁷Bɩ yãmb ned ba a yembr da wẽg a ba-biig ye, bɩ y zoe yãmb Wẽnnaamã. Bala, mam yaa Sẽn-Ka-Saab sẽn yaa yãmb Wẽnnaam.

¹⁸Bɩ y sak m tõodã, ne m noyã, la y maan wa b sẽn yeelã. Dẽ, yãmb na n zĩnda y tẽngã pʋg ne bãane.

¹⁹Yãmb tẽngã bõn-koaadl na n woma biisi, la yãmb na n dɩɩ n tɩgame, la y na n zĩnda beenẽ ne bãane.

²⁰Yãmb sã n sokdẽ: ‹Yʋʋm a yopoe wã pʋga, tõnd na n dɩɩ bõe, tɩ tõnd yaool n ka bʋtẽ, la d ka tigsdẽ?

²¹Yʋʋm a yoobã pʋga, mam na n ninga yãmb barka, n kɩt tɩ bõn-koaadlã wom yʋʋm a tãab koodo.

²²La yʋʋm a nii yʋʋmdã pʋga, yãmb na n bʋdame, la y na n kell n dɩ y ka-kʋdgã n tɩ tãag yʋʋm a wɛ wã pʋga. Yãmb na n dɩɩ ka-kʋdgã hal tɩ ta bõn-bɩʋʋngo.

²³Yãmb ka tog n koos pʋʋg tɩ b soog-a wakat fãa yĩng ye. Bala, tẽn-gãongã yaa maam n so, tɩ bala, yãmb bee mam nengẽ wa sãamba, la wa kaoos-weto.

²⁴Dẽ wã, bɩ y zĩnig tõog tẽng ning mam sẽn kõ yãmbã fãa pʋgẽ, n wilgdẽ tɩ ned sã n koos a pʋʋgo, a tõe n leb n yao n deeg-a lame.

²⁵Naong sã n yõk yãmb ba-biiga, t'a yãk a pʋʋg n koose, yẽnda buudã ned sẽn yaa a meng roagd tõe n wa yaoome n deeg a ba-biigã pʋʋgã a sẽn koosã.

²⁶La sã n mik t'a ka tar ned a buudã sʋk sẽn tõe n yao n deege, tɩ yaa yẽnda mengã n na n yao n deege,

²⁷bɩ a sõd yʋʋm nins sẽn loog pʋʋgã koosg zugẽ wã, la a yao sẽn da-a pʋʋgã ligdã n dogl yõodo, la a leb n soog a pʋʋgã.

²⁸La sã n mikame tɩ yẽnda ka tar bũmb n na n yao n deege, pʋʋgã na n kell n paa raadã nugẽ n tãag kɩdeng yʋʋmdã. La kɩdeng yʋʋmdã pʋga, pʋʋgã na n leb n lebga a soabã rẽnda.

²⁹Ned sã n dɩk a zag-gãadg sẽn be tẽng sẽn gũbg ne lals pʋg n koose, yẽnda tog n basame tɩ ta yʋʋmd t'a yaool n yao n deeg a zakã. Yaa yʋʋmd a yembrã poor la yẽnda tõe n yao n deeg a zakã.

³⁰La b sã n ka tõog n yao n deeg zakã sẽn be tẽng sẽn tar lalsã pʋgã, n bas tɩ yʋʋmdã pidsi, zakã na n lebga ned ning sẽn da-a wã ne a yagensã rẽnd wakat fãa. La baa kɩdeng yʋʋmdã sã n ta, a ka na n leb n lebs-a ye.

³¹La sã n yaa ne zags nins sẽn be tẽn-bãoonegã sẽn ka tar-b lalsã pʋsẽ wã, b tog n maana bãmb wa b sẽn maand pʋtã to-to wã. B tõe n leb n yaoome n deeg-a, la kɩdeng yʋʋmdã sã n ta, bɩ sẽn da-a zakã lebs zakã a soaba.

³²La sã n yaa ne Leevi buudã tẽmsã, ne zags nins sẽn yaa bãmb rẽndã, Leevi buudã tara noor wakat fãa tɩ leb n yao n deeg-ba.

³³Baa sã n yaa Leevi buudã ned n da zakã, kɩdengã yʋʋmd sã n ta, bɩ a yi n bas zakã, wall tẽngã yẽnda sẽn dag n so wã, tɩ bala, Leevi buudã zagsã ne tẽmsã sẽn be Israyɛll nebã sʋkã, yaa b soolem.

³⁴La b ka tog n dɩk pʋt nins sẽn pẽ bãmb tẽmsã n koos ye. Bala, rẽndã na n yɩɩ bãmb soolem wakat fãa yĩnga.»

³⁵«Fo ba-biig sẽn be ne foom, sã n wa lebg naong soaba, n ka tar bũmb n na n yao foom f samde, bɩ f sõng-a, baa sã n yaa sãana wall nin-loaagdga, bɩ f sõng-a t'a tõog n kell n vɩɩmde.

³⁶Bɩ f ra sõng-a n bao yõodo, wall bũmb roagleng ye. Zoe fo Wẽnnaamã, tɩ f ba-biigã tõe n vɩɩmd ne-fo.

³⁷Bɩ f ra peng-a ligd n baood yõod ye, la f ra kõ-a rɩɩb n baood bũmb a to ye.

³⁸Mam yaa Sẽn-Ka-Saab sẽn yaa yãmb Wẽnnaam. Maam n yiis yãmb Ezɩpt tenga, n wa kõ yãmb Kana tẽngã, sẽn na n yɩlẽ n kell n yɩ yãmb Wẽnnaam.

³⁹Naong sã n yõk f ba-biig sẽn be ne foomã, t'a rɩk a mengã n koos ne foom, bɩ f ra kẽes-a yembd tʋʋmdẽ ye.

⁴⁰Yẽnda tog n bee ne foom wa tʋmtʋmd sẽn dɩkd yaoodo, la wa nin-loaagdga. Yẽnda tog n tʋm n kõo foom hal tɩ ta kɩdeng yʋʋmdã.

⁴¹Wakat-kãnga, fo tog n basa yẽnda ne a kambã tɩ b yi n lebg n leb b nebẽ, la b mengã yaab-rãmb soolem pʋgẽ.

⁴²Bala, Israyɛll nebã yaa mam tʋmtʋmdb mam sẽn yiis Ezɩpt tẽngã. B ka tog n koos bãmb wa b sẽn koosd yembs ye.

⁴³Fo ka tog n soog yẽnda ne pãng ye. Bɩ f zoe fo Wẽnnaamã.

⁴⁴Yaa soolem nins sẽn gũbg yãmbã pʋs la yãmb tog n tɩ yãk y yem-daoogo, wall y yem-poaka, tɩ b yɩ yãmb rẽnda. Yaa soolem-kãens pʋs la yãmb tog n kẽng n tɩ ra y yem-daoog bɩ y yem-poaka.

⁴⁵Yãmb tõeeme me n da sãambã sẽn be yãmb nengẽ wã kamba, wall buud nins sẽn be yãmb tẽngẽ wã kambã sẽn dog-b rãmbã. Bãmb na n yɩɩ yãmb n so.

⁴⁶Yãmb tog n dɩka bãmb tɩ b yɩ yãmb kambã sẽn na n pʋgl yãmbã rogem-pʋɩɩre, n yaa b soolem. Yãmb na n kell n talla bãmb tɩ b yɩ yãmb yembs wakat fãa yĩnga. La sã n yaa sẽn kẽed ne yãmb saam-biisã sẽn yaa Israyɛll nebã wɛɛngẽ, yãmb ned ba a yembr ka tog n soog a ba-biig ne pãng ye.

⁴⁷Sãana, bɩ nin-loaagdg sẽn be yãmb sʋkã sã n yaa rakãagre, tɩ naong yõk yãmb saam-biig sẽn be ne-a, t'a koos a meng ne sãanã, wall ne nin-loaagdgã sẽn be yãmb sʋkã, wall ne sãanã buud neda,

⁴⁸b tõe n kell n yaoome n deeg-a, baa ne a sẽn koos a mengã. Yẽnda ba-biig tõe n yao n deeg-a lame.

⁴⁹A ba wã yao bɩ a ba wã yao biiga, sã n ka rẽ bɩ a buudã ned tõe n yaoome n deeg-a. Wall sã n yaa yẽnda mengã n tar pãn-tõogo, a yao n deeg a menga.

⁵⁰Bɩ yẽnda ne ned ning sẽn da-a yẽnda wã sõd yʋʋmã sõore, sẽn sɩng ne yʋʋmd ning yẽnda sẽn koos a mengã, n tãag kɩdeng yʋʋmdã n bãng a sõore. La bɩ a yao wa sẽn zems yʋʋmã sõor sẽn yaa to-to wã. La b tog n geelga yaoodã tɩ zems wa b sẽn tog n yao tʋmtʋmd to-to wã.

⁵¹La sã n mikame tɩ yaa yʋʋm wʋsg n ket tɩ kɩdeng yʋʋmdã yaool n ta, bɩ a yao wa sẽn zems sẽn da-a yẽnda wã ligd-raadgã.

⁵²La sã n mikame tɩ kɩdeng yʋʋmdã ka leb n zãra, bɩ b geelg yʋʋmã sõor n yao wa sẽn zems yʋʋm-kãens sẽn ketã.

⁵³Yʋʋmd fãa yaood na n zemsa tʋmtʋmd sẽn tʋmd ned nengẽ yaoodo, la y ra sak n bas tɩ b soog y ba-biigã ne pãng tɩ y getẽ ye.

⁵⁴La sã n wa n mik tɩ yõwã fãa pʋga, b ka tõog n yao n deeg y ba-biigã, bɩ a bas tɩ kɩdeng yʋʋmdã sã n ta, bɩ a peeg a kambã tɩ b tũ yẽnda n yi.»

⁵⁵«Bala, Israyɛll nebã yaa mam yembse. Bãmb yaa mam tʋmtʋmdb mam sẽn yiis Ezɩpt tẽngã. Mam yaa Sẽn-Ka-Saab sẽn yaa yãmb Wẽnnaam.»