Read SEBR SÕNGO, 1998 Maan‑kʋʋre 3 Bible Online

Maan‑kʋʋre 3 - SEBR SÕNGO, 1998 bible

Maan‑kʋʋre 3

¹Ned kũun sã n yaa zems-n-taar maoongo, t'a wa ne rũm-bedre, a tog n talla rũm-yãang bɩ raoog n wa, la tog n yɩɩ rũng sẽn ka tar zang la a talld n wa Sẽn-Ka-Saab taoore.

²Bɩ a tik a nug rũng ning b sẽn na n kʋ wã zugu, la a kodg-a sɛk-zĩigã noore. La bɩ a Aarõ kambã sẽn yaa maan-kʋʋdbã rɩk zɩɩmã n mes n gilg tẽn-kugrã.

³Ad yãmb sẽn na n maan zems-n-taar maoongã sẽn yõogd bugmã to-to n kõ Sẽn-Ka-Saabo. Yaa yãadã kaamã, ne kaamã sẽn be pʋ-teedã zutã fãa.

⁴La yiim-biis a yiibã ne kaam ning sẽn be b zutã, la ne kaamã sẽn be gɛyã sʋkã, ne sãoorã kaamã yẽnda sẽn na n yiis ne yiim a yiibã.

⁵Bɩ a Aarõ kambã rɩk bõn-kãng n paas maoongã sẽn be bugmã raad zutã, n yõog bugum tẽn-kugrã zugu. Rẽnda na n yɩɩ kũun b sẽn yõgd bugum t'a yũug yaa noog Sẽn-Ka-Saab yĩnga.

⁶Ned sã n dat n tall rũm-bil n wa kõ, bɩ a yãk rũng sẽn yaa raoogo, wall yãang sẽn ka tar zanga, n wa maan zems-n-taar maoong n kõ Sẽn-Ka-Saabo.

⁷Ned sã n wa ne pe-bil n na n maan maoongo, bɩ a tall-a n kẽng Sẽn-Ka-Saab taoore.

⁸Bɩ a rɩk a nug n tik rũngã zugu, la a kodg-a sɛk roogã noore. La bɩ a Aarõ kom-dibli wã rɩk zɩɩmã n mes n gilg tẽn-kugrã kɩremsã fãa.

⁹Yẽnda sã n na n maan zems-n-taar maoongã, tɩ yɩ kũun sẽn yõogd bugum, ad yẽnda sẽn na n yãk wils nins n yõog bugum Sẽn-Ka-Saab yĩngã: Yaa kaamã ne zʋʋrã tõre, n tall n tɩ tãag zʋ-kɛɛgã, la rũngã yãadã kaam ne a pʋ-teedã kaam zãnga.

¹⁰Yaa yiim a yiibã ne kaamã sẽn be b zutã, ne kaam ning sẽn be gɛyã sʋkã. La kaamã sẽn gãneg sãoorã zugã, ne kaam ning yẽnda sẽn na n yãk yiimã zutã.

¹¹Bɩ maan-kʋʋdã yõog bõn-kãens fãa bugum tẽn-kugrã zugu. Rẽndã yaa rɩɩb b sẽn yõogd bugum Sẽn-Ka-Saab yĩnga.

¹²A soabã kũunã sã n yaa bʋʋga, bɩ a tall-a n wa Sẽn-Ka-Saab taoore.

¹³La bɩ a rɩk a nug n tik rũng ning b sẽn na n kʋ wã zugu, la a kodg-a sɛk roogã noore. La bɩ a Aarõ kambã reeg zɩɩmã n mes n gilg tẽn-kugrã kɩremsã fãa.

¹⁴Ad yẽnda sẽn na n yãk maoongã bũmb ning tɩ yɩ kũun b sẽn yõogd bugum Sẽn-Ka-Saab yĩnga: Yaa kaamã sẽn be yãadã zugã ne pʋ-teedã zutã fãa.

¹⁵La sẽn paas yaa yiim a yiibã ne kaam ning sẽn be b zutã, la kaam ning sẽn be rũngã gɛyã sʋkã, la kaamã sẽn gãneg sãoorã n be sãoorã ne yiimã sʋkã.

¹⁶Dẽ, maan-kʋʋdã na n yõoga bõn-kãens fãa bugum tẽn-kugrã zugu, tɩ yɩ rɩɩb kũun b sẽn yõogd bugum t'a yũug yaa noogo. Kaamã zãng fãa yaa Sẽn-Ka-Saab n so.

¹⁷Woto yaa no-tũudg sẽn ka sɛta, yãmb yagensã fãa yĩnga, la yãmb sẽn na n zĩnd zĩig ning fãa, bɩ y ra rɩ rũng kaam, la y ra rɩ zɩɩm ye.