Read SEBR SÕNGO, 1998 Maan‑kʋʋre 9 Bible Online

Maan‑kʋʋre 9 - SEBR SÕNGO, 1998 bible

Maan‑kʋʋre 9

¹Rasem a nii wã daare, a Moyiis boola a Aarõ ne a kom-dibli wã, la a bool Israyɛll kãsem-dãmbã.

²A Moyiis yeela a Aarõ yaa: «Bao lulla, yel-wẽnã maoong yĩnga, la f bao pe-raoogo, maoong sẽn yõogd bugmã yĩnga. La rũm-bãmb tog n yɩɩ rũms sẽn ka tar zanga, la f tall-b n wa Sẽn-Ka-Saab taoore.

³Fo na n goma ne Israyɛll nebã n yeel-b yaa: Wa-y ne boɛɛg tɩ yɩ maoong yel-wẽnã yĩnga, la y wa ne lulla, ne pe-bil sẽn tar yʋʋmd la pʋɩ-sʋka, n ka tar zang ye. Rũm-kãens na n yɩɩ maoong sẽn yõogd bugum.

⁴La y wa ne loalga, la pe-raoogo, tɩ yɩ zems-n-taar maoongã yĩnga. La b tog n kood-b-la Sẽn-Ka-Saab taoore. La b naag ne zom sẽn nag ne kaam n tall n wa. Bala, Sẽn-Ka-Saab na n vẽnega b meng ne yãmb rũndã.»

⁵Bãmb talla bũmb nins fãa a Moyiis sẽn yeelã n wa sɛk roogã noore. La nebã fãa kolgame n yals yĩngr Sẽn-Ka-Saab taoore.

⁶A Moyiis yeelame: «Ad Sẽn-Ka-Saab sẽn yeel tɩ y maan bũmb ninga. Yãmb sã n maan woto, Sẽn-Ka-Saab ziirã na n pukame.»

⁷Rẽ zugẽ, a Moyiis yeela a Aarõ yaa: «Kolg tẽn-kugrã. Maan f maoongã yel-wẽnã sugr kũun yĩnga, la f maan f maoong sẽn yõogd bugmã, n yɩlg f menga, la f yɩlg nebã. Bɩ f rɩk nebã kũun me n kõ n yɩlg-ba, wa Sẽn-Ka-Saab sẽn yeelã.»

⁸A Aarõ kolga tẽn-kugrã, la a kodga nag-bilã yẽnda mengã yel-wẽnã sugr kũun yĩnga.

⁹La a Aarõ kom-dibli wã koka rũngã zɩɩmã n kɩs a Aarõ, la yẽnda tẽka zɩɩmã ne a nug-bil n ning tẽn-kugrã kogsã zutu, la a rɩk zɩɩmã sẽn kellã n daag tẽn-kugrã sɛɛga.

¹⁰A Aarõ rɩka nem-kaamã, ne yiimã, ne sãoorã kaamã n yõog bugum tẽn-kugrã zugu, yel-wẽnã sugr yĩnga, wa Sẽn-Ka-Saab sẽn dag n yeel a Moyiis t'a maan to-to wã.

¹¹La a rɩka rũngã mengã ne a gãongã n yi sik zĩigã pʋg n tɩ yõog bugum kɛɛnga.

¹²A Aarõ kodga rũngã n maan maoong sẽn yõogd bugum. La yẽnda kom-dibli wã koka zɩɩmã n kɩs yẽnda, la a rɩka zɩɩmã n daag n gilg tẽn-kugrã kɩremsã fãa.

¹³Kom-dibli wã rɩka maoong sẽn yõogd bugmã nemdã n pase, n naag ne a zugã, n dɩk fãa n yõog bugum tẽn-kugrã zugu.

¹⁴La yẽnda pegsa pʋ-teedã ne naoã n dɩk-b n dogl nem-pasdɩ wã zug n naag n yõog bugum tẽn-kugrã zugu.

¹⁵Rẽ poore, a Aarõ maana maoong n kõ Sẽn-Ka-Saabo, nebã yel-wẽnã yĩnga. Yẽnda yõka boɛɛg sẽn na n yɩ maoong nebã yel-wẽnã sugr yĩnga, la a kodg-a lame n kõ Sẽn-Ka-Saab tɩ yɩ maoong nebã beegr yĩnga, wa yẽnda sẽn maan pipi maoongã to-to wã.

¹⁶Yẽnda maana maoong sẽn yõogd bugum wa sẽn zems tõogã.

¹⁷Dẽ, a Aarõ rɩka zomã kũun n na n kõ. La yẽnda yõnga zomã n pid a nug n ning tẽn-kugrã zug n yõog bugum n paas maoong sẽn yõogd bugmã yẽnda sẽn maan yibeoogẽ wã.

¹⁸Yẽnda kodga loalgã ne pe-raoogã, tɩ yɩ zems-n-taar maoong nebã yĩnga. A Aarõ kom-dibli wã rɩka zɩɩmã n kɩs-a t'a raag n gilg tẽn-kugrã kɩremsã.

¹⁹Sẽn paase, bãmb dɩka loalgã kaamã, ne pe-raoogã kaamã ne a zʋʋrã, ne yiimã, ne kaam ning sẽn be sãoorã zugã,

²⁰la bãmb ninga kaamã yãoogã zugu, n yõog bugum tẽn-kugrã zugu.

²¹A Aarõ rɩka yãoogã ne rɩtg gerã n yuum Sẽn-Ka-Saab taoore, tɩ yɩ kũuni, wa a Moyiis sẽn dag n yeel tɩ b maan to-to wã.

²²Dẽ poore, a Aarõ tẽega a nug n tees nebã n ning-b barka. La yẽnda sẽn maan maoong sẽn yõogd bugmã ne zems-n-taar maoongã n sɛ, a sigame.

²³A Moyiis ne a Aarõ tũu taab n kẽ sɛk roogã pʋga. La bãmb sẽn lebg n yi, b ninga nebã barka. La Sẽn-Ka-Saab ziirã puka nebã fãa nifẽ.

²⁴La bugum yii Sẽn-Ka-Saab nengẽ n dɩ maoongã ne kaamã sẽn be tẽn-kugrã zugã. La nebã fãa sẽn yãnd woto, b kaasa ne sũ-noog n wõgemd n fõgen b nens tẽnga.