Read SEBR SÕNGO, 1998 A Zeremi 1 Bible Online

A Zeremi 1 - SEBR SÕNGO, 1998 bible

A Zeremi 1

¹Ad a Zeremi goamã. A Zeremi yaa a Hilkiiza biiga. A Hilkiiza yaa Anatot sẽn be Benzame buudã soolmẽ wã maan-kʋʋdbã ned a yembre.

²Sẽn-Ka-Saab goma ne a Zeremi wakat ning a Amon biig a Zoziyaas sẽn dag n yaa Zʋʋda rĩmã. Wakat-kãng tɩ yaa a Zoziyaas sẽn deeg a naamã tɩ yʋʋm piig la a tãablẽ.

³Sẽn-Ka-Saab leb n goma ne a Zeremi wakat ning a Zoziyaas biig a Yoyakim sẽn yaa Zʋʋda rĩmã sẽn dɩt a naamã, n tɩ tãag a Zoziyaas biig a Sedesiyaas sẽn yaa Zʋʋda rĩm sẽn deeg a naamã tɩ yʋʋm piig la a yembrẽ wã baoosgo, la hal n tãag wakat ning b sẽn tall Zeruzalɛm nebã n tɩ kẽes yembd pʋg kiuug a nu soabã pʋgẽ.

⁴Sẽn-Ka-Saab goma ne maam n yeele:

⁵‹Sẽn deng mam sẽn nan ka yag foom f ma pʋgẽ, mam dag n zoe n mii foom. Sẽn deng f ma sẽn nan ka rog foom, mam dag n zoe n welga foom toore, n kɩt tɩ f yaa m no-rɛɛs buudã fãa yĩnga.›

⁶La mam yeelame yaa: ‹Kayto! Zu-soabã Sẽn-Ka-Saabo, mam ka mi goam ye. Mam yaa yãaga!

⁷La Sẽn-Ka-Saab yeela maam yaa: ‹Da yeel tɩ f yaa yãag ye! Bala, fo na n kẽnga mam sẽn na n tʋm foom b rãmb nengẽ wã nengẽ, n tɩ yeel bãmb bũmb nins fãa mam sẽn na n wilg foomã.

⁸Ra zoe bãmb ye, bala mam bee ne foom n na n fãag foom. Maam a Sẽn-Ka-Saab n yeele.›

⁹Dẽ, Sẽn-Ka-Saab tẽega b nug n sɩɩs mam noorã n yeel maam yaa: Ade, mam ninga m goamã fo noorẽ.

¹⁰Ade, rũndã, mam kõta foom noor tɩ f võ, la f pãb n wã, la f sãame, la f siig buud toay-toayã ne soolem toay-toayã, la f lebs n me la f sele.

¹¹Sẽn-Ka-Saab goma ne maam n yeele: ‹Zeremi, foom nee bõe? La mam leokame tɩ m nee tɩɩg ning sẽn ningd-a puud tao-tao wã willa.

¹²La Sẽn-Ka-Saab yeela maam yaa: ‹Fo sẽn yã wã yaa sɩda, bala mam gũusda m gomdã n na n pids-a tao-tao.›

¹³Sẽn-Ka-Saab leb n goma ne maam naoor a yiibẽ soab n sok maam yaa: ‹Fo nee bõe?› La mam yeelame tɩ m nee rʋk sẽn kɩll wĩndg sẽn lʋɩtẽ dɩtg sẽnẽ n kɛɛda, t'a noorã tees wĩndg sẽn lʋɩtẽ goabg sẽnẽ.

¹⁴La Sẽn-Ka-Saab yeela maam yaa: ‹Fo sẽn ne bũmb ningã wilgdame tɩ toog na n yii wĩndg sẽn lʋɩtẽ dɩtg sẽnẽ, n wa paam tẽngã nebã fãa.

¹⁵Maam a Sẽn-Ka-Saab yetame: Ade, mam na n boola buud toay-toayã sẽn be wĩndg sẽn lʋɩtẽ dɩtg soolem-dãmbã pʋgẽ wã. Bãmb na n waame, la b rĩm-dãmbã ned kam fãa na n vigla a naam geer Zeruzalɛm tẽngã rignoyẽ. B na n gũbga a lalgã ne Zʋʋda tẽms a taabã fãa.

¹⁶Mam na n kaoo bãmb bʋʋdo, tʋʋm-wẽns nins fãa b sẽn maanã yĩnga: bãmb sẽn bas maam n yõogd wisd n kõt buud a taabã wẽnnaam-dãmbã, la b wõgemded n waoog bõn-naandsã sẽn yaa b nug tʋʋmdã yĩnga.

¹⁷La foom a Zeremi, yik n sẽbg f sɛɛga, n togs bãmb bũmb nins fãa mam sẽn yeel foomã. Ra zoe bãmb tɩ m wa kɩt tɩ rabeem yõk foom bãmb nifẽ ye.

¹⁸Ade, Zʋʋda rĩm-dãmbã ne b nanambsã la b maan-kʋʋdbã ne tẽngã nebã fãa na n zaba ne foom, la mam na n kõo foom pãng rũndã, tɩ f yɩ wa tẽng sẽn gũbg ne lalga, la f yɩ wa kut ra-lugdga, la f yɩ wa zũud lalg tẽngã nebã fãa taoore, tɩ b ka tõe n tõog foom ye. Bala, mam bee ne foom n na n fãag foom. Yaa maam a Sẽn-Ka-Saab n yeele.›