Read SEBR SÕNGO, 1998 A Zeremi 10 Bible Online

A Zeremi 10 - SEBR SÕNGO, 1998 bible

A Zeremi 10

¹Israyɛll nebã, kelg-y Sẽn-Ka-Saab sẽn yet-yã!

²Sẽn-Ka-Saab yetame: «Ra bao-y tɩ zãms buud a taabã minindã ye. La ra yɛɛs-y ne bãn nins sẽn be yĩngrã wa buud a taabã ye.

³Bala, bu-bãmb minindã yaa zaalem. B kɛɛgda raoog kãgrẽ tɩ tʋʋm-mit rɩk a lar n pees-a.

⁴B nagsd-a-la ne wanzuri la ne sãnem n bao zãar ne kaadg n ka-a t'a ra lʋɩ ye.»

⁵Bõn-naands-kãens yaa wa b sẽn dɩk zug peoog n fõgen da-giuug pʋʋg pʋgẽ. Bãmb ka gomd ye. Yaa tɩlɛ tɩ b zãad-ba, b sẽn ka tõe n kẽn b toorã yĩnga. Ra zoe-y bãmb ye. Bala, bãmb ka tõe n maan wẽng bɩ neer ye.

⁶Sẽn-Ka-Saabo, yãmb to ka be ye. Yãmb yaa kãsenga, la y yʋʋrã yaa kãseng n tar pãnga.

⁷Buudã fãa rĩmã, ãnda soab n ka na n zoe yãmba? Yãmb seka zoeese. Bala, buud toay-toayã fãa yam dãmbã sʋka, ne b soolem-dãmbã fãa pʋse, yãmb ka tar to ye.

⁸Bãmb fãa yaa yalemb la zɩtba. Bãmb bõn-naandsã yaa raad bala, b ka tõe n wilg ned bũmb ye!

⁹Wanzuri yita Tarsɩɩse, la sãnem yita Ufaaze. Tʋʋm-mitbã rɩkd-b lame, la yõak bond-b lame, la b yeelgd-b-la fu-moaama ne fu-miidu. Bõn-kãens fãa yaa ninsaalb minim tʋʋm bala.

¹⁰La Sẽn-Ka-Saab n yaa sɩd Wẽnnaam. Bãmb n yaa Wẽnnaam sẽn vɩ. Bãmb n yaa rĩm wakat fãa. Tẽngã rigimdida bãmb sũ-yikrã yĩnga. Buud ba a yembr ka tõe n yals bãmb sũ-puugrã pʋgẽ ye.

¹¹Yeel-y bãmb tɩ wẽnnaam-dãmb nins sẽn ka naan yĩngr la tẽngã na n menema dũniyã zugu.

¹²Sẽn-Ka-Saab naana tẽngã ne b meng pãnga. Bãmb yamã kɩtame tɩ dũniyã beẽ, la b yɛdga sa-gãongã ne b bãngrã.

¹³Bãmb sã n zẽk b koɛɛgã, koomã sẽn be yĩngrã tigimda taaba. Bãmb kɩtdame tɩ sawat zẽk n ta dũniyã kɩremsã fãa. Bãmb kɩtdame tɩ sa-yãgb sikd sa-koom, la b kɩtdẽ tɩ sebgã yit a sẽn beẽ wã n fugda.

¹⁴Nebã fãa lebga zɩtba, n ka tar bãngr ye. Yõak bõn-naandg yãnd tar-a lame. Bala, bãmb yaa zĩrẽ bõn-naandse, la vɩɩm ka be bãmb pʋgẽ ye.

¹⁵Bãmb yaa zaalem. Bãmb yaa zĩrẽ tʋʋmã. Wakat ning Sẽn-Ka-Saab sẽn na n wa ges b yellã, b na n sãamame.

¹⁶A Zakoob yagensã Wẽnnaam ka woto ye. Bala, bãmb n yaa bũmb fãa naanda, la bãmb yãka Israyɛll buudã n maan b nebã. Bãmb yʋʋr la Saasẽ-Pãng-Soaba.

¹⁷Zeruzalɛm nebã, wʋk-y y teed tɩ y bɛɛbã gũbg-y-lame!

¹⁸Bala, Sẽn-Ka-Saab yetame: «Mam na n lobga tẽngã nebã wa loaabg kugr tɩ b zãage. Mam na n dɩdg-b lame tɩ b ka tõog n põs ye.»

¹⁹Zeruzalɛm nebã yetame: Toog paama tõndo. Tõnd poglgã ka maagd ye. Tõnd dag n tagsame tɩ d toogã tɛk la woto, la d sak n deegame.

²⁰Tõnd fu-roogã sãamame. B tõsa a wĩyã. Tõnd ka leb n tar kamb ye, b fãa loog n basa tõndo. Bãmb ka leb n be ye. Ned ka be sẽn na n leb n tilg d fu-roogã n yɛdg a pɛɛlã ye.

²¹Bala, tõnd nebã nanambs yaa zɩtba. Bãmb ka sok n bãng Sẽn-Ka-Saab yam ye. Yaa woto n kɩt tɩ bãmb ka tar bãngre, la woto me n kɩt tɩ b nebã fãa sãeege.

²²Kelg-y bʋrg rãamde! A kolgdame! Bʋr-kãseng n yit tẽng ning sẽn be nug-rɩtgã. A tãb-biisã na n kɩtame tɩ Zʋʋda tẽmsã lebg raboodo, la we-baas gãas zĩisi.

²³Sẽn-Ka-Saabo, mam miime tɩ ninsaal ka tar noor ne a vɩɩm sẽn na n yɩ bũmb ning ye. Ninsaal ka so a meng vɩɩm yell ye.

²⁴Sẽn-Ka-Saabo, rems-y tõnd wa sẽn zems y tɩrlmã, la y ra rems tõnd wa sẽn zems y sũ-yikrã ye. Sã n ka rẽ, tõnd na n menema zãnga.

²⁵Pʋdg-y y sũ-yikrã bu-zẽmsã sẽn ka mi yãmbã zutu, la buud nins sẽn ka pʋʋsd ne yãmb yʋʋrã zutu. Bala, bãmb dɩ a Zakoob yagensã zãnga, n sãam b yiyã.