Read SEBR SÕNGO, 1998 A Zeremi 13 Bible Online

A Zeremi 13 - SEBR SÕNGO, 1998 bible

A Zeremi 13

¹Sẽn-Ka-Saab yeela maam yaa: «Kẽng n tɩ ra kur-wĩir sẽn wʋg ne gĩsi, n sẽbg f sɛɛga, la f ra los-a koomẽ ye.»

²Dẽ, mam kẽngame n tɩ ra kur-wĩirã wa Sẽn-Ka-Saab sẽn yeel maamã, n sẽbg m sɛɛga.

³Sẽn-Ka-Saab goma ne maam naoor a yiibẽ soaba, n yeele:

⁴«Rɩk kur-wĩirã fo sẽn dag n da n sẽbg f sɛɛgã, n kẽng Efrat kʋɩlgã noor n tɩ solg-a pĩig kugr bokẽ.»

⁵Mam sɩd kẽnga Efrat kʋɩlgã noor n tɩ solg kur-wĩirã, wa Sẽn-Ka-Saab sẽn yeelã.

⁶La rasem wʋsg loogr zugẽ, Sẽn-Ka-Saab yeela maam tɩ m kẽng Efrat kʋɩlgã noor n tɩ rɩk kur-wĩirã bãmb sẽn dag n yeel maam tɩ m tɩ solgã n wa.

⁷Dẽ, mam leb n kẽnga Efrat kʋɩlgẽ wã n tɩ bao zĩig ning mam sẽn dag n tɩ solg kur-wĩirã. La mam tɩ mikame t'a sãamame n ka leb n yaa sõama yɛs ye.

⁸Dẽ, Sẽn-Ka-Saab goma ne maam n yeele:

⁹Maam a Sẽn-Ka-Saab yetame yaa: «Yaa woto me la m na n sãam Zʋʋda ne Zeruzalɛm nebã b tɩtaam-kãsengã yĩnga.

¹⁰Bãmb yaa nin-wẽns sẽn ka sakd n kelg mam goamã ye. B maanda wa sẽn zems b sũ-keglmã, la b zoet n pʋgda bu-zẽms wẽn-naands n wõgemded b taoor n waoogd-ba. Woto yĩnga, bɩ b lebg wa kur-wĩ-kãngã sẽn ka leb n tar yõodã.

¹¹Mam dag n dɩka Israyɛll ne Zʋʋda buudã n sẽbg m menga, wa ned sẽn dɩk sẽbdg n sẽbg a sɛɛga, tɩ b tõe n yɩ mam neba, n lebg mam zu-zẽkr ne m pẽgr la m ziiri, la bãmb ka kelg ye. Maam a Sẽn-Ka-Saab n yeele.»

¹²Yeel bãmb tɩ maam a Sẽn-Ka-Saab sẽn yaa Israyɛll Wẽnnaamã yetame: «Ko-waoosã fãa maana reezẽ rãam suiib yĩnga.» La b sã n yeele: «Tõnd n ka mi tɩ ko-waoosã fãa maana reezẽ rãam suiib yĩng bɩ?»

¹³Bɩ f yeel-b tɩ Sẽn-Ka-Saab yeelame yaa: «Ade, mam na n tɩgsa tẽn-kãngã nebã fãa ne rĩm-dãmbã sẽn zĩ a Davɩɩd naam geerã zugã, la maan-kʋʋdbã ne no-rɛɛsdbã, la Zeruzalɛm nebã fãa reezẽ rãam tɩ b nens yilme.

¹⁴Mam na n kɩtame tɩ ba-rãmb ne b kamb fão taaba. Maam a Sẽn-Ka-Saab n yeele. Mam ka na n bas-b ba a yembr ye, mam ka na n zoe ned ba a yembr nimbãaneg ye. Bũmb kõn tõog n gɩdg maam tɩ m ka sãam-b ye.»

¹⁵Kelg-y-yã, yok-y y tʋba! Da leb-y n wuk-y y mens ye! Yaa Sẽn-Ka-Saab n gomda.

¹⁶Waoog-y Sẽn-Ka-Saab sẽn yaa yãmb Wẽnnaamã, tɩ b ra wa kɩt tɩ lik bida wa, tɩ y naoor wa lak tãmsã zĩ-sobdã pʋg ye. Yãmb na n gũu vẽenem, la b na n kɩtame tɩ vẽenem lebg lika. B na n kɩtame t'a lebg lik bida.

¹⁷Yãmb sã n ka kelge, mam na n yãba m yembr y tɩtaamã yĩnga. Mam nintãm na n daagame. Mam na n yãba nintãm, b sẽn na n tall Sẽn-Ka-Saab nebã n kẽng yembdã yĩnga.

¹⁸Togs rĩmã ne a ma wã yaa: «Zĩnd-y tẽnga, bala yãmb naamã pugl lʋɩɩme, yãmb naam maanfã sẽn yaa neerã fõk n lʋɩɩme.

¹⁹B paga Negɛɛv tẽmsã rignoy tɩ ned ka tõe n pak-b ye. B yõga Zʋʋda tẽngã neb fãa n tall n kẽng yembdo. B talla b fãa n tɩ kẽes yembdo. Ned ba a yembr ka pa ye.»

²⁰Zeruzalɛm nebã, zẽk-y y neng n gese. Ges-y neb nins sẽn yi tẽng ning sẽn be wĩndg sẽn lʋɩtẽ nug-rɩtg n watẽ wã. Neb nins mam sẽn kõ yãmb tɩ y gʋʋl wa piis tɩ rag n yaa y waoogrã bee yɛ?

²¹Fo sẽn kɩt tɩ neb nins minim foom n lebg fo sõsd-n-taasã sã n wa yik n dat n soog foom, fo na n yeelame tɩ bõe? Yaa toog bal n na n wʋm foom wa pag sẽn kũmd dogem.

²²La fo sã n wa sokd f meng tɩ maana a wãn tɩ yel-kãngã wa lʋɩt f zugu, bɩ f bãng tɩ yaa fo kongrã sẽn yaa wʋsgã yĩngã la b sẽn kool fo fuugã la b yõg-fã.

²³Kuus ned tõe n teka a yĩn-gãong bɩ? Ãbg tõe n teka a kõbg bɩ? Woto sã n dag n tõeẽ, rẽnd yãmb sẽn minim wẽngã maanegã, y ka tõe n maan neere?

²⁴Mam na n kɩtame tɩ b sãeege, wa we-raoog sobg sẽn dɩkd moodo.

²⁵Maam a Sẽn-Ka-Saab yetame: «Fo pʋɩɩr la woto, pʋɩɩr ning mam sẽn kõ foomã la woto, fo sẽn yĩm mam yelle, n tẽ zĩrẽ wã yĩnga.

²⁶Mam na n pilga fo fuugã n lud f nenga, tɩ nebã yãnd fo yãndã.

²⁷Fo yoobã tʋʋmã ne f sẽn kaasd wa wed-raoog sẽn kelemd to-to n baood wed-yãangã, la f sẽn maand yoob n ningd f meng yãndã, mam yãnda bõn-kãens fãa gilli.» Mam yãnda f bõn-naands nins mam sẽn kisã tãmsã zutu, la wetã pʋse! Kayto! Zeruzalɛm, bõe yĩng tɩ f ka rat n yɩlg f meng ne f rẽgdã? Na n yɩ a woto n ta dabʋre?