Read SEBR SÕNGO, 1998 A Zeremi 14 Bible Online

A Zeremi 14 - SEBR SÕNGO, 1998 bible

A Zeremi 14

¹Sẽn-Ka-Saab goma ne a Zeremi warã wakat n yeel-a yaa:

²Zʋʋda nebã bee sũ-sãang pʋga. Bãmb tẽmsã sãamdame. Bãmb nebã gãee tẽng ne sũ-sãanga. Zeruzalɛm kelemsã zẽkd n kuiisa saasẽ.

³Nanambsã tʋma neb nins b sẽn so wã tɩ b tɩ bao koom n wa. Bãmb kẽnga kʋɩlsẽ wã, la b ka yã koom ye. Bãmb lebg n waa ne yʋ-vɩɩdo. Yãnd tar-b lame tɩ b sulg b zutu.

⁴Tẽngã sẽn pusã yĩnga, la saag me sẽn ka leb n niid tẽngã pʋgẽ wã yĩnga, yãnd tara koaadbã tɩ b sulg b zutu.

⁵Baa walg sẽn be weoogẽ wã sã n doge, a basda a biigã n zoe, yamd kaalem yĩnga.

⁶We-bõensã yasa tãn-bɛɛlã zutu, n sesd wa we-baase, tɩ b ninã yiigi, bãmb sẽn baood yamd n ka paamdẽ wã yĩnga.

⁷Sẽn-Ka-Saabo, tõnd kongrã sã n kɩt kaset tɩ tõnd ka tar bʋʋm, bɩ y maan y sẽn na n maanega, y yʋʋrã yĩnga. Tõnd kɩɩsgã yaa wʋsgo, tõnd beega yãmba.

⁸Sẽn-Ka-Saab sẽn yaa Israyɛll tẽebo, la Israyɛll fãagd yel-pakr wakate, bõe yĩng tɩ y maand wa sãan tẽn-kãngã pʋgẽ, la wa so-toagd sẽn tũ tẽngẽ n na n yõg gãag-sobendo?

⁹Yaa bõe tɩ y maand wa ned b sẽn yɛɛse, la wa gãndaoog sẽn ka tõe n sõng neb a taaba? Sẽn-Ka-Saabo, yãmb yaool n bee tõnd sʋka, la d boonda yãmb yʋʋrã d sʋka. Da bas-y tõnd ye!

¹⁰Sẽn-Ka-Saab gomda nin-kãensã wɛɛngẽ n yetẽ: «Bãmb nong n saada zĩig fãa, n ka zĩ zĩ-yend ye! Woto, bãmb ka ta maam a Sẽn-Ka-Saab yam ye. Moasã m na n tẽega b yel-wẽnã yell n sɩbg-ba.»

¹¹Sẽn-Ka-Saab yeela maam yaa: «Da pʋʋs n kos sõngr nin-bãmbã yĩng ye.

¹²Ba b sã n loe noore, mam ka na n kelg b sũ-sãang kelemsã ye. Ba b sã n wa ne maand sẽn yõogd bugum ne bõn-koaadl kũuni, mam ka na n deeg ye. Mam na n kʋ b fãa gill ne zabr sʋʋga, la ne kom la bã-longdse.»

¹³La mam leokame: «Kayto! Zu-soabã Sẽn-Ka-Saabo, no-rɛɛsdbã yet-b lame tɩ b ka na n yãnd zabr bɩ kom ye, la yãmb na n kõo bãmb vɩ-bãan sɩd-sɩd zĩ-kãnga.»

¹⁴Sẽn-Ka-Saab yeela maam yaa: «No-rɛɛsdbã yagda zĩrẽ n yetẽ tɩ yaa ne mam yʋʋr la b gomda. Mam ka tʋm-ba, m ka kõ-b noor tɩ b gome, m ka gom ne-b me ye. B sẽn togsd yãmbã yaa zĩrẽ vẽnegre, ne bagre, la zĩrẽ pĩnd-n-bãngr gom-zaala, la belgr bõn-naandse!

¹⁵No-rɛɛsdb nins sẽn gomd ne mam yʋʋr n yetẽ tɩ zabr bɩ kom ka na n zĩnd tẽn-kãngã pʋgẽ, tɩ mam yaool n ka tʋm-bã, ad maam a Sẽn-Ka-Saab sẽn yet bãmb wɛɛngẽ: ‹Zabr sʋʋg ne kom n na n kʋ no-rɛɛsdb-kãens zãnga.

¹⁶La neb nins bãmb sẽn togsd pĩnd-n-bãngr goamã me, zabr sʋʋg ne kom na n kʋʋ bãmb n lob Zeruzalɛm soayã zutu, tɩ ned ka be n na n mum bãmb ne b pagbã la b kom-dibli wã ne b kom-pugli wã ye. Mam na n kɩtame tɩ wẽng ning bãmb sẽn maandã leb-ba.› »

¹⁷Ad fo sẽn na n togs bãmb koɛɛg ninga: Mam nintãm daagda wĩntoog ne yʋng n ka sɛtẽ ye. Bala, yãmb kɩtame tɩ to-kãseng paam mam nin-nongdsã.

¹⁸Mam sã n yi n kẽng weoogẽ, mam yãta neb sẽn pa tãp pʋgẽ. Mam sã n kẽ tẽngã pʋgẽ, yaa komã sẽn koms-b rãmbã la m yãta. No-rɛɛsdbã ne maan-kʋʋdbã saagda tẽngã, b ka wʋmd yellã võor ye.

¹⁹Sẽn-Ka-Saabo, yãmb basa Zʋʋda la? Yãmb yam yii Sɩyõ? Yaa bõe tɩ y pogl tõnd hal tɩ d sãmpogrã ka tõe n maage? D dag n tẽedame tɩ yɛlã na n wa zemsame, la bõn-sõng ka be ye. D dag n tẽeda maagre, la yaa pelen-yɩk bal la d zĩ ne.

²⁰Sẽn-Ka-Saabo, d miime tɩ d maana sẽn ka neere, d deegame tɩ d ba-rãmbã kongame. Tõnd fãa beega yãmba.

²¹Yãmb yʋʋrã yĩnga, ra bas-y tɩ y naam geerã sẽn pid ne ziirã paam paoogr ye. Tẽeg-y y kaool ning y sẽn dag n maan ne tõndã yelle, la y ra sãam-a ye.

²²Bu-zẽmsã zĩrẽ wẽnnaam-dãmbã sʋka, bʋg n tõe n kɩt tɩ saag ni? Yaa sa-gãongã n kɩtd tɩ saagã niid bɩ? Ka yãmb a Sẽn-Ka-Saab sɩda? Yãmb la d teeg yã! Bala, yãmb la bõn-kãens fãa naanda.