Read SEBR SÕNGO, 1998 A Zeremi 17 Bible Online

A Zeremi 17 - SEBR SÕNGO, 1998 bible

A Zeremi 17

¹Maam a Sẽn-Ka-Saab yetame: «Zʋʋda nebã kongr gʋlsa ne kut gʋlsdga. A gʋlsa ne kut kɩtg b sũyã pʋse, la b tẽn-kugã yɩɩl zutu.

²Woto yĩnga, bãmb kambã na n tẽegda b tẽn-kugã yelle, ne b wẽn-naan-poak a Aseera ra-lugdsã sẽn be kunkubã zut tɩɩs nins sẽn tar-b maasmã tẽngrã.

³Mam na n kɩtame tɩ b wʋk y arzegsã ne y paoongã, y yel-wẽn nins yãmb sẽn maan y tẽngã fãa pʋgẽ wã yĩnga.

⁴Yãmb na n basa y tẽngã mam sẽn kõ yãmbã, la m na n kɩtame tɩ y lebg y bɛɛbã yembs tẽng yãmb sẽn ka mi pʋgẽ. Bala, m sũurã yikame n wit wa bugum sẽn ka na n tol n ki ye.»

⁵Maam a Sẽn-Ka-Saab yetame: «Toog bee ned ning sẽn bas maam n dɩk a teegr n teeg ninsaala, n baood sõngr yẽnda nengẽ wã zugu!

⁶Yẽnda wẽnda wa tuug sẽn be tẽn-nabd-koɛɛngẽ, n ka tol n tar sũ-noog ye. Yẽnda bee we-raoogã zĩig ning sẽn yaa kugã sʋka, la yamsem zĩig tɩ ned ba a yembr ka be beenẽ ye.

⁷Bark bee ned ning sẽn teeg Sẽn-Ka-Saabo, la sẽn dell bãmbã zugu!

⁸Yẽnda yaa wa tɩɩg sẽn be koom noore, t'a yẽgã tão n ta koomã. Tʋʋlg ka wẽed-a ye, a vãadã ka kʋɩt ye. War wakate, rabeem ka tar-a ye, a womda biis wakat fãa.

⁹Ninsaal sũurã pida ne zãmb n yɩɩd bũmb fãa, la a yaa wẽng wʋsgo! Ãnda n tõe n bãng-a?

¹⁰Maam a Sẽn-Ka-Saab n feesd ninsaal sũuri, n mi a sẽn tagsd bũmb ninga, n keood ned kam fãa wa sẽn zems a yel-manesmã, la a tʋʋmã biisi.

¹¹Ned sẽn maan zãmb n paam arzegs yaa wa koadeng sẽn wũund gɛl a sẽn ka lobe. A arzɛkã na n loog n bas-a-la a vɩɩmã pʋɩ-sʋka, t'a lebg wa yalem bala.»

¹²Naam geer sẽn tar ziir n be yĩngr hal sɩngr wakate. Yaa be la tõnd sɛk zĩigã.

¹³Sẽn-Ka-Saab sẽn yaa Israyɛll tẽebo, neb nins fãa sẽn basd-b yãmbã na n paama yãnde. Bãmb na n menema wa ned yʋʋr sẽn gʋls tẽng tom zugu, bala, bãmb basa yãmb sẽn yaa vɩɩm ko-bundgã.

¹⁴Sẽn-Ka-Saabo, bɩ y maag maam tɩ m paam laafɩ. Fãag-y maam tɩ m paam yolsgo, bala, yãmb la m pẽgda.

¹⁵Ad b sẽn yet maam: «Sẽn-Ka-Saab goamã bee yɛɛnẽ? Bɩ a paam pidsg moasã!»

¹⁶Yãmb miime tɩ ka maam n tʋlg tɩ toog paam-b ye, la mam ka rat b sãoong me ye. Yãmb mii bũmb nins mam sẽn yeelã.

¹⁷Bɩ y ra kɩt tɩ rabeem yõk maam ye. Yãmb yaa mam zĩ-lilldg toog wakate.

¹⁸Kɩt-y tɩ yãnd yõk m namsdbã, la y ra bas tɩ b paam maam ye. Kɩt-y tɩ rabeem yõk-ba, la y ra bas tɩ rabeem kẽ maam ye. Kɩt-y tɩ toog wa sãam-ba.

¹⁹Ad Sẽn-Ka-Saab sẽn yeel maam: «Kẽng n tɩ yals nebã zakã rignoor ning Zʋʋda rĩm-dãmbã sẽn tũud n kẽedẽ la b yitã, la Zeruzalɛm zakã rignoy a taabã fãa me,

²⁰n yeel-b yaa: Zʋʋda rĩm-dãmba, Zʋʋda nebã, yãmb dãmb fãa sẽn yaa Zeruzalɛm neb n tũud rigno-kãensã n kẽedẽ wã, kelg-y Sẽn-Ka-Saab koɛɛga!»

²¹Sẽn-Ka-Saab yetame: «Gũus-y y mense, n da wa tʋk zɩɩb vʋʋsg daarã, wall y tall zɩɩb n tũ Zeruzalɛm dignoyẽ wã n kẽ ye.

²²Da yiis-y zɩɩb y rotã pʋs vʋʋsg daarã, la y ra maan tʋʋmd ba a yembr ye. Kɩt-y tɩ vʋʋsg daarã yɩ daar sẽn welg toore, wa m sẽn dag n yeel y yaab-rãmbã.

²³Yãmb yaab-rãmbã ka kelge, b ka kɩll b tʋbr n kelg ye. Bãmb loba b nens kɛɛng n ka rat n wʋm la b sak remsg ye.

²⁴La maam a Sẽn-Ka-Saab yetame: ‹Yãmb sã n kelg maam neere, n ka tʋk zɩɩb n tũ tẽn-kãngã rignoyẽ vʋʋsg daarã, yãmb sã n kɩt tɩ vʋʋsg daarã yɩ daar sẽn welg toore, la y sã n ka maan tʋʋmd ba a yembr vʋʋsg daarã,

²⁵rĩm-dãmb sẽn zao a Davɩɩd naamã goeel zugu, n kẽnd ne wiidi wall saar-dãmba, ne b kug-zĩidbã, la Zʋʋda ne Zeruzalɛm nebã, nin-bãmbã fãa na n tũuda tẽngã rignoyẽ n kẽedẽ, la neb na n be a pʋgẽ wakat fãa.

²⁶Neb na n yii Zʋʋda soolem tẽmsẽ wã ne Zeruzalɛm tẽn-kɩremsẽ wã, la Benzame tẽngẽ wã, ne tẽms nins sẽn be kunkub la tãms sʋkã, la Negɛɛve, n tall maoong sẽn yõogd bugum, ne maoong a to, la bõn-koaadl kũuni ne wisdu, ne bark pʋʋsg kũuni, n wa Sẽn-Ka-Saab roogẽ wã.

²⁷La yãmb sã n ka kelg maam, y sã n ka kɩt tɩ vʋʋsg daarã yɩ daar sẽn welg toore, y sã n kɩɩs n tʋk zɩɩb n tũ Zeruzalɛm tẽngã rignoyẽ wã vʋʋsg daarã n kẽ, mam na n ninga tẽngã rignoy bugum, la bugmã na n dɩta Zeruzalɛm na-yiyã, n ka tol n kiidẽ ye.› »