Read SEBR SÕNGO, 1998 A Zeremi 2 Bible Online

A Zeremi 2 - SEBR SÕNGO, 1998 bible

A Zeremi 2

¹Sẽn-Ka-Saab goma ne maam n yeel yaa:

²«Kẽng n tɩ zẽk f koɛɛg n gom ne Zeruzalɛm nebã n yeel-b tɩ Sẽn-Ka-Saab yetame: ‹Mam tẽra yãmb bi-bɩɩlem wakatẽ pʋ-peelmã yelle. Yãmb dag n nonga maam wa pʋg-paal sẽn nong a sɩda, n tũ maam we-raoogẽ wã, zĩig ning bũmb sẽn ka tõe n yiẽ wã.

³Israyɛll nebã, yãmb dag n yaa neb sẽn welg toor Sẽn-Ka-Saab yĩng wa bɩle dẽenem biisi. Ned ning fãa sẽn sɩɩs-a yãmb rogenda taal a meng zugu, la toog na n paama a soaba. Maam a Sẽn-Ka-Saab n yeele.› »

⁴A Zakoob yagense, yãmb fãa sẽn yaa Israyɛll buudã, kelg-y Sẽn-Ka-Saab goamã!

⁵Sẽn-Ka-Saab yetame: «Mam maana bõe sẽn yaa wẽnga, tɩ y yaab-rãmbã yãnd n zãag b mens ne maam? Bãmb pʋga sẽn ka yõodo, tɩ b mensã lebg neb sẽn ka yõodo.

⁶Bãmb ka soke: Sẽn-Ka-Saab ning sẽn dag n yiis-a tõnd Ezɩpt tẽngã bee yɛɛnẽ? Sẽn-Ka-Saab ning sẽn dag n lʋɩ-a tõnd taoor we-raoogã sẽn tar londo, ne ware, la lik bida tɩ ned yir ka be beenẽ wã bee yɛɛnẽ ye.

⁷La mam talla bãmb n wa tẽng sẽn tar tɩ-womds tɩ b tõe n dɩ a biisi, ne a bõn-sõamyã. La bãmb wa n dẽgma m tẽngã n kɩt tɩ m sẽn so wã fãa lebg wẽnga.

⁸Maan-kʋʋdbã ka sok tɩ Sẽn-Ka-Saab bee yɛɛnẽ ye. Tõogã karen-saam-dãmb ka mi maam ye. Taoor dãmbã zãgsa maam. No-rɛɛsdbã togsa pĩnd-n-bãngr goam ne Baall yʋʋre, n waoog bũmb sẽn ka tar yõodo.

⁹Yaa woto tɩ m yetẽ tɩ m tara yell ne yãmba, la ne yãmb kambã kamba. Maam a Sẽn-Ka-Saab n yeele.

¹⁰Kẽng-y Sɩpr tẽms nins koom sẽn gũbgã n tɩ gese, la y tʋm neb tɩ b kẽng Kedaar n tɩ ges neere, n bãng bũmb a woto buud sã n ka be beenẽ.

¹¹Buud beeme n tek a wẽnnaam-dãmba, baa ne b sẽn ka wẽnnaam-dãmb sɩd-sɩdã? Mam nebã yẽ, bãmb dɩka waoogr ning mam sẽn kõ bãmbã n tek ne bũmb sẽn ka yõodo.

¹²Saasẽ, bɩ y rigimd n zoe rabeem, la y yɛɛse! Maam a Sẽn-Ka-Saab n yeele.

¹³Bala, mam nebã maana yel-wẽn a yiibu. Bãmb basa mam sẽn yaa vɩɩm ko-bundum b yĩngã, n tu ko-bao n kõ b mense. La b ko-baoã yaool n yaa võy n ka tõe n tall koom ye.

¹⁴Israyɛll nebã yaa yembs sɩda? Bãmb doga yembd pʋgẽ sɩda? La yaa bõe yĩng tɩ buud a taab na n soog-ba?

¹⁵Gɩgem-poal yik n teedga ne bãmb n kelemdẽ. Bãmb kelemdame tɩ b koees sãta. Bãmb wata ne sãoong b tẽngã pʋgẽ. Bãmb tẽmsã rɩɩ bugum tɩ ned ka leb n be b pʋsẽ ye.

¹⁶Baa Memfiis ne Takpanees nebã põngda yãmb zutu.

¹⁷Yel-kãngã sẽn paam yãmbã ka yãmb sẽn bas Sẽn-Ka-Saab sẽn yaa y Wẽnnaamã, wakat ning b sẽn yãag yãmb sorã zugã sɩda?

¹⁸La moasã, bõe yĩng tɩ yãmb dɩk Ezɩpt sore? Yãmb dabdame n na n tɩ yũ Nill kʋɩlgã koom la? Bõe yĩng tɩ yãmb dɩk Asiiri sore? Yãmb dabdame n na n tɩ yũ Efrat kʋɩlgã koom la?

¹⁹Bɩ wẽng ning y sẽn maanã rɩ-yã, la bɩ y sẽn bas maamã sɩbgr lʋɩ y zugu, tɩ y bãng tɩ yãmb sẽn bas maam a Sẽn-Ka-Saab sẽn yaa yãmb Wẽnnaam n ka leb n zoet maamã wata ne wẽng la toogo. Saasẽ-Pãng-Soabã n yeele.

²⁰Yãmb zẽkda y zug ne maam hal daar zãra, n yetẽ tɩ y ka leb n dat yembdã ye. Kũnkub-bɛdã zut ne tɩɩsã tẽngre, yãmb pɛɛlma wa pʋg-yoodre.

²¹Mam dag n sela yãmb tɩ y yaa wa reezẽ tɩ-sõngo, la wa tɩɩg sẽn yaa sõama hal wʋsgo. La maana a wãn tɩ yãmb tek n lebg wa reezẽ tɩɩg sẽn ka leb n yaa sõama?

²²Baa yãmb sã n so koom ne zẽem la ne safãnd wʋsgo, y yel-wẽnã na n ket n beeme tɩ m neẽ. Maam a Sẽn-Ka-Saab sẽn yaa Zu-soabã n yeele.

²³Yãmb ka tar zug n na n yeele: «Tõnd ka rẽgem d mens ye, tõnd ka tũ Baall-dãmbã ye!» Ges-y y sorã sẽn tɩ be long pʋgã. Ges-y y sẽn maandã. Yãmb wẽnda wa yʋgem-yãang sẽn saad n yeebdẽ!

²⁴Yãmb wẽnda wa we-bõn-yãang sẽn be we-raoogẽ tɩ bõn-daoog ratem tar-a t'a virsdẽ. Ãnda n tõe n gɩdg-a t'a ra maan a sẽn datã? A baoob ka be namsg ye. A yãab yaa naana a rʋʋb wakate.

²⁵Israyɛll nebã, gũus-y y mense, sã n ka rẽ, yãmb na n wa zoee nao-zaala, la y koeesã me na n kʋɩɩme! La yãmb yeelame tɩ rẽ ka yell ye, tɩ y nonga bu-zẽms wẽnnaam-dãmba, la y na n pʋg-b lame.

²⁶Israyɛll nebã na n paama yãnde. Bãmb ne b rĩm-dãmbã la b nanambsã ne b maan-kʋʋdbã la b no-rɛɛsdbã na n paama yãnde, wa wagdr b sẽn lingi.

²⁷Bãmb boonda raoog tɩ b ba, la b yeel kugr tɩ yaa yẽnda n dog-ba. Bãmb wẽnemda b nense, la b tud maam b kudg n ka get maam ye. La toogã sã n yaool n paam bãmba, bãmb yetame: «Yik-y n fãag-y-do!»

²⁸Zʋʋda nebã, y wẽnnaam-dãmb nins y sẽn dag n maan n kõ y mensã bee yɛɛnẽ? Bãmb sã n tõe n fãag yãmb toog wakate, bɩ b yik n fãag-yã! Bala, yãmb wẽnnaam-dãmbã sõor zema y tẽmsã sõore!

²⁹Maam a Sẽn-Ka-Saab sokdame: «Yãmb zabda ne maam bõe poore? Yãmb fãa zãgsa maam.

³⁰Mam sẽn sɩbg yãmb kambã yaa zaalem bala. Yãmb ka sak n tũ m demsgã ye. Yãmb kʋʋ no-rɛɛsdb nins mam sẽn dag n tʋm yãmb nengẽ wã, wa gɩgem-toaag sẽn kʋʋd to-to wã.

³¹Yãmb a zamaan-kãngã nebã, kelg-y Sẽn-Ka-Saab goamã! Mam dag n yaa wa we-raoog ne Israyɛll bɩ? Bɩ tẽng sẽn yaa lik ne bãmba? Mam nebã, bõe yĩng tɩ yãmb yetẽ tɩ y rat n maana y yam, la y ka rat n lebg n wa mam nengẽ?

³²Pʋg-sad tõe n yĩma a fan-teed sɩda? Pʋg-paal tõe n yĩma a fuugu? La mam nebã yaool n yĩma mam yell hal daar zãra.

³³Yãmb mi y sẽn nong-b rãmbã baoobo, la baa pagb nins sẽn yaa wẽns n yɩɩdã, fo kõt-b-la zãmsg sẽn ka sõama.

³⁴Bũmb ning sẽn kẽesd yãmb moogã, yaa nimbãan-dãmb ne neb sẽn ka tar yellã zɩɩm sẽn mad y futã noyã, tɩ y yaool n ka ling-b tɩ b kaood roog n baood n dɩk bũmbã.»

³⁵La ne rẽ fãa, yãmb yetame: «Tõnd tara bʋʋm, bɩ b ra yik b sũur ne tõnd ye!» La mam yetame: «Beneere, mam na n bʋʋ ne yãmba, y sẽn yeel tɩ y ka maan yel-wẽnã yĩnga.»

³⁶Yaa bõe tɩ y tekd yam tao-tao woto? Ezɩpt me na n ninga yãmb yãnde, wa Asiiri sẽn dag n ning yãmb yãndã.

³⁷Yãmb na n kʋka y zut n yi Ezɩpte. Bala, Sẽn-Ka-Saab basa yãmb sẽn teeg-b rãmbã. Nin-bãmb ka na n tõog n sõng yãmb ye.