Read SEBR SÕNGO, 1998 A Zeremi 22 Bible Online

A Zeremi 22 - SEBR SÕNGO, 1998 bible

A Zeremi 22

¹Ade, Sẽn-Ka-Saab yetame: «Kẽng Zʋʋda rĩmã na-yirã n tɩ togs gom-kãensã.

²Yeel yẽnda yaa: Zʋʋda rĩmã, fo sẽn zao a Davɩɩd naam geerã, foom ne f tʋmtʋmdbã la f nebã sẽn tũud rigno-kãensã n kẽedẽ wã, kelg-y Sẽn-Ka-Saab goamã!»

³Ade, Sẽn-Ka-Saab yetame: «Bʋ-y bʋʋdã tɩrg n fãag b sẽn fãad a soabã namsdã nugẽ. Ra maan-y sãambã ne kɩɩbsã la pʋg-kõapã pãng ye. Ra maan-y-b wẽnga, la y ra raag bʋʋm soab zɩɩm zĩ-kãngã ye.

⁴Bala, yãmb sã n sɩd sak gom-kãensã, a Davɩɩd yagensã sʋka, rĩm-dãmb ka na n kong sẽn na n zaoond a Davɩɩd naam geerã, n tũud ro-kãngã rignoyã n kẽedẽ, la b zao saar-dãmb ne wiid ye. Bãmba, b tʋmtʋmdbã, ne b nebã.

⁵La yãmb sã n ka sak gom-kãensã, mam wẽenda ne m menga, tɩ ro-kãngã na n lebga raboogo. Maam a Sẽn-Ka-Saab n yeele.»

⁶Ad Sẽn-Ka-Saab sẽn yet Zʋʋda na-yirã wɛɛngẽ: «Fo yaa neer wa Galaad ne Libã tãngã. Mam yaool n na n kɩtame tɩ f lebg we-raoogo, la m kɩt tɩ f lebg tẽng ned sẽn ka leb n be a pʋgẽ ye.

⁷Mam yãka sãamdb tɩ b wat n na n zab ne-yã. Bãmb ned kam fãa zãada a zab-teoogo. Bãmb na n kɛɛ yãmb sɛɛdr tɩɩs nins sẽn ya-b neeb n yɩɩdã n yõog bugum.

⁸Buud wʋsg na n tũu tẽn-kãngã sɛɛgẽ n looge.» Bãmb na n sokda taaba: Bõe yĩng tɩ Sẽn-Ka-Saab maan tẽn-kãsen-kãngã a woto?

⁹La b na n leok-b lame n yeele: Yaa tẽn-kãngã nebã sẽn bas Sẽn-Ka-Saab sẽn yaa bãmb Wẽnnaam kaoolã, n wõgemd n waoog buud a taab wẽnnaam-dãmba, la b sak-bã yĩng n kɩt tɩ yaa a woto.

¹⁰Ra yãb-y sẽn ki-a wã yĩng ye. Ra sãam-y y sũur a yĩng ye. Yãb-y sẽn loogd-a wã yĩnga, bala, yẽnda ka na n leb n wa, la a ka na n leb n yãnd a ba-yirã ye.

¹¹Bala, Sẽn-Ka-Saab goma Zʋʋda rĩm a Zoziyaas biig a Salum wɛɛngẽ, soab ning sẽn dag n led-a a ba wã sẽn loogã zĩigẽ n dɩt naamã n yeele: «Yẽnda ka na n tol n leb n wa ye.

¹²Bala, yẽnda na n kii tẽng ning b sẽn na n tall-a n kẽngã pʋgẽ. Yẽnda ka na n leb n yãnd tẽn-kãngã abada.»

¹³Toog bee ned ning sẽn maand wẽgd n met a roog zugu! Yẽnda maanda zãmb n met a yĩngr doogo, la a kɩtdẽ t'a taab tʋmd zaalem, t'a ka kõt bãmb b yaood ye.

¹⁴Yẽnda yetame: «Mam na n mee ro-kãseng sẽn tar ro-pʋs sẽn yaa yalems yĩngr doogẽ wã m mengã yĩnga.» Yẽnda ningda a roogã peem-leese, la a ningd-a ne sɛɛdr tɩɩs raado, la a bolgd-a-la ne goor sẽn yaa miuugu!

¹⁵Fo tagsdame tɩ yaa f sẽn maneg f roogã ne sɛɛdr tɩɩs raadã yĩng n kɩt tɩ fo yaa rĩm bɩ? Fo ba wã rag n tar n dɩtame la a yũuda, la ne rẽ fãa, yẽnda rag n maanda sẽn zemse, la sẽn yaa tɩrga, tɩ bũmb baa fɩ ka paoog-a ye.

¹⁶Yẽnda rag n kaooda naong rãmb ne nimbãan-dãmb bʋʋd tɩrga. Maam a Sẽn-Ka-Saab bãngr yɩɩda a woto la?

¹⁷La foom, fo gesg la f tagsg pʋgẽ, fo sẽn baood yaa f meng nafr bala, f baood n daaga sẽn ka tar-a yell zɩɩm, la f wõr neb n maan-b pãnga.

¹⁸Woto yĩnga, ad Sẽn-Ka-Saab sẽn yeta, Zʋʋda rĩm a Zoziyaas biig a Yoyakim wɛɛngẽ: «B ka na n yãb a yĩng ye. B ka na n yeel tɩ ‹toogo, m saam-biiga›, wall ‹toogo, m tão-poak ye! B ka na n yãb a yĩng ye. B ka na n yeele: Toogo, m soaala›, wall ‹toogo, m dĩm› ye!

¹⁹B na n muma yẽnda wa bõang bala, b na n vuu yẽnda n yiis Zeruzalɛm n tɩ lobe.

²⁰Zeruzalɛm nebã, rʋ-y Libã tãngã zug n yãbe! Kɩt-y tɩ y koees sãd Basã tãngã zugu! Rʋ-y Abarim tãngã zug n kelme! Bala, b sãama f rolsen-dãmbã fãa.

²¹Maam a Sẽn-Ka-Saab rag n goma ne yãmb wakat ning y sẽn dag n zĩ bãanã, la yãmb yeelame tɩ y kõn deeg ye. Yãmb yel-manesem la a woto hal y bi-bɩɩlem wakate, la y ka kelg maam ye.

²²Sebg na n dɩka y nanambsã, la b na n wʋka neb nins sẽn nong yãmbã n tɩ maan yembse. La yãmb na n paama yãnd ne paoogr y wẽngã fãa yĩnga.

²³Yãmb sẽn be Libã wã, yãmb sẽn maan y tʋgdã sɛɛdr tɩɩsã zutã, toog sã n wa yãmb zutu, y na n wõosame. Yãmb na n kũsa wa pag sẽn kũmd dogem.»

²⁴Maam a Sẽn-Ka-Saab sẽn vɩ wã wẽendame n yetẽ tɩ baa Zʋʋda rĩm a Yoyakim biig a Koniya sã n dag n yaẽ mam nug tikr bãnd n be mam dɩtg nugẽ wã, mam dag n na n pidgẽ-yã-a lame n lobe.

²⁵Mam na n basa foom neb nins sẽn dat n kʋ foomã nugẽ, la fo sẽn zoet-b rãmbã nugẽ, sẽn dat n togs tɩ Babilond dĩm a Nebukatnedzaar ne Kalde nebã.

²⁶Mam na n diga foom ne f ma-roakã tɩ y kẽng tẽng yãmb sẽn ka rog a pʋgẽ n tɩ ki be.

²⁷Bãmb kõn tol n lebg n wa tẽn-kãngã bãmb sẽn dat n yãnd ne b sũur fãa wã pʋgẽ ye.

²⁸Rẽ yĩnga, a Koniya yaa wa bõn-zaok tɩ ned ka leb n dat-a la? Bõe tɩ b rig yẽnda ne a kambã tɩ b kẽng tẽng bãmb sẽn ka mi?

²⁹Tẽnga! Tẽnga! Tẽnga! Kelg Sẽn-Ka-Saab goamã!

³⁰Sẽn-Ka-Saab yetame: «Gʋls-y rao-kãng wa ned sẽn ka paam biiga, la wa ned sẽn ka na n tol n paam tõogr a vɩɩmã pʋgẽ ye. Bala, yẽnda ka na n tol n paam yageng sẽn na n zaoond a Davɩɩd naam geerã n soog Zʋʋda ye.» Maam a Sẽn-Ka-Saab n yeele.