Read SEBR SÕNGO, 1998 A Zeremi 23 Bible Online

A Zeremi 23 - SEBR SÕNGO, 1998 bible

A Zeremi 23

¹Maam a Sẽn-Ka-Saab yetame: «Toog bee nanambs nins sẽn kɩt tɩ mam nebã sãamdẽ la b sãeegdẽ wã zugu!»

²Woto yĩnga, ad Sẽn-Ka-Saab sẽn yaa Israyɛll Wẽnnaamã sẽn yet nanambs nins sẽn zãad bãmb nebã: «Yaa yãmb n kɩt tɩ mam nebã sãeeg n looge. Yãmb dig-b lame n ka ges b yell ye. La moasã, mam na n gesa yãmb yell y tʋʋm-wẽnsã yĩnga.» Maam a Sẽn-Ka-Saab n yeele.

³«Mam mengã na n kɩtame tɩ m neb nins sẽn ketã yi tẽms nins fãa mam sẽn dig bãmb tɩ b kẽngã n lebg n wa yiri. La bãmb na n doga kamba, la b na n fɩɩgame n lebg wʋsgo.

⁴Mam na n kõo bãmb nanambs sẽn na n soog-ba, la rabeem ka na n leb n yõk bãmb ye. Ned kõn leb n yɛɛs bãmba, la bãmb ned ba a yembr kõn menem ye.» Maam a Sẽn-Ka-Saab n yeele.

⁵Sẽn-Ka-Saab yetame: «Ade, wakat n wate, tɩ mam na n kɩt t'a Davɩɩd yageng a yembr sẽn yaa nin-tɩrg lebg rĩm n dɩ naam, n soog nebã ne yam, la a kaood buudã ne zemsg la ne tɩrlem tẽngã pʋgẽ.

⁶Yaa yẽnda wakat la Zʋʋda nebã na n paam fãagre, tɩ Israyɛll nebã zĩnd ne bãane. B na n boola rĩmã yʋʋr tɩ Sẽn-Ka-Saab sẽn yaa tõnd tɩrlem.»

⁷Sẽn-Ka-Saab yeelame tɩ wakat n wate, tɩ nebã ka na n leb n yeel tɩ: «Mam wẽenda ne Sẽn-Ka-Saab sẽn vɩ wã sẽn yiis Israyɛll nebã Ezɩpt tẽngã yʋʋr ye.

⁸Fo na n yeelame: ‹Mam wẽenda ne Sẽn-Ka-Saab sẽn vɩ wã yʋʋre, soab ning sẽn dag n dig-a Israyɛll nebã tɩ b kẽng rɩtg sẽnẽ ne tẽms a taabã pʋsẽ, n yaool n lebg n tɩ tall bãmb n wa tɩ b zĩnd b tẽngã pʋgẽ wã.› »

⁹Koɛɛg no-rɛɛsdbã yĩnga: Mam sũur sãamame, la m kõabã fãa rigdame. Mam yaa wa ned sẽn tɩg rãam, la wa ned sẽn yũ reezẽ rãam n tuumdẽ, Sẽn-Ka-Saab ne b gom-sõamy wã yĩnga.

¹⁰Bala, tẽngã pida ne yoaadba. Kãab-wẽngã kɩtame tɩ tẽngã be sũ-sãan-kãseng pʋga. Rũmsã wãbneg zĩis sẽn be we-raoogã pʋgẽ wã kʋɩɩme. Bãmb zoet n dabda wẽng maanego. Bãmb sũur keemame tɩ maan sẽn kis bala.

¹¹No-rɛɛsdbã ne maan-kʋʋdbã rẽgma b mense. Baa mam doogã pʋga, mam yãta b tʋʋm-wẽnsã. Maam a Sẽn-Ka-Saab n yeele.

¹²Yaa rẽ n kɩt tɩ b sorã na n yɩ sals ne lika. B na n tusa bãmb tɩ b lʋɩ, bala, yʋʋmd ning b sẽn na n sɩbg bãmbã, mam na n kɩtame tɩ toog paam-ba. Maam a Sẽn-Ka-Saab n yeele.

¹³Mam yãame tɩ Samaari no-rɛɛsdbã maana yɛl sẽn ka sakd togsgo: Bãmb togsa pĩnd-n-bãngr goam ne a Baall yʋʋre, bãmb kẽesa Israyɛll sẽn yaa mam nebã moogo.

¹⁴La Zeruzalɛm no-rɛɛsdbã nengẽ, mam yãnda yɛl sẽn yaa wẽng n yɩɩda: Bãmb yaa yoaadba, bãmb pʋgda zĩrẽ-beedo. Bãmb paasda nin-wẽns pãnga, hal tɩ ned ka be n dat n bas wẽngã maaneg ye. Mam geta bãmb fãa wa Sodom nebã, la Zeruzalɛm nebã yaa wa Gomoor nebã.

¹⁵Woto yĩnga, ad Saasẽ-Pãng-Soabã sẽn yet no-rɛɛsdbã wɛɛngẽ: «Mam na n kõo bãmb rɩɩb sẽn yaa toog liga tɩ b rɩ, la m kɩt tɩ b yũ koom sẽn tar zẽnem. Bala, Zeruzalɛm no-rɛɛsdbã kɩtame tɩ tẽngã fãa pid ne rẽgdo.»

¹⁶Saasẽ-Pãng-Soabã yetame: «Da kelg-y pĩnd-n-bãngr goam nins no-rɛɛsdbã sẽn togsd yãmbã ye. Bãmb belgda yãmb ne gom-vɩɩdo. Bãmb sẽn togsd goam ninsã ka yit Sẽn-Ka-Saab noorẽ ye. Yaa bãmb mensã sũy tagsgo.»

¹⁷Bãmb tol n yeta neb nins sẽn paoogd Sẽn-Ka-Saab goamã yaa: «Bũmb kõn maan yãmb ye!» Bãmb yeta neb nins fãa sẽn keng b sũyã yaa: «Toog kõn paam yãmb ye!»

¹⁸Bala, ãnda soab n zĩnd Sẽn-Ka-Saab tigingã pʋga, n yãnd la a wʋm b goamã? Ãnda n kelg b goamã neer la a wʋm-a?

¹⁹Ade, yaa Sẽn-Ka-Saab sobg n fugdi. Yaa sũ-puug-kãsenga, a bee nin-wẽnsã zut n gõnemdẽ.

²⁰Sẽn-Ka-Saab sũurã ka na n sigi, tɩ b ka maan b sẽn dat n maanã, la b pids b saagrã ye. Wakatã sã n ta, yãmb na n wʋma bõn-kãng võore.

²¹Sẽn-Ka-Saab yetame: Mam ka tʋm no-rɛɛsdb-kãensã ye, la b saad n zoetame. Mam ka kõ-b gomd ye, la bãmb togsda pĩnd-n-bãngr goamã.

²²Bãmb sã n dag n zĩndẽ mam tigingẽ wã, b rag n na n dɩkẽ-la m goamã n togs m nebã, n kɩt tɩ b bas b manesem-wẽnsã ne b tʋʋm-wẽnsã.

²³Sẽn-Ka-Saab sokdame yaa: «Dẽ yĩnga, mam yaa Wẽnnaam sẽn ne yambẽ bal n ka ne yɩɩg la?»

²⁴Sẽn-Ka-Saab yetame: «Rẽ yĩnga, ned tõe n soondame tɩ m ka yãnd-a sɩda?» Sẽn-Ka-Saab yetame: «Mam ka be yĩngr la tẽng sɩda?

²⁵Mam wʋma bũmb nins no-rɛɛsdbã sẽn yetã. Bãmb yagda zĩrẽ, n yetẽ tɩ yaa ne mam yʋʋr la b gomda. Bãmb yetame tɩ b zãmsa zãmsdo, tɩ b paama vẽnegre.

²⁶Zãmb na n zĩnda no-rɛɛsdbã sũy pʋsẽ tɩ b togsd zĩrẽ pĩnd-n-bãngr goam hal tɩ ta dabʋre?

²⁷Bãmb togsda taab b zãmsdã n dat tɩ m nebã yĩm m yʋʋrã wa b yaab-rãmbã sẽn dag n yĩm mam yell a Baall yĩngã.

²⁸Bɩ no-rɛɛs ning sẽn paam-a zãmsd togs a zãmsdã, la bɩ ned ning sẽn tar-a mam goamã togs m goamã vẽenega! Bõe lagem-n-taar n be wudg ne ki sʋka? Maam Sẽn-Ka-Saab n yeele.»

²⁹Sẽn-Ka-Saab yetame: Mam goamã ka wẽnd bugum sɩda? A ka wẽnd wa zãar sẽn wãad pĩig kugr sɩda?

³⁰Sẽn-Ka-Saab yetame: «Ade, mam na n zaba ne no-rɛɛsdb nins sẽn zuud mam goamã taab nengẽ n yetẽ tɩ yaa maam n gomã.»

³¹Sẽn-Ka-Saab yetame: «Ade, mam na n zaba ne no-rɛɛsdb nins sẽn gomd b mens goam n yaool n yetẽ tɩ yaa maam n gomã.»

³²Sẽn-Ka-Saab yetame: «Mam na n zaba ne no-rɛɛsdb nins sẽn togsd zĩrẽ zãmsdo, n tudgd mam nebã ne b zĩrẽ wã, la ne b gom-vɩɩdã, tɩ yaool n ka maam n tʋm-ba, la m ka kõ-b noor me ye. Bãmb ka tar yõod ne m nebã ye.»

³³Sẽn-Ka-Saab yetame: «Zeremi, nin-bãmbã wall no-rɛɛs bɩ maan-kʋʋd sã n sok foom tɩ Sẽn-Ka-Saab sɩbgr koɛɛgã yaa bʋgo, la zɩɩbã yaa bʋgo, bɩ f yeel-b tɩ yaa bãmb mensã la zɩɩbã, la f yeel-b tɩ mam na n dig-b-lame tɩ b zãag ne maam.

³⁴La no-rɛɛs wall maan-kʋʋd bɩ ned a to sã n yeel tɩ Sẽn-Ka-Saab sɩbgr koɛɛgã la woto, mam na n sɩbga yẽnda ne a zakã rãmb fãa.»

³⁵Dẽ, bɩ ned kam fãa sok a to ne a saam-biig a woto: «Sẽn-Ka-Saab leokame tɩ bõe? Sẽn-Ka-Saab yeelame tɩ bõe?»

³⁶La y ra tol n leb n gom Sẽn-Ka-Saab sɩbgr koɛɛgã yell ye. Bala, yaa ned kam fãa gomd n na n yɩ a sɩbgr koɛɛga, yãmb sẽn golemd Wẽnnaam sẽn vɩ sẽn yaa Saasẽ-Pãng-Soabã sẽn yaa tõnd Wẽnnaam goamã yĩnga.›

³⁷Sok no-rɛɛsdbã yaa: ‹Sẽn-Ka-Saab leokame tɩ bõe? Sẽn-Ka-Saab yeelame tɩ bõe?›

³⁸La yãmb sã n ket n yetẽ tɩ Sẽn-Ka-Saab sɩbgr koɛɛga, maam a Sẽn-Ka-Saab yetame: «Yãmb sẽn gom a woto tɩ mam yaool n kɩt tɩ b yeel yãmb tɩ y ra yeel a woto wã,

³⁹mam na n yĩma yãmb yelle. Mam na n basa yãmba, la m bas tẽng ning m sẽn dag n kõ yãmb ne y yaab-rãmbã.

⁴⁰Mam na n kɩtame tɩ y paam paoogr wakat fãa tɩ yɩ yãnd ned sẽn kõn tol n yĩm ye.»