Read SEBR SÕNGO, 1998 A Zeremi 24 Bible Online

A Zeremi 24 - SEBR SÕNGO, 1998 bible

A Zeremi 24

¹Babilond dĩm a Nebukatnedzaar sẽn yõk Zʋʋda rĩm a Yoyakim biig a Zekoniya, ne Zʋʋda nanambsã la tʋʋm-mitbã ne sãabã n yiis Zeruzalɛm n tall n kẽng Babilondã poore, Sẽn-Ka-Saab wilga maam kankam pet a yiib sẽn dɩg Sẽn-Ka-Saab roogã noore.

²Peoog a yembr kankam dag n yaa sõama wʋsgo, n yaa wa dẽenem biisi.

³La peoog a yembrã kankam dag n yaa põaas tɩ ned ka tõe n dɩ ye. Sẽn-Ka-Saab soka maam yaa: «Zeremi, fo nee bõe?» La mam leokame tɩ m nee kankam pet a yiibu, tɩ peoog a yembrã kankam yaa sõama wʋsgo, t'a yembrã kankam yaa põaas tɩ ned ka tõe n dɩ ye.

⁴La Sẽn-Ka-Saab goma ne maam:

⁵«Ade, Sẽn-Ka-Saab sẽn yaa Israyɛll Wẽnnaamã yetame yaa: ‹Mam geta Zʋʋda neb nins b sẽn yõg zĩ-kãngã n tall n kẽng Kalde nebã tẽngẽ wã wa kankam-kãensã sẽn yaa sõama wã.

⁶Mam na n gesame tɩ b paam vɩ-noogo, la m kɩt tɩ b lebg n wa tẽn-kãngã. Mam na n vigl-b lame, m ka na n sãam-b ye. Mam na n sel-b lame, m ka na n võ-b ye.

⁷Mam na n kõo bãmb yam tɩ b bãng tɩ mam yaa Sẽn-Ka-Saabo. Bãmb sã n lebg n wa mam nengẽ ne b sũur fãa, b na n yɩɩ mam neba, la mam na n yɩɩ bãmb Wẽnnaam.› »

⁸Sẽn-Ka-Saab yetame: «Mam na n maana Zʋʋda rĩm a Sedesiyaas ne a nanambsã la Zeruzalɛm neb nins sẽn kell n zĩnd tẽn-kãngã pʋgẽ wã, ne sẽn be-b Ezɩpt tẽngã, wa kankam nins sẽn põog tɩ ned ka tõe n dɩ wã.

⁹Mam na n kɩtame tɩ b lebg pelen-yɩk la yel-beed dũniyã soolem-dãmbã fãa yĩnga. Zĩig ning fãa mam sẽn na n dig bãmb tɩ b kẽnge, b na n paooga bãmba, la b na n lebga yel-bũndi. B na n yaala bãmb la b kãab-b wẽnga.

¹⁰Mam na n kɩtame tɩ zabr sʋʋg ne kom la bã-longds kʋ bãmb tɩ b menem dũniyã, n ka leb n zĩnd tẽng ning mam sẽn kõ bãmb ne b yaab-rãmbã pʋgẽ ye.»