Read SEBR SÕNGO, 1998 A Zeremi 25 Bible Online

A Zeremi 25 - SEBR SÕNGO, 1998 bible

A Zeremi 25

¹Ad koɛɛg ning Sẽn-Ka-Saab sẽn kõ a Zeremi Zʋʋda nebã fãa wɛɛngẽ. Yɩɩ Zʋʋda rĩm a Zoziyaas biig a Yoyakim sẽn deeg naam tɩ yʋʋm naaslẽ, sẽn yaa Babilond dĩm a Nebukatnedzaar naamã reegr pipi yʋʋmdã.

²Wẽnnaam no-rɛɛs a Zeremi yalsa Zeruzalɛm nebã fãa taoore, n togs koɛɛg Zʋʋda nebã fãa wɛɛngẽ n yeele:

³«Zʋʋda rĩm a Amon biig a Zoziyaas sẽn deeg naam tɩ yʋʋm piig la a tãablẽ tɩ ta rũndã, yaa yʋʋm pisi la a tãab la Sẽn-Ka-Saab gom ne maam. Mam togs-a-la yãmb n ka bas ye. Mam togs-a-la yãmb la y ka kelg ye.

⁴Sẽn-Ka-Saab tʋma b tʋmtʋmdbã sẽn yaa bãmb no-rɛɛsdbã yãmb nengẽ, b leb n tʋm-b lame n ka bas ye, la yãmb ka kelg ye. Yãmb ka yok y tʋbr n kelg ye.»

⁵Bãmb no-rɛɛsdbã rag n yetame: «M kotame tɩ yãmb ned kam fãa bas a manesem-wẽngã ne a tʋʋm-wẽnsã, la y na n zĩnda tẽng ning Sẽn-Ka-Saab sẽn dag n kõ yãmb ne y yaab-rãmbã hal daar zãr zamaan woo zamaanã.

⁶Ra tũ-y buud a taab wẽnnaam-dãmb n waoog-ba, la ra wõgemd-y n waoog-y-b ye. Ra sãam-y mam sũur ne y nusã tʋʋm ye. Woto, m ka na n maan-y bũmb ye.

⁷La yãmb ka kelg maam ye. Yãmb yika mam sũur tɩ m sɩbg yãmb y nusã tʋʋmã, n kɩt tɩ toog paam-yã. Maam a Sẽn-Ka-Saab n yeele.»

⁸Woto yĩnga, Saasẽ-Pãng-Soabã yetame: «Yãmb sẽn kɩɩs n ka sak m goamã yĩnga,

⁹mam na n kɩtame tɩ buud nins fãa sẽn be wĩntoog sẽn lʋɩtẽ dɩtgã, ne Babilond dĩm a Nebukatnedzaar sẽn yaa m tʋmtʋmdã, wa zab ne tẽn-kãngã nebã, la ne buud nins sẽn gũbg-a wã. Mam na n menesa bãmb n kɩt tɩ tẽngã lebg zĩ-vɩʋʋg wakat fãa yĩnga, tɩ neb sã n yãnd-a, bɩ b yɛɛs n fɩɩle.

¹⁰Mam na n kɩtame tɩ sũ-noog kɩdengo, la sũ-noog yɩɩl sɛ b sʋka. B ka na n leb n wʋm pʋg-paal ne pʋg-paal sɩd yɩɩl rãamd ye. B kõn leb n wʋm neer werb rãamd ye, la b kõn leb n yãnd fɩtl bugum ye.

¹¹Tẽn-kãngã fãa na n lebga raboogo, zĩ-vɩʋʋgo, la b na n yõga bu-kãensã n tɩ kẽes yembd Babilond yʋʋm pis-yopoe.

¹²La yʋʋm pis-yopoe wã sã n wa n pidi, mam na n sɩbga Babilond dĩmã ne soolem-kãng nebã b beegrã yĩnga. La m na n maana Kalde nebã tẽng me a woto, n kɩt t'a lebg zĩ-vɩʋʋg wakat fãa yĩnga. Maam a Sẽn-Ka-Saab n yeele.

¹³Mam na n kɩtame tɩ bũmb nins fãa mam sẽn dag n yeel tẽn-kãngã wɛɛngẽ tɩ b gʋls seb-kãngã pʋgẽ wã paam-a. Yaa Wẽnnaam no-rɛɛs a Zeremi sẽn dag n togs pĩnd-n-bãngr nins soolem-dãmbã wɛɛngẽ wã.

¹⁴Bala, buud sẽn tar pãens ne rĩm-kãsems na n sooga bãmba, la mam na n lebsa bãmb me wa sẽn zems b manesmã ne nusã tʋʋmã.»

¹⁵Bala, Sẽn-Ka-Saab sẽn yaa Israyɛll Wẽnnaamã yeela maam yaa: Reeg reezẽ rãam wam-kãngã sẽn be mam nugẽ, n pid ne sũ-puugr dãamã, n tɩ yũnug buud nins fãa mam sẽn tʋmd foom b nengẽ wã.

¹⁶Bɩ bãmb yũ n tuum la b zʋbse, zabr sʋʋgã mam sẽn tʋmd b sʋkã yĩnga.

¹⁷Dẽ, mam deega wamdã Sẽn-Ka-Saab nugẽ n tɩ yũnug buud nins fãa Sẽn-Ka-Saab sẽn dag n tʋm maam b nengẽ wã.

¹⁸Mam sɩnga ne Zeruzalɛm ne Zʋʋda tẽmsã, ne Zʋʋda rĩm-dãmbã ne a nanambsã, n kɩt tɩ b lebg ra-boodo, la zĩ-vɩɩdo, tɩ nebã sã n yãnd-b bɩ b yɛɛs n fɩɩle, a kãab-wẽngã yĩnga. Yaa rẽ n kɩt t'a ket n yaa woto hal tɩ ta rũndã.

¹⁹Sẽn pʋgd yaa bu-kãensã: Ezɩpt rĩm a Faarõ ne a tʋmtʋmdbã la a nanambsã, ne a nebã fãa,

²⁰la sãambã fãa sẽn be Ezɩptã, ne Uts tẽng rĩm-dãmbã fãa, la Filistẽ nebã rĩm-dãmb nins sẽn be Askelon ne Gaaza, la Ekron ne Asdood zĩis nins sẽn ketã,

²¹la Edom ne Moaab la Amo nebã,

²²ne Tɩɩr la Sɩdõ ne tẽms nins sẽn be ko-kãsengã rʋʋndã rĩm-dãmb fãa,

²³la Dedan ne Tema la Buuz tẽmsã nebã, ne neb nins sẽn kõogd b yɛɛmã,

²⁴la Arabi rĩm-dãmbã ne neb nins sẽn be we-raoogã pʋgẽ wã rĩm-dãmb fãa,

²⁵ne Zimri la Elam ne Medi rĩm-dãmbã fãa,

²⁶la rĩm-dãmbã fãa sẽn be tẽms nins sẽn be rɩtgã, sẽn pẽ-ba, la sẽn zãr-b ne taabã, la soolem nins fãa sẽn be dũniyã zugã. La sẽn na n yɩ-a yaoolem soab n yũ yaa Babilond dĩmã.

²⁷Yeel bãmb tɩ Saasẽ-Pãng-Soabã sẽn yaa Israyɛll Wẽnnaamã yetame: Yũ-y-yã! Yũ-y tɩ y nens yilim tɩ y wʋbe, n lʋɩ n da leb n yik ye, y sẽn yã zabr sʋʋgã mam sẽn tʋm y sʋkã yĩnga.

²⁸«La bãmb sã n zãgs tɩ b ka na n deeg wamdã sẽn be fo nugẽ wã n yũ, bɩ f yeel-b tɩ Saasẽ-Pãng-Soabã yetame: ‹Yaa tɩlɛ tɩ y yũ! Y na yũ-a lame!›

²⁹Bala, mam na n sɩnga toogã ne tẽng ning b sẽn boond mam yʋʋrã a pʋgẽ wã. La yãmb tẽedame tɩ b na n basa yãmb taal bɩ? B ka na n bas-y taal ye, mam sẽn na n kɩt tɩ zabr zĩnd dũniyã nebã fãa zugã yĩnga. Maam a Saasẽ-Pãng-Soabã n yeele.»

³⁰Woto yĩnga, bɩ foom a Zeremi togs-b pĩnd-n-bãngr goam bõn-kãensã fãa wɛɛngẽ n yeel-b yaa: «Sẽn-Ka-Saab bee yĩngr n tãsdẽ, b be b zĩ-sõngẽ wã n zẽkd-b koɛɛga. Bãmb be b zĩigẽ wã n tãsdẽ. Bãmb zẽkda b koɛɛg n kaasd wa neb sẽn wobd reezẽ, reezẽ wobr wakate, la wa neb sẽn tabd reezẽ, reezẽ wẽkr koglg pʋgẽ, n zabd ne dũniyã nebã fãa.

³¹Bʋrg n sãt n tat dũniyã tɛk fãa. Bala, Sẽn-Ka-Saab tara yell ne buudã fãa, bãmb yika bʋʋd ne bãmb fãa. Bãmb kɩtame tɩ b kʋʋd nin-wẽnsã ne zabr sʋʋga. Maam a Sẽn-Ka-Saab n yeele.»

³²Saasẽ-Pãng-Soabã yetame: «Toog paamda buud a ye, n long a to. Sob-kẽeng n yi dũniyã zĩ-zãrsẽ n watẽ.

³³Badaare, Sẽn-Ka-Saab sẽn kʋ neb ninsã kũum na n dʋra tẽng dũniyã kɩreng a yembr n tɩ tãag kɩreng a to. B ka na n yãb b yĩng ye. La b ka na n tigim-b zĩ-yɛnga, la b ka na n dɩk-b n mum ye. Bãmb na n lebga põosg tẽn-gãongã yĩnga.

³⁴Nanambse, zẽk-y y koees n yãbe! Gãand-y tom pʋgẽ n bilme! Bala, wakat taame tɩ b na n kood yãmb n yʋlme. Yãmb na n lʋɩɩ wa laok sẽn tar yõodo.

³⁵Soondg zĩig ka leb n be nanambsã yĩng ye! Nebã taoor dãmb ka leb n tar b sẽn kẽedẽ ye.

³⁶Kelg-y nanambsã kelemse! Kelg-y nebã taoor dãmb kaasgo! Bala, Sẽn-Ka-Saab sãama zĩig ning b sẽn dag n dɩlgd b nebã.

³⁷Sẽn-Ka-Saab sũ-yikrã yĩng kɩtame, tɩ bãmb tẽngã zĩ-sõamy wã lebga sɩddd...

³⁸Sẽn-Ka-Saab basa bãmb tẽngã, wa gɩgem-poll sẽn bas a gãag zĩiga. Bala, Sẽn-Ka-Saab sũ-yikrã sẽn wat ne sãoongã yĩnga, bãmb sũ-puug-kãsengã kɩtame tɩ b tẽngã lebg zĩ-vɩʋʋgo.»