Read SEBR SÕNGO, 1998 A Zeremi 27 Bible Online

A Zeremi 27 - SEBR SÕNGO, 1998 bible

A Zeremi 27

¹Zʋʋda rĩm a Yoyakim biig a Sedesiyaas naamã sɩngr wakate, Sẽn-Ka-Saab togsa a Zeremi gom-kãngã:

²Ade, Sẽn-Ka-Saab yeela maam: «Maan loets ne balgr ra-tuiids n pid f loorã.

³Maan a taab n tʋm koe-toagsdb nins sẽn wa Zeruzalɛm Zʋʋda rĩm a Sedesiyaas nengẽ wã, tɩ b tɩ kõ Edom dĩmã ne Moaab rĩmã, la Amo nebã rĩmã ne Tɩɩr dĩmã, la Sɩdõ rĩmã.»

⁴Yeel koe-toagsdbã tɩ b tɩ yeel b soaadbã yaa: «Ad Saasẽ-Pãng-Soabã sẽn yaa Israyɛll Wẽnnaamã sẽn yeta: Kẽng-y n tɩ yeel-y y soaadbã yaa:

⁵‹Yaa maam n tẽeg m nug n naan dũniyã ne ninsaalbã la rũmsã sẽn be a pʋgẽ wã ne m pãn-kãsengã, la m dɩkda dũniyã n kõt soab ning sẽn ta-a mam yam.

⁶Moasã, mam dɩka tẽn-kãensã fãa n ning Babilond dĩm a Nebukatnedzaar sẽn yaa mam tʋmtʋmdã nugẽ. Mam dɩka baa we-rũmsã n ning yẽnda nugẽ t'a soog-ba.

⁷Buud toay-toayã fãa na n saka yẽnda ne a biigã la a yagengã, hal n tãag wakat ning yẽnda me tẽngã sẽn na n sak buud a taab sẽn tar pãng ne rĩm-kãsemsã.

⁸Buud wall soolem sã n yeel t'a ka sak t'a Nebukatnedzaar soog-a, mam na n sɩbga bu-kãng ne zabr sʋʋga, la ne kom la bã-longdse. Mam na n sãam-a-la zãng ne mam mengã nugu. Maam a Sẽn-Ka-Saab n yeele.

⁹La sã n yaa ne yãmba, ra kelg-y no-rɛɛsdbã ne y bagbã la neb nins sẽn bilgd-b yãmb y zãmsd toay-toayã võorã, ne sẽn sogsd-b kɩɩmsã, la sẽn boond-b sɩɩsã ye. Bãmb yeta yãmb tɩ Babilond dĩmã ka na n soog yãmb ye.

¹⁰La b sẽn yaool n yet yãmbã yaa zĩrẽ pĩnd-n-bãngr goamã, n dat n zãag yãmb ne y tẽngã, tɩ mam dig yãmb n menes-yã.

¹¹La tẽng ning sẽn na n sak-a tɩ Babilond dĩmã balg a yublã la a sak n tũ a raabo, mam na n bas-a lame t'a zĩnd a tẽngẽ ne bãane, n ko. Maam a Sẽn-Ka-Saab n yeele.› »

¹²Yaa koe-kãng me la mam dag n togs Zʋʋda rĩm a Sedesiyaase: Sak-y tɩ Babilond dĩmã balg y yublã. Sak-y tɩ yẽnda ne a nebã soog-yã, tɩ y paam n vɩɩmde!

¹³Bõe yĩng tɩ f na n bas tɩ zabr sʋʋg ne kom la bã-longds kʋ foom ne f nebã? Bõn-kãens n yaool n na n paam buud ning sẽn na n zãgs-a n ka sak tɩ Babilond dĩmã soog-a wã, wa Sẽn-Ka-Saab sẽn yeelã.

¹⁴Da kelg-y no-rɛɛsdb nins sẽn yet tɩ Babilond dĩmã ka na n soog yãmbã ye. Bala, b sẽn togsd yãmbã yaa zĩrẽ pĩnd-n-bãngr goamã!

¹⁵Ka maam n tʋm bãmb ye. Bãmb yetame tɩ b gomda ne mam yʋʋre, la ka sɩd ye. B maanda a woto, n dat tɩ mam dig yãmb n menes yãmb ne neb nins sẽn togsd yãmb pĩnd-n-bãngr gom-kãensã wã. Maam a Sẽn-Ka-Saab n yeele.

¹⁶Mam yeela maan-kʋʋdbã ne nin-bãmbã fãa tɩ Sẽn-Ka-Saab yetame: «Da kelg-y no-rɛɛsdb nins sẽn yet yãmb tɩ sã n yɩ bilfu, b na n talla Sẽn-Ka-Saab roogã teed sẽn be Babilondã n wa ka wã goam ye. Bãmb sẽn togsdã yaa zĩrẽ pĩnd-n-bãngr goamã.

¹⁷Da kelg-y bãmb ye. Sak-y Babilond dĩmã noore, n paam n vɩɩmde. Bõe yĩng tɩ y na n bas tɩ tẽn-kãngã lebg raboogo?»

¹⁸A Zeremi leb n yeelame yaa: «Nin-kãensã sã n yaa no-rɛɛsdb hakɩɩka, la sã n sɩd yaa Sẽn-Ka-Saab n gom ne bãmba, bɩ b yõk Saasẽ-Pãng-Soabã sɛɛga, tɩ b ra sak tɩ b tall teed nins sẽn pa Sẽn-Ka-Saab roogẽ wã, ne Zʋʋda rĩmã na-yirã, la Zeruzalɛm pʋgẽ wã, n kẽng Babilond ye.

¹⁹Bala, ad Saasẽ-Pãng-Soabã sẽn yete, sẽn kẽed ne ra-lugdsã ne sĩn-bedrã la rogendsã, ne teed a taabã sẽn pa Zeruzalɛm pʋgẽ wã wɛɛngẽ.

²⁰Yaa teed nins Babilond dĩm a Nebukatnedzaar sẽn dag n base, wakat ning a sẽn yõk Zʋʋda rĩm a Zekoniya sẽn yaa a Yoyakim biigã, la Zʋʋda ne Zeruzalɛm kãsem-dãmbã fãa, n tall n kẽng Babilondã.

²¹Ad Saasẽ-Pãng-Soabã sẽn yaa Israyɛll Wẽnnaamã sẽn yeta, teed nins sẽn pa Sẽn-Ka-Saab roogẽ wã ne Zʋʋda rĩmã na-yirã la Zeruzalɛm pʋgẽ wã wɛɛngẽ:

²²‹B na n talla te-bãmb fãa n kẽng Babilonde, la b na n paa be, hal n tãag daar ning mam meng sẽn na n tall-b n lebg n wa zĩ-kãngã.› Maam a Sẽn-Ka-Saab n yeele.»