Read SEBR SÕNGO, 1998 A Zeremi 31 Bible Online

A Zeremi 31 - SEBR SÕNGO, 1998 bible

A Zeremi 31

¹Sẽn-Ka-Saab yetame: «Wakat-kãnga, mam na n yɩɩ Israyɛll buud toay-toayã fãa rĩmã, la bãmb na n yɩɩ mam nebã.

²Ade, maam a Sẽn-Ka-Saab yetame: ‹Mam wilga m nonglem ne neb nins sẽn põs zabr sʋʋg n be we-raoogẽ wã. Israyɛll nebã kẽnd n dabda vʋʋsg zĩigẽ.›

³Sẽn-Ka-Saab zĩnda yɩɩg n puk b meng ne maam n yeele: ‹Mam nonga foom ne nonglem sẽn ka sɛta. Rẽ kɩtame tɩ mam na n nong foom n ka basdẽ ye.

⁴Israyɛll tẽn-neere, mam na n lebs n mee foom, b na n lebs n me-f lame yɛsa. Fo na n leb n dɩka f gãngãado, n yi n saoodẽ la f laadẽ.

⁵Fo na n leb n sela reezẽ tɩɩs Samaari tãmsã zutu. Neb nins sẽn na n sel tɩɩsã na n dɩ b yõodo.›

⁶Bala, wakat n wate, tɩ gũudbã na n kelem Efrayiim soolem ning sẽn be tãms sʋkã n yeele: ‹Wa-y tɩ d kẽng Sɩyõ, Sẽn-Ka-Saab sẽn yaa tõnd Wẽnnaamã nengẽ!› »

⁷Bala, ad Sẽn-Ka-Saab sẽn yeta: Kaas-y ne sũ-noog a Zakoob yagensã yĩnga. Kɩdm-y n yɩɩg-y buud toay-toayã fãa! Zẽk-y y koees n pẽg Sẽn-Ka-Saab n yeele: Sẽn-Ka-Saabo, fãag-y y nebã! Fãag-y Israyɛll bu-kellã!

⁸Mam tara bãmb n yit wĩntoog sẽn lʋɩtẽ dɩtg tẽngã n watẽ. Mam yiisa bãmb dũniyã kɩremsã fãa n wat n na n tigme. Bãmb sʋkã, zoense, koms-rãmba, pagb sẽn tʋte, ne pagb sẽn kũmd dogem na n zĩnda be. Yaa bu-kãseng n lebg n wat zĩ-kãngã.

⁹Bãmb watame la b yãbda, la m tɛta bãmb b se-yõkrã pʋga Mam tɛta bãmb so-tɩrg b sẽn ka tõe n lak n lʋɩ zugu, n dabd ko-zoetem zĩisẽ. Bala, mam lebga ba Israyɛll nebã yĩnga, la a Efrayiim yaa mam bi-rẽenga.

¹⁰Buud toay-toayã fãa, kelg-y Sẽn-Ka-Saab goamã, la y moon-a tẽn-zãrsã sẽn be koom sʋkã nebã n yeele: «Soab ning sẽn sãeeg-a Israyɛll nebã na n lebg n tigim-b lame, la b na n gũu Israyɛll nebã wa pe-kɩɩm sẽn gũud a piisi.

¹¹Bala, Sẽn-Ka-Saab n fãagd a Zakoob yagensã, n deegd bãmb neb sẽn tar pãng n yɩɩd bãmbã nugẽ.

¹²Bãmb na n waame, n kaas ne sũ-noog Sɩyõ tãngã zugu. Bãmb na n kaoog n wa reega bõn-sõamy nins Sẽn-Ka-Saab sẽn segl b yĩngã: ‹Yaa koodo, reezẽ rã-paalga, ka-paalga, la rũm-bãooneg ne rũm-bɛda. Bãmb vɩɩmã na n yɩɩ wa zẽed zĩig sẽn paam koom tɩ seke. Bãmb pãng kõn tol n leb n sɛ ye.›

¹³Dẽ, pʋg-sadb na n saoome n maan sũ-noogo. Kom-bɩɩs ne nin-kẽemb na n naaga taab n maan sũ-noogo. Mam na n kɩtame tɩ b sũ-sãangã lebg kɩdengo, la m na n bels-b lame. Bãmb toogã poore, mam na n kõ-b-la sũ-noogo.

¹⁴Mam na n kɩtame tɩ maan-kʋʋdbã paam nem-kaam n wãb n tɩge, la m na n tɩgsa m nebã ne m bõn-neebã. Yaa maam a Sẽn-Ka-Saab n yeele.»

¹⁵Sẽn-Ka-Saab yetame: «B wʋmda kelems sẽn yit Rama, yaa sũ-toog kelemse. Yaa a Rasɛll n yãbd a kambã yĩnga. A kambã kaalem yĩnga, a ka sakd belsg ye.»

¹⁶Sẽn-Ka-Saab yetame: «Sĩnd la f ra leb n yãb ye. Yẽes f nintãm. Bala, f na n paama keoor f tʋʋmã yĩnga. Maam a Sẽn-Ka-Saab yetame: Fo kambã na n yii b bɛɛbã tẽngẽ n lebg n wa.»

¹⁷Sẽn-Ka-Saab yetame: «Tẽeb ket n bee fo beoog vɩɩmã yĩnga. Fo kambã na n lebg n wa b soolmẽ wã.

¹⁸Mam wʋmda Efrayiim buudã sẽn yẽgemd n yetẽ: Yãmb demsa tõndo, la d saka remsgã wa nag-bil sẽn ka yã wõrbo. Tall-y tõnd n lebg n wa, la d na n sak n waame. Bala, yãmb yaa Sẽn-Ka-Saab sẽn yaa tõnd Wẽnnaam.

¹⁹Tõnd sẽn wẽnemd n bas yãmbã, d maanda d bãngẽ. Yãmb sẽn kɩt tɩ tõnd bãng d kongrã, tõnd sũur sãamame tɩ d pĩis d gɛya. Yãnd tara tõnd tɩ d zut surẽ, bala, tõnd bi-bɩɩlem wakatẽ paoogrã ket n be d zugu.

²⁰A Efrayiim yaa mam bi-nongre, Mam nonga yẽnda ne m sũur fãa. Mam sã n gomd a yelle, m ket n tagsda a yelle. Yaa rẽ n kɩt tɩ rogem yĩn-sidg tar maam a yĩnga. Yaa sɩda, a nimbãaneg tara maam. Maam a Sẽn-Ka-Saab n yeele.»

²¹Israyɛll nebã, ning-y y bãnã, lug-y y sor wilgdsã! Ges-y y sorã, Tags-y sor ning yãmb sẽn tũudã yelle. Israyɛll tẽn-neere, lebg n wa tẽn-kãensã sẽn yaa fo rẽndã pʋse!

²²Bi-tõtre, fo na n yeeba a woto tɩ ta dabʋre? Bala, bõn-paalg la Sẽn-Ka-Saab maan dũniyã zugu. Pag n baood rao a toore!

²³Saasẽ-Pãng-Soabã sẽn yaa Israyɛll Wẽnnaamã yetame: mam sã n wa lebs n maneg Israyɛll nebã yelle, ad b sẽn na n leb n gom goam nins Zʋʋda tẽmsã pʋsẽ: Sɩyõ tãn-sõng sẽn yaa tɩrlem zĩiga, bɩ Sẽn-Ka-Saab ning fo zug barka!

²⁴Koaadbã ne rũm-gũudbã na n zĩnda Zʋʋda ne a tẽmsã fãa pʋsẽ.

²⁵Bala, mam kõta sẽn yɛ-bã koom tɩ b yũ, la m tɩgsda neb nins pãng sẽn sɛ wã.

²⁶Dẽ zugẽ, mam nekame, la m gõeemã yɩ-m-la noogo.

²⁷Maam a Sẽn-Ka-Saab yetame: «Wakat n wate, tɩ mam na n pids Israyɛll ne Zʋʋda tẽmsã ne neb la rũmsi.

²⁸Mam sẽn dag n gũus bãmb n võ-b la m pãb-b n wã, la m sãam-b la m menes-bã, n kɩt tɩ toog paam-bã, woto me, mam na n gũus-b lame, n lebs n me-b la m sel-ba. Maam a Sẽn-Ka-Saab n yeele.»

²⁹Wakat-kãnga, b ka na n leb n yeele: «Ba-rãmb dɩɩ reezẽ-kãse, tɩ kamb yẽn deeg n zãab» ye.

³⁰Ned kam fãa na n ki a meng kongr yĩnga. Ned ning sẽn dɩ-a reezẽ-kãse, a meng yẽn n na n zãabe.

³¹ Sẽn-Ka-Saab yetame: «Ade, wakat n wate, tɩ mam na n maan kaool-paalg ne Israyɛll buudã, la ne Zʋʋda buudã.

³²La ka na n yɩ wa kaool ning mam sẽn dag n maan ne b ba-rãmbã, daar ning mam sẽn gãd bãmb nus n tall-b n yiis Ezɩpt tẽngã ye. Bãmb sãama kaool-kãngã, baa ne mam sẽn yaa bãmb Zu-soabã. Maam Sẽn-Ka-Saab n yeele.

³³La ad kaool ning mam sẽn na n maan ne Israyɛll nebã sẽn na n yɩ to-to da-kãens loogr poore: Ka na n leb n yɩ kug-wals zut la mam na n gʋls m tõodã ye. Mam na n ning-b-la bãmb pʋ-tẽerẽ, mam na n gʋls-b-la b sũyã pʋse. Mam na n yɩɩ bãmb Wẽnnaam, la bãmb na n yɩɩ mam nebã. Maam a Sẽn-Ka-Saab n yeele.

³⁴Tẽngã pʋgẽ, ned ba a yembr ka na n leb n zãms a to ye. Ned ka na n zãms a ba-biiga, n yeel-a t'a sak Sẽn-Ka-Saab noorã ye. Bala, b fãa na n saka maam, sẽn sɩng ne sẽn yaa-a bilf n yɩɩd bãmb sʋkã, tɩ ta sẽn yaa-a kãseng n yɩɩdã. Mam na n kõo bãmb sugr b kongrã yĩnga, mam ka na n leb n tẽeg b yel-wẽnã yell ye.» Sẽn-Ka-Saab n yeele.

³⁵Ade, Sẽn-Ka-Saab sokdame: «Ãnda n kɩt tɩ wĩndgã beẽ, n kõt vẽenem wĩntoogo? Ãnda n kɩt tɩ kiuugã ne ãdsã vẽenem yãgd yʋngo? Ãnda n kɩt tɩ ko-kãsengã rãmbdẽ, t'a ko-wĩisã tãoosdẽ? Yaa soab ning yʋʋr sẽn boond tɩ Saasẽ-Pãng-Soabã.»

³⁶Sẽn-Ka-Saab yetame: «Mam sã n wa sak tɩ tõ-kãensã mam sẽn vigl tɩ be wakat fãa wã ka leb n beẽ, Israyɛll nebã me kõn leb n yɩ mam buud wakat fãa ye.»

³⁷Maam a Sẽn-Ka-Saab yetame: «B sã n tõog n mak yĩngrã n bãng a zãntlem, la b tõog n mak tẽn-gãongã n bãng a zulum, mam me na bas Israyɛll yagensã fãa, bũmb nins fãa b sẽn maanã yĩnga.» Maam a Sẽn-Ka-Saab n yeele.

³⁸Sẽn-Ka-Saab yetame: Wakat n wate, tɩ nebã na n lebs n me Zeruzalɛm tẽngã Sẽn-Ka-Saab yĩnga, sẽn sɩng ne Hananeyɛll gãosgã n tãag rignoor ning sẽn be tẽngã lalg gõdrẽ wã.

³⁹B na n sõoga tẽngã toadg n tãag Garɛɛb kũnkubgã, n wẽnemd n tees Gowate.

⁴⁰Sẽn sɩng ne kũum ne maand tompeglem longã zãnga, ne zĩ-koodsã fãa n tall n tãag Sedrõ ko-soogã, ne tẽngã lalg gõdr sẽn be wiidã rignoorã sẽn be yaang sẽnẽ wã na n welga toor maam a Sẽn-Ka-Saab yĩnga. B kõn tol n leb n võog wall b siig bũmb ba a yembr beenẽ ye.