Read SEBR SÕNGO, 1998 A Zeremi 32 Bible Online

A Zeremi 32 - SEBR SÕNGO, 1998 bible

A Zeremi 32

¹Sẽn-Ka-Saab goma ne a Zeremi wakat ning Zʋʋda rĩm a Sedesiyaas sẽn deeg naam tɩ yʋʋm piilẽ, la wakat ning a Nebukatnedzaar sẽn deeg naamã tɩ yʋʋm piig la a niinẽ wã.

²Wakat-kãnga, Babilond dĩmã tãb-biis rag n kẽng n tɩ gũbga Zeruzalɛm, la rẽ tɩ Zʋʋda rĩm a Sedesiyaas rag n kɩtame tɩ b yõk no-rɛɛs a Zeremi n pag rĩmã na-yiri, gũudbã zakẽ.

³Zʋʋda rĩm a Sedesiyaas yõka a Zeremi n page. Bala, rĩmã yeelame tɩ bõe yĩng t'a Zeremi togs pĩnd-n-bãngr goam n yeel tɩ Sẽn-Ka-Saab yeelame tɩ b na n basa tẽn-kãngã Babilond dĩmã nugẽ t'a soog-a.

⁴Zʋʋda rĩm a Sedesiyaas kõn põs Kalde rãmbã ye. B na n basa yẽnda Babilond dĩma nugẽ. Yẽnda na n yalsa Babilond dĩmã taoore, t'a gom ne yẽnda neng ne nenga.

⁵Dẽ zugẽ, b na n talla a Sedesiyaas n kẽng Babilonde, t'a pa beenẽ n ta wakat ning mam sẽn na n wa ges a yelle. Yãmb sã n yik zabr ne Kalde rãmbã, y kõn tõog-b ye. Yaa Sẽn-Ka-Saab n yeele.

⁶La a Zeremi yeelame: Sẽn-Ka-Saab goma ne maam n yeele:

⁷«Fo baaba-bil a Salum biig a Hananeyɛll na n wa yãnda foom n yeel tɩ f ra a pʋʋgã sẽn be Anatotã, tɩ foom bal n tar noor tɩ ra-a.»

⁸Mam baaba-bilã biig a Hananeyɛll sɩd waa mam nengẽ, wa Sẽn-Ka-Saab sẽn dag n yeel maam gũudbã zakẽ wã, n yeel maam yaa: «Ra m pʋʋgã sẽn be Anatote, Benzame buudã tẽngẽ wã, bala, foom bal n tar noor tɩ ra-a. Dẽ yĩngã, m kot-f lame tɩ f ra-a tɩ yɩ f soolem.» Dẽ, mam bãngame tɩ rag n sɩd yaa Sẽn-Ka-Saab koɛɛga.

⁹Dẽ, mam daa pʋʋgã sẽn be Anatotã ne a Anameyɛlle, n yao wanzuri wakɩ-koeems piig la a yopoe.

¹⁰Mam gʋlsa raab kaset sebre, n pag-a n ning m nug-tikr bãnd a zugu. Mam baoo neb tɩ b wa yɩ kaset dãmba, la m mak ligdã ne zɩslem makdga.

¹¹Dẽ poore, mam dɩka raabã kaset sebrã m sẽn pag n ning m nug-tikr bãnd a zugu, tɩ noyã ne no-gãnegdɩ wã be a pʋgẽ wã, ne raabã kaset seb-yiibingã sẽn dag n ka pagã,

¹²n kɩs a Baruk sẽn yaa a Neriya biiga, n yaa a Maaseya yagengã. Ad neb nins sẽn dag n be beenẽ wã: yaa mam baaba-bilã biig a Anameyɛlle, ne kaset dãmbã sẽn dag n tik b nus raabã kaset sebr zugã, n paas Zʋʋda neb nins sẽn dag n be gũudbã zakẽ wã.

¹³Mam kõ a Baruk noor nin-bãmbã fãa taoor n yeel-a yaa:

¹⁴Saasẽ-Pãng-Soabã sẽn yaa Israyɛll Wẽnnaamã yetame: «Reeg seb-kãensã sẽn yaa raabã kaset sebrã sẽn pagã, ne sebr ning sẽn pakã, n ning-b tãnd laok pʋgẽ, tɩ b tõe n kaoose.

¹⁵Bala, Saasẽ-Pãng-Soabã sẽn yaa Israyɛll Wẽnnaamã yetame: B na n leb n daa rot ne pʋto, la reezẽ tɩɩs pʋt tẽn-kãngã pʋgẽ.»

¹⁶Mam sẽn kɩs a Neriya biig a Baruk raabã kaset sebrã zugẽ, mam pʋʋsa Sẽn-Ka-Saab n yeele:

¹⁷«Wẽnnaam Sẽn-Ka-Saabo, yãmb n tẽeg y nug n naan yĩngr la tẽng ne y pãn-kãsengã. Bũmb ka be yãmb sẽn ka tõe ye.

¹⁸Yãmb wilgda y nonglem hal n tãag zamaan tusri, la y sɩbgd kamb b ba-rãmb beegr yĩnga. Yãmb yaa Wẽnnaam-kãsenga, y yaa gãndaoogo. Y yʋʋr yaa Saasẽ-Pãng-Soaba!

¹⁹Yãmb saagrã yaa kãsemse, la y tʋʋm-kãsemsã tara ra-sãnde. Yãmb puka y nin n get ninsaalbã fãa, la y ronda ned kam fãa wa sẽn zems a yel-manesem, la wa sẽn zems a tʋʋmã biisi.

²⁰Ezɩpt tẽngã pʋga, yãmb maana bãn ne bõn-yɛɛsdse, la y ket n maand-b-la baa ne rũndã, Israyɛll pʋgẽ, ne ninsaalbã fãa sʋka, tɩ y yʋʋrã saag zĩigã fãa. Yaa rẽ n kɩt tɩ ket n yaa a woto hal tɩ ta rũndã.

²¹Yãmb tẽega y nug n maan bãn ne bõn-yɛɛsdse, n yiis Israyɛll sẽn yaa yãmb nebã Ezɩpt ne y pãn-kãsengã, n kẽes nebã rabeem-kãsenga.

²²Yãmb kõ-b-la tẽng ning y sẽn dag n wẽen tɩ y na n kõ b yaab-rãmbã. Yaa tẽng sẽn pid ne bĩisim la sɩɩdo.

²³Bãmb kẽe tẽn-kãng n deeg-a n sooge, la b yaool n ka kelg yãmb koɛɛgã ye. Bãmb ka sak n tũ yãmb tõodã ye. B kɩɩsame n ka maan bũmb nins fãa yãmb sẽn dag n yeel-b tɩ b maanã ye. Yaa rẽ yĩng la y sẽn kɩt tɩ to-kãensã fãa paam-bã.

²⁴B zamda tom-dʋy n na n deeg tẽngã. B na n basa tẽngã Kalde rãmbã sẽn zabd ne-a wã nugẽ. B na n tõog-a-la ne zabr sʋʋga, la ne kom la bã-longdse. Yãmb meng neeme tɩ y sẽn dag n gom bũmb ning yellã pidsg wakat taame.

²⁵La ne rẽ fãa, yãmb a Sẽn-Ka-Saab yeela maam tɩ m da pʋʋg ne ligdi, kaset dãmb taoore, baa ne tẽngã sẽn be Kalde rãmbã nugẽ wã!»

²⁶Sẽn-Ka-Saab yeela a Zeremi yaa:

²⁷«Ade, mam yaa Sẽn-Ka-Saabo, n yaa bõn-vɩɩsã fãa Wẽnnaam. Bũmb ka be sẽn yaa toog ne maam ye.

²⁸Woto yĩnga, mam na n ninga tẽngã Kalde rãmbã ne Babilond dĩm a Nebukatnedzaar nugẽ, t'a soog-a. Maam a Sẽn-Ka-Saab n yeele.

²⁹Kalde rãmbã sẽn zabd ne tẽn-kãngã wã na n kẽ a pʋgẽ, n ning-a bugum. B na n yõo rot nins sẽn tar gãsd tɩ b rag n kɩɩsd maam n dʋʋd b zut n yõogd wisd a Baall yĩnga, la b kõt bu-zẽmsã wẽnnaam-dãmbã bõn-yũudl kũun b pʋsẽ wã.»

³⁰«Sɩd me, Israyɛll ne Zʋʋda nebã maana sẽn yaa wẽng mam nifẽ bal hal b yãadem wakate. Israyɛll nebã yika mam sũurã ne b nusã tʋʋmã.

³¹Sẽn sɩng ne daar ning b sẽn me tẽn-kãngã wã tɩ ta rũndã, mam sũur yika ne tẽn-kãngã, a puuga mam sũuri. Yaa woto tɩ m ka leb n dat n yãnd-a m taoor ye.

³²Wẽng ning fãa Israyɛll ne Zʋʋda nebã sẽn maanã sãama mam sũuri, bãmb ne b rĩm-dãmbã, la b nanambsã, ne b maan-kʋʋdbã, la b no-rɛɛsdbã la Zeruzalɛm ne Zʋʋda nebã.

³³Bãmb ka wẽnemd n tees maam ye, b tuda maam b kãare. Mam ka yɛ ne bãmb zãmsg ye, la b yaool n kɩɩsa maam n ka sak m demsgã ye.

³⁴Bãmb ninga b yel-beedã roog ning b sẽn boond mam yʋʋrã a pʋgẽ wã pʋgẽ, n dẽgm-a.

³⁵Bãmb mee maoong kʋʋb zĩis a Baall yĩnga, Bɛn-Hinom longã pʋga, n dɩkd b kom-pugli ne b kom-dibli n maand maand n kõt b wẽnnaam a Molɛke. Mam yaool n ka yeel-b tɩ b maan bũmb a woto ye. Bũmb a woto zɩ n wa mam tagsgẽ meng ye. Bãmb maana yel-beed a woto, n kɩt tɩ Zʋʋda buudã lʋɩ kongr pʋga.»

³⁶Moasã, ad maam a Sẽn-Ka-Saab sẽn yaa Israyɛll Wẽnnaamã sẽn yeta, tẽn-kãngã yãmb sẽn gomd a yell n yetẽ t'a na n paa Babilond dĩmã nugẽ, tɩ zabr sʋʋg ne kom la bã-longds sãam-a wã:

³⁷«Mam na n yiis-b-la tẽms nins mam sẽn dag n dig-b ne m sũ-yikrã la m sũ-puug-kãsengã tɩ b kẽngã, n wa tigim zĩ-kãngã. Mam na n kɩtame tɩ b zĩnd ne bãane.

³⁸Bãmb na n leb n yɩɩ mam neba, la mam na n yɩɩ bãmb Wẽnnaam.

³⁹Mam na n kɩtame tɩ b paam yam a yembre, la manesem a yembre, tɩ b tõe n zoe maam daar fãa, tɩ bãmb ne b kambã sẽn na n wa led bãmb zĩigẽ wã tõe n vɩɩmd vɩ-noogo.

⁴⁰Mam na n maana kaool sẽn paad wakat fãa ne bãmba, la m kõn leb n wẽnemd n bas bãmb ye. Mam na n maan-b-la neere, la m na n kɩtame tɩ b zoe maam n da wa zãag ne maam ye.

⁴¹Mam na n maan-b-la neer ne sũ-noogo. Mam na n vigla bãmb tẽn-kãngã pʋgẽ kãenkãe ne m sũur fãa la ne m yamã fãa.»

⁴²Bala, Sẽn-Ka-Saab yetame: «Mam sẽn kɩt tɩ yel-be-kãseng a woto fãa paam nin-bãmbã wã, woto me, mam na n maan-b-la neer ning fãa mam sẽn dag n gom b wɛɛngẽ wã.

⁴³Tẽn-kãngã yãmb sẽn yet t'a yaa zĩ-vɩʋʋg tɩ ned wall rũng ka leb n be beenẽ, la y yetẽ t'a na n paa Kalde rãmbã nugẽ wã, b na n daa pʋt a pʋgẽ.

⁴⁴Benzame buudã tẽngẽ, ne Zeruzalɛm tẽn-kɩremsã pʋse, la Zʋʋda tẽmsã pʋse, ne tẽms nins sẽn be tãms sʋkã pʋse, la sẽn be-b kunkub sʋkã pʋse, ne sẽn be-b Negɛɛvã pʋse, b na n daada pʋt ne ligdi, la b gʋlsd raab kaset sɛb n pagdẽ, la b baood kaset dãmba. Bala, mam na n lebs n manega b yellã. Maam a Sẽn-Ka-Saab n yeele.»