Read SEBR SÕNGO, 1998 A Zeremi 38 Bible Online

A Zeremi 38 - SEBR SÕNGO, 1998 bible

A Zeremi 38

¹A Matan biig a Sefatiya ne a Pasewʋʋr biig a Gedaliya, la a Selemiya biig a Yukalle, ne a Pasewʋʋr biig a Malkiya wʋma goam nins a Zeremi sẽn togs nebã fãa wã. Yẽnda rag n yetame:

²«Ade, Sẽn-Ka-Saab yetame tɩ zabre, kom la bã-longds n na n kʋ neb nins sẽn na n pa tẽn-kãngã pʋgẽ wã. La ned ning fãa sẽn na n yi n kẽng Kalde nebã nengẽ ka na n ki ye. A na n vɩɩmdame.»

³A Zeremi leb n yeela nebã tɩ Sẽn-Ka-Saab yetame: «Mam na n basa tẽn-kãngã Babilond dĩmã tãb-biis nugẽ, la a na n deeg-a lame n sooge.»

⁴Dẽ poore, nanambsã yeela rĩmã yaa: «N-na! Kɩt-y tɩ b kʋ rao-kãngã! Bala, yaa yẽnda n boogd tãb-biis nins sẽn ket tẽn-kãngã pʋgẽ wã ne neb a taabã raood ne gom-kãensã. Yẽnda ka rat nebã ne neer ye. A sẽn baood yaa tɩ yel-beed paam-ba.»

⁵Rĩm a Sedesiyaas leoka bãmb yaa: «Yẽnda la woto, a bee yãmb nugẽ. Maam a rĩmã ka tõe n gɩdg yãmb ye.»

⁶Dẽ, nanambsã yõka a Zeremi, n bao wĩy n sik-a rĩmã biig a Malkiya bulgã sẽn be gũudbã zakẽ wã pʋga. La bulgã rag n ka tar koom ye, yaa begd bala. Dẽ, a Zeremi suda begdã pʋga.

⁷Kuus ned a Ebɛɛd-Melɛk sẽn yaa na-yirã sõgena wʋmame tɩ b loba a Zeremi bulg pʋgẽ. La wakat-kãng tɩ rĩmã rag n zĩi tẽngã rignoor ning b sẽn boond tɩ Benzame nebã rignoorã.

⁸La a Ebɛɛd-Melɛk yii na-yirã n kẽng n tɩ yeel dĩmã yaa:

⁹«M dĩma, la m soaala, bũmb nins fãa nin-bãmbã sẽn maan Wẽnnaam no-rɛɛs a Zeremi wã yaa wẽnga. Bãmb yõk-a lame n tɩ lob bulgã pʋgẽ. La rɩɩb sẽn ka leb n be tẽngã pʋgẽ wã yĩnga, a na n kii kom.»

¹⁰Dẽ, rĩmã kõo Kuus rao a Ebɛɛd-Melɛk noor n yeel-a yaa: «Yãk neb pis-tã kaanẽ tɩ b tɩ sõng-f n yiis Wẽnnaam no-rɛɛs a Zeremi bulgẽ wã t'a ra wa ki ye.»

¹¹Dẽ, a Ebɛɛd-Melɛk yãka nebã n kẽng na-yirã laog bĩngr doogã tẽngre, n vaees n yãk fu-kʋda, n naag ne wĩy n sik a Zeremi nengẽ bulgã pʋga.

¹²Kuus rao a Ebɛɛd-Melɛk yeela a Zeremi yaa: «M kotame tɩ f ning fu-kʋd-kãensã f bãg-peedẽ wã, n yaool n dɩk wĩ-kãensã n gaage.» La a Zeremi maana a woto.

¹³Dẽ, bãmb taka a Zeremi ne wĩyã n yiis bulgẽ wã. A Zeremi kell n paa gũudbã zakẽ.

¹⁴Rĩm a Sedesiyaas kɩtame tɩ b tɩ tall Wẽnnaam no-rɛɛs a Zeremi n wa yẽnda nengẽ, Sẽn-Ka-Saab roogã rignoor a tãabẽ soabã noore. La rĩmã yeela a Zeremi yaa: «Zeremi, mam dat n soka foom bũmbu. Ra sak n solg maam bũmb ba a yembr ye.»

¹⁵Dẽ, a Zeremi soka rĩm a Sedesiyaas yaa: «Dẽ yĩnga, mam sã n togs yãmb sɩda, y ka na n kɩt tɩ b kʋ-ma? Mam sã n sagl-yã, y ka na n deeg ye!»

¹⁶La rĩm a Sedesiyaas soos n wẽena ne a Zeremi n yeel-a yaa: «Mam wẽenda ne Sẽn-Ka-Saab sẽn vɩ wã yʋʋre, sẽn naan-a tõndã, tɩ m ka na n kɩt tɩ b kʋ-fo, wall m bas-f nin-kãensã sẽn dat n kʋ foomã nugẽ ye.»

¹⁷Dẽ, a Zeremi yeela rĩm a Sedesiyaas yaa: «Sẽn-Ka-Saab sẽn yaa Saasẽ-Pãng-Soab a Wẽnnaam, n yaa Israyɛll Wẽnnaamã yetame: Yãmb sã n yi n dɩk y meng n kõ Babilond dĩmã nanambse, y na n fãaga y mense, la b ka na n sãam tẽn-kãngã ne bugum me ye. Yãmb ne y buudã na n kell n vɩɩmdame.

¹⁸La yãmb sã n ka sak n yi n dɩk y meng n kõ Babilond dĩmã nanambse, Kalde rãmbã na n tõoga tẽn-kãngã n ning-a bugum, la yãmb ka na n põs ye.»

¹⁹Rĩm a Sedesiyaas yeela a Zeremi yaa: «Zʋʋda nebã sẽn dɩk b mens n kõ Kalde rãmbã rabeem tara maam. Mam zoeta b na n wa rɩk maam n bas Zʋʋda nebã nugẽ tɩ b nams-ma.»

²⁰La a Zeremi leokame: «B ka na n bas yãmb bãmb nugẽ ye. M kot-y lame tɩ y kelg Sẽn-Ka-Saab sẽn yeel maam tɩ m togs-y koɛɛg ningã. Woto, bũmb kõn maan yãmba, la y na n vɩɩmdame.

²¹La yãmb sã n zãgs tɩ y kõn yi, ad koɛɛg ning Sẽn-Ka-Saab sẽn vẽneg maam:

²²‹Ade, b na n talla pagb nins fãa sẽn pa Zʋʋda rĩmã na-yirã n tɩ kõ Babilond dĩmã nanambse, la pagbã na n yeelame: Yãmb zo-rãmbã belga yãmb n tõoge. La yãmb naoã sẽn wa n sud begdã pʋgẽ wã, bãmb targ n leba poorẽ.›

²³B na n talla y pagbã ne y kambã fãa n tɩ kõ Kalde nebã, la yãmb ka na n põs bãmb ye. Babilond dĩmã na n yõka yãmba, la a ning tẽn-kãngã bugum.»

²⁴A Sedesiyaas yeela a Zeremi yaa: «Ra saag tɩ ned wʋm gom-kãensã ye. Woto, f ka na n ki ye.

²⁵Nanambsã sã n wʋm tɩ mam goma ne foom, n wa fo nengẽ n wa yeel foom tɩ b kotame tɩ f rɩk goam nins mam sẽn yeel foomã, ne bũmb nins fo sẽn togs maamã n togs-ba, n da solg bũmb ba a yembre, tɩ ka rẽ b na n kʋʋ foom,

²⁶bɩ f leok-b yaa: «Mam wa n yõka rĩmã sɛɛga, n yeel-a t'a kɩt tɩ b ra leb n kẽes maam a Zonatã roogẽ wã tɩ m wa pa be n ki ye.»

²⁷Nanambsã fãa kẽnga a Zeremi nengẽ n tɩ sok-a, la a Zeremi leoka bãmb wa rĩmã sẽn dag n yeel yẽnda wã. La bãmb basa yẽnda laafɩ, bala, gomdã ka yi tɩ ned wʋm ye.

²⁸A Zeremi kell n paa gũudbã zakẽ hal tɩ ta daar ning Babilond nebã sẽn wa n zab ne Zeruzalɛm n tõogã. La b sẽn tõog Zeruzalɛmã zugẽ.