Read SEBR SÕNGO, 1998 A Zeremi 39 Bible Online

A Zeremi 39 - SEBR SÕNGO, 1998 bible

A Zeremi 39

¹Zʋʋda rĩm a Sedesiyaas sẽn deeg a naamã tɩ yʋʋm-wɛɛlẽ, yʋʋmdã kiuug piig soabã pʋgẽ, Babilond dĩm a Nebukatnedzaar waa Zeruzalɛm ne a tãb-biisã fãa, n gũbg-a n na n zab ne-a.

²La a Sedesiyaas sẽn deeg naam tɩ yʋʋm piig la a yembrẽ, yʋʋmdã kiuug a naasẽ soabã rasem a wɛ daare, Babilond nebã pooga tẽngã lalga.

³Dẽ, Babilond dĩmã nanambsã kẽngame n tɩ zĩnd tẽngã rignoor ning b sẽn boond tɩ tẽn-sʋk rignoorã. Yaa a Nergall-Saretsɛɛr ne a Samgaar-Nebu, la sõgen-kãseng a Sarsekim ne tãb-biisã na-kãseng a Nergall-Saretsɛɛre, ne Babilond dĩmã nanambs a taabã fãa.

⁴Zʋʋda rĩm a Sedesiyaas ne a tãb-biisã fãa sẽn yã bãmba, b yii tẽngã rignoor ning sẽn be lals a yiib sʋk rĩmã zẽed zĩigẽ wã ne yʋng n zoe n kẽng Araba sẽnẽ.

⁵La Kalde tãb-biisã riga bãmb n tɩ yõk a Sedesiyaas Zeriko tẽn-nabd-koɛɛngẽ wã n tall n kẽng Babilond dĩm a Nebukatnedzaar nengẽ Ribla sẽn be Hamat tẽngã pʋgẽ wã, t'a bʋ a bʋʋdo.

⁶Babilond dĩmã kɩtame tɩ b kood a Sedesiyaas kambã a nifẽ Ribla, la a kɩt tɩ b kood Zʋʋda nin-kãsemsã fãa me,

⁷n yaool n kɩt tɩ b kɩɩd a Sedesiyaas ninã, la b sẽb-a ne zũud bãens n tall-a n kẽng Babilonde.

⁸Kalde nebã ninga na-yirã ne nebã rot bugum, la b lub lals nins sẽn gũbg Zeruzalɛmã.

⁹La gũudbã naab a Nebuzaradan peega neb nins sẽn pa tẽngã pʋgẽ wã ne neb nins sẽn dag n yi n dɩk b mens n kõ Babilond dĩmã, la neb a taabã sẽn ketã n kɩt tɩ b tall-b n kẽng Babilonde.

¹⁰La badaare, gũudbã naab a Nebuzaradan basa naong rãmbã sẽn ka tar baa fɩ wã tɩ b pa Zʋʋda tẽngã pʋgẽ, la a kõo bãmb reezẽ tɩɩs ne pʋto.

¹¹Babilond dĩm a Nebukatnedzaar kõo gũudbã naab a Nebuzaradan noor sẽn kẽed ne a Zeremi wɛɛngẽ n yeele:

¹²«Peeg-a n tɩ ges a yell neere, la f ra sak n maan-a wẽng ye. Maan a sẽn dat bũmb ninsã n kõ-a.»

¹³La gũudbã naab a Nebuzaradan ne sõgen-kãseng a Nebusasban la tãb-biisã na-kãseng a Nergall-Saretsɛɛre, ne Babilond dĩmã nanambsã fãa

¹⁴tʋmame tɩ b tɩ yiis a Zeremi gũudbã zakẽ n tall-a n wa kɩs a Safan biig a Ayikam biig a Gedaliya t'a yãag-a t'a kuili. Dẽ, a Zeremi zĩnda nebã sʋka.

¹⁵Wakat ning a Zeremi sẽn wa n be gũudbã zakẽ wã, Sẽn-Ka-Saab yeela yẽnda yaa:

¹⁶«Kẽng n tɩ yeel Kuus rao a Ebɛɛd-Melɛk tɩ maam a Saasẽ-Pãng-Soabã sẽn yaa Israyɛll Wẽnnaamã yetame: ‹Ade, mam na n kɩtame tɩ bũmb ning mam sẽn dag n yeel tẽn-kãngã wɛɛngẽ wã paam pidsgu, la ka na n yɩ a manegr yĩng ye, na n yɩ a sãoong yĩnga.› La daar ning sẽn yaa bõn-kãng pidsgã daarã na n yɩɩ fo nifẽ.

¹⁷La badaare, mam na n fãaga foom n ka bas tɩ f lʋɩ neb nins sẽn kẽesd foom dabeemã nugẽ ye. Maam a Sẽn-Ka-Saab n yeele.

¹⁸Mam na n kɩtame tɩ f põse, la f ka na n ki ne zabr sʋʋg ye. Fo na n vɩɩmdame, fo sẽn teeg maamã yĩnga. Maam a Sẽn-Ka-Saab n yeele.»