Read SEBR SÕNGO, 1998 A Zeremi 40 Bible Online

A Zeremi 40 - SEBR SÕNGO, 1998 bible

A Zeremi 40

¹Sẽn-Ka-Saab goma ne a Zeremi gũudb a naab a Nebuzaradan sẽn wa n kɩt tɩ b yiis-a Rama wã zugẽ. B sẽn wa n yiisd a Zeremi wã, rẽ tɩ b rag n balg-a-la ne bãense, n naag-a ne neb a taabã b sẽn yõg Zeruzalɛm ne Zʋʋda n tar n dabd yembd Babilondã.

²Gũudbã naabã kɩtame tɩ b tall a Zeremi n wa t'a yeel-a yaa: Sẽn-Ka-Saab sẽn yaa fo Wẽnnaamã rag n yeelame tɩ toog n na n paam tẽn-kãngã.

³La b sɩd kɩtame t'a yɩ wa b sẽn dag n yeelã, yãmb sẽn beeg Sẽn-Ka-Saab n ka kelg bãmb noorã yĩnga. Bũmb ning b sẽn dag n yeelã n paam yãmba.

⁴Rũndã bala, mam baagda bãens nins sẽn balg fo nusã. Sã n taa fo yam tɩ f na n tũ maam n kẽng Babilonde, bɩ f wa tũ tɩ m na n gesa f yelle. Sã n leb n ka ta f yam tɩ f na n tũ maam n kẽng Babilonde, ka yell ye. Ade, tẽngã fãa la woto. Kẽng zĩig ning sẽn noom foom, wall zĩig ning sẽn ta fo yam.

⁵La a Zeremi sẽn kaoosd n ka leokdẽ wã, gũudbã naab a Nebuzaradan leb n yeelame: «Lebg n leb a Safan biig a Ayikam biig a Gedaliya Babilond dĩmã sẽn yãk t'a lebg Zʋʋda tẽmsã naabã nengẽ n tɩ zĩnd ne-a, n pa nebã sʋka. F sã n leb n dat me, bɩ f kẽng zĩig ning fãa fo sẽn datẽ.» La gũudbã naab a Nebuzaradan kõ-a-la bɩle ne kũuni, n yaool n bas-a t'a looge.

⁶La a Zeremi kẽnga a Ayikam biig a Gedaliya nengẽ Mitspa n tɩ zĩnd ne yẽnda, neb nins sẽn kell tẽn-kãng pʋgẽ wã sʋka.

⁷Zʋʋda tãb-biis nanambs nins fãa sẽn dag n be weoogẽ wã, ne b nebã wʋmame tɩ Babilond dĩmã yãka a Ayikam biig a Gedaliya n kɩt t'a lebg tẽngã naaba, n na n soog pagbã ne raopã ne b kambã, la naong rãmbã b sẽn dag n bas tẽngã pʋgẽ n ka yõg n tall n kẽng Babilondã.

⁸Dẽ, Zʋʋda tãb-biis nanambsã ne b nebã kẽnga a Gedaliya nengẽ Mitspa. Nanamb-kãens yʋy la woto: yaa a Netaniya biig a Ismayɛlle, a Kareyak kamb a Yohanan ne a Zonatan, la a Tãnkumet biig a Seraya, ne Netofa rao a Zezaniya ne bãmb nebã.

⁹A Safan biig a Ayikam biig a Gedaliya wẽena ne bãmb la ne b nebã n yeele: Sak-y Kalde nebã n da zoe rabeem ye. Kell-y n pa-y tẽngã pʋga, n sak Babilond dĩmã tɩ y na n vɩɩmda bãane.

¹⁰La sẽn kẽed ne mam wɛɛngẽ, mam na n kell n paa Mitspa yãmb yʋʋr yĩnga, Kalde neb nins sẽn watã taoore. La yãmba, tigs-y reezẽ rãam ne bõn-koaadla, la kaam n bĩng y rʋgd pʋsẽ, la y pa tẽms nins yãmb sẽn beẽ wã pʋsẽ.

¹¹La Zʋɩf-rãmb nins sẽn dag n be Amo nebã nengẽ Moaabã ne Edom la tẽms a taabã pʋsã me wʋmame tɩ Babilond dĩmã basa Zʋʋda neb kẽer tẽngã pʋgẽ, n yãk a Safan biig a Ayikam biig a Gedaliya t'a soog-ba.

¹²La Zʋɩf-rãmbã fãa yii zĩis nins fãa b sẽn dag n dig-b tɩ b kẽngã, n lebg n wa. Bãmb kẽnga a Gedaliya nengẽ Mitspa sẽn be Zʋʋda soolmẽ wã. La beenẽ, bãmb tigsa reezẽ rãam ne bõn-koaadl wʋsgo.

¹³A Kareyak biig a Yohanan ne tãb-biisã nanambs nins sẽn be weoogẽ wã kẽnga a Gedaliya nengẽ Mitspa,

¹⁴n tɩ yeel-a yaa: Yãmb ka bãng tɩ Amo rĩm a Baalis tʋma a Netaniya biig a Ismayɛll t'a wa kʋ yãmb la? La a Ayikam biig a Gedaliya ka reeg bãmb goamã ye.

¹⁵Dẽ, a Kareyak biig a Yohanan soos n yeela a Gedaliya Mitspa yaa: «M kotame tɩ y bas tɩ m kẽng n tɩ kʋ a Netaniya biig a Ismayɛlle. Ned kõn tol n bãng ye. Bõe yĩng tɩ d na n bas t'a kʋ yãmba? Bõe yĩng tɩ Zʋʋda neb nins fãa sẽn wa n tigim yãmb nengẽ wã na n sãeege, tɩ sẽn ket-bã sãame?»

¹⁶A Ayikam biig a Gedaliya leoka a Kareyak biig a Yohanan yaa: «Da maan bõn-kãngã ye. Fo sẽn yet bũmb ning a Ismayɛll wɛɛngẽ wã ka sɩd ye.»