Read SEBR SÕNGO, 1998 A Zeremi 41 Bible Online

A Zeremi 41 - SEBR SÕNGO, 1998 bible

A Zeremi 41

¹Dẽ zugẽ, yʋʋmdã kiuug a yopoe soabã pʋgẽ, a Elisama biig a Netaniya biig a Ismayɛll sẽn yaa na-biigã kẽnga a Ayikam biig a Gedaliya nengẽ Mitspa. Yẽnda kẽnga beenẽ ne rĩmã zakẽ nin-kãsems ne b nebã. La bãmb sẽn wa n zĩ be n dɩt ne taabã wakate,

²a Netaniya biig a Ismayɛll ne a neb piigã yikame n kʋ a Safan biig a Ayikam biig a Gedaliya ne zabr sʋʋga. Yɩɩ woto tɩ b kʋ ned ning Babilond dĩmã sẽn dag n yãk t'a yɩ tẽngã naabã.

³A Ismayɛll leb n kʋʋ Zʋɩf-rãmb nins fãa sẽn dag n be ne a Gedaliya Mitspa wã, ne Kalde tãb-biis nins sẽn dag n be beenẽ wã.

⁴B sẽn kʋ a Gedaliya tɩ zaamẽ tɩ ned ba a yembr dag n ka miẽ wã,

⁵neb pis-nii n yi Sɩkɛm ne Sɩlo la Samaari n kẽng Mitspa. Bãmb dag n põnga b toeemsã, la b pãrs b futã, la b bog b mens ne sʋʋse. Bãmb dag n zãada bõn-koaadl kũun ne wisdu, n na n tɩ maan maoong Sẽn-Ka-Saab roogẽ wã.

⁶A Netaniya biig a Ismayɛll yii Mitspa n na n tɩ seg bãmba, la a rag n kẽndame la a yãbda. La yẽnda sẽn ta b sẽn beẽ wã, a yeel-b lame yaa: «Wa-y tɩ d kẽng a Ayikam biig a Gedaliya nengẽ.»

⁷La bãmb sẽn ta tẽngã pʋgẽ, a Netaniya biig a Ismayɛll ne neb nins sẽn be ne yẽnda wã yõga bãmb n koode, n wʋk-b n lob bulgẽ.

⁸La neb piig n dag n be bãmb sʋkã n yeel a Ismayɛll yaa: «Ra kʋ tõnd ye. Bala, tõnd tara bɩle ne Oorz la kaam ne sɩɩd sẽn solg weoogẽ.» Dẽ, a Ismayɛll basa bãmb n ka naag-b ne b saam-biisã n kʋ ye.

⁹Bulg ning pʋg a Ismayɛll sẽn dag n kʋ nebã n lobã yaa a Gedaliya bulga. Yaa bulg ning rĩm a Aaza sẽn dag n kɩt tɩ b tu, yẽnda sẽn dag n zoet Israyɛll dĩm a Basa wã yĩnga. Yaa bul-kãng la a Netaniya biig a Ismayɛll sẽn pids ne kũumã.

¹⁰A Ismayɛll yõga neb nins fãa sẽn dag n ket n be Mitspa wã: yaa rĩmã kom-pugli wã, ne neb nins fãa sẽn dag n ket Mitspa tɩ gũudbã naab a Nebuzaradan rɩk-b n gũnug ne a Ayikam biig a Gedaliya wã. A Netaniya biig a Ismayɛll peega neb nins b sẽn yõgã n kẽng Amo nebã tẽngẽ.

¹¹La a Kareyak biig a Yohanan ne tãb-biisã nanambs fãa sẽn dag n be ne yẽnda wã wʋma wẽng ning fãa a Netaniya biig a Ismayɛll sẽn maanã.

¹²Bãmb peega raopã fãa n kẽng n na n tɩ zab ne a Netaniya biig a Ismayɛlle. La b tɩ paam-a-la Gabawõ ko-ralmã noore.

¹³La neb nins fãa a Ismayɛll sẽn yõgã sẽn yãnd a Kareyak biig a Yohanan ne tãb-biisã nanambs nins fãa sẽn dag n be ne yẽnda wã, bãmb sũur yɩɩ noogo.

¹⁴La neb nins fãa a Ismayɛll sẽn dag n yõg n yiis Mitspa wã wẽnemdame n tɩ naag a Kareyak biig a Yohanande.

¹⁵La a Netaniya biig a Ismayɛll ne a neb a nii n põs n zoe n kẽng Amo nebã tẽngẽ t'a Yohanan ka paam-b ye.

¹⁶La a Kareyak biig a Yohanan ne tãb-biisã nanambs nins fãa sẽn dag n be ne yẽnda wã peega neb nins sẽn kellã fãa yẽnda sẽn tall Mitspa n wa a Netaniya biig a Ismayɛll nengẽ wã: yaa raop sẽn mi zabre, pagba, kamba, ne sõgen-kambã. A talla nin-bãmbã fãa n yi Gabawõ n lebg n wa. Yaa Ismayɛll-kãng n dag n kʋ a Ayikam biig a Gedaliya.

¹⁷Dẽ, bãmb dɩka sore, n tɩ yals Kimham sik zĩigã sẽn pẽ Betlehɛmã, n yaool n na n yi be n kẽng Ezɩpte,

¹⁸n zãag ne Kalde nebã bãmb sẽn dag n yɛɛsde, a Netaniya biig a Ismayɛll sẽn kʋ a Ayikam biig a Gedaliya wã yĩnga. Yaa Babilond dĩmã n dag n yãk a Ayikam biig a Gedaliya t'a lebg tẽngã naaba.