Read SEBR SÕNGO, 1998 A Zeremi 42 Bible Online

A Zeremi 42 - SEBR SÕNGO, 1998 bible

A Zeremi 42

¹Tãb-biis nanambsã fãa, a Kareyak biig a Yohanande, a Osaya biig a Yezaniya ne nebã fãa, sẽn sɩng ne nin-tals n tãag nanambs kolgame,

²n yeel Wẽnnaam no-rɛɛs a Zeremi yaa: «D wẽed-f-la kãntɩɩga, tɩ f wʋm tõnd se-yõkrã. Pʋʋs Sẽn-Ka-Saab sẽn yaa fo Wẽnnaamã tõnd ne neb nins fãa sẽn ketã yĩnga. Bala, tõnd sõorã rag n yaa wʋsgo, la fo neeme tɩ moasã, yaa tõnd bilf bal n kete.

³Bɩ Sẽn-Ka-Saab sẽn yaa fo Wẽnnaamã wilg tõnd d sẽn tog n kẽngẽ, la d sẽn tog n maan bũmb ninga!»

⁴La Wẽnnaam no-rɛɛs a Zeremi yeela bãmb yaa: «M wʋma y kosgã. Mam na n pʋʋsa Sẽn-Ka-Saab sẽn yaa yãmb Wẽnnaamã, wa sẽn zems yãmb sẽn kosã, la leokr ning Sẽn-Ka-Saab sẽn na n leok yãmbã, m ka na n solg-y bũmb baa fɩ ye.»

⁵Nebã yeela a Zeremi yaa: «Bɩ Sẽn-Ka-Saab sẽn yaa sɩd la tɩrlem soabã kao tõnd bʋʋdo, tõnd sã n ka maan wa sẽn zems bũmb nins fãa Sẽn-Ka-Saab sẽn yaa fo Wẽnnaamã sẽn na n tʋm foom tɩ f wa togs tõndã.

⁶Sã n yaa noog wall toogo, tõnd na n saka Sẽn-Ka-Saab sẽn yaa tõnd Wẽnnaamã, soab ning tõnd sẽn tʋm foom b nengẽ wã. Tõnd sũur na n yɩɩ noog tɩ sak Sẽn-Ka-Saab sẽn yaa tõnd Wẽnnaamã.»

⁷Rasem piig loogr zugẽ, Sẽn-Ka-Saab goma ne a Zeremi.

⁸Dẽ, a Zeremi boola a Kareyak biig a Yohanan ne tãb-biisã nanambs nins sẽn dag n be ne yẽnda wã, la nebã fãa, sẽn sɩng ne nin-tals n tãag nanambse,

⁹n yeel-b yaa: «Sẽn-Ka-Saab sẽn yaa Israyɛll Wẽnnaamã, soab ning yãmb sẽn tʋm maam b nengẽ tɩ m tɩ yõk b sɛɛg y yĩngã yetame:

¹⁰‹Yãmb sã n kell n pa tẽn-kãngã pʋgẽ, mam na n vigl-y lame, m ka na n sãam-y ye. Mam na n sel-y lame, m ka na n võ-y ye. Bala, mam sũur sãama ne mam sẽn kɩt tɩ toog ning paam yãmbã.

¹¹Da zoe-y Babilond dĩmã ye. Da zoe-y yãmb sẽn yɛɛsd-a soabã ye. Bala, mam bee ne yãmb n na n yols-yã, la m fãag yãmb a nugẽ. Maam a Sẽn-Ka-Saab n yeele.

¹²Mam na n zoee yãmb nimbãanega, yẽnda me na n zoee yãmb nimbãanega, n tall yãmb n leb y tẽngẽ wã.› »

¹³La yãmb sã n yeele: «Tõnd ka na n zĩnd tẽn-kãngã pʋgẽ ye!» La y sã n ka sak n kelg Sẽn-Ka-Saab sẽn yaa yãmb Wẽnnaamã,

¹⁴la y sã n yeele: «Tõnd na n kẽnga Ezɩpte. Beenẽ, d ka na n yãnd zabre, d ka na n wʋm baorg peebgo, la rɩɩb kõn paoog-d me ye. Yaa beenẽ la d na n tɩ zĩndi.»

¹⁵Beneere, kelg-y Sẽn-Ka-Saab sẽn yet yãmb a Zʋʋda bu-kellã. Saasẽ-Pãng-Soabã sẽn yaa Israyɛll Wẽnnaamã yetame: «Yãmb sã n kɩɩs n yeel tɩ y na n kẽng n tɩ zĩnda sãand Ezɩpt tẽnga,

¹⁶bɩ y bãng tɩ zabrã yãmb sẽn yɛɛsdã na n paam-y-la Ezɩpte, la komã yãmb sẽn zoetã ka na n bas yãmb Ezɩpt ye. La yaa beenẽ la y na n ki.

¹⁷Neb nins fãa sẽn na n yãk yam n kẽng n tɩ zĩnd sãand Ezɩptã, zabr ne kom la bã-longds n na n kʋ-ba, la bãmb ned ba a yembr kõn põs toog ning mam sẽn na n kɩt tɩ wa b zugã ye.»

¹⁸Bala, maam a Saasẽ-Pãng-Soabã sẽn yaa Israyɛll Wẽnnaamã yetame: «Yãmb naoor sã n tabg Ezɩpt tẽnga, mam sũur sẽn dag n yik ne Zeruzalɛm nebã to-to wã, m sũur na n puuga ne yãmb a woto me. Mam na n kɩtame tɩ nebã sã n yãnd yãmb bɩ rabeem-kãseng yõk-ba, b na n gesa yãmb wa kãab-beedo, wall bũmb sẽn kẽesd rabeem, wall paoogr bũmbu, la yãmb kõn tol n leb n yãnd zĩ-kãngã ye.»

¹⁹Yãmb a Zʋʋda bu-kellã, Sẽn-Ka-Saab yeta yãmba: «Ra kẽng-y Ezɩpt ye! Bɩ y bãng neer tɩ mam keooga yãmb dũndã.

²⁰Yãmb belgda y mense, bala yãmb tʋma maam Sẽn-Ka-Saab sẽn yaa yãmb Wẽnnaamã nengẽ n yeel yaa: ‹Pʋʋs Sẽn-Ka-Saab sẽn yaa tõnd Wẽnnaamã tõnd yĩnga. La bũmb ning fãa Sẽn-Ka-Saab sẽn yaa tõnd Wẽnnaamã sẽn na n yeel tɩ d maane, tõnd na n maaname!›

²¹Mam togsa yãmb bõn-kãng rũndã. La yãmb ka sak n kelg Sẽn-Ka-Saab sẽn yaa yãmb Wẽnnaamã, la y ka kelg bũmb nins fãa bãmb sẽn yeel tɩ m togs yãmbã ye.

²²Rẽ yĩngã, bãng-y tɩ moasã, zabr ne kom la bã-longds na n kʋʋ yãmb zĩig ning y sẽn dat n kẽng n tɩ zĩnd sãandã pʋgẽ.»