Read SEBR SÕNGO, 1998 A Zeremi 43 Bible Online

A Zeremi 43 - SEBR SÕNGO, 1998 bible

A Zeremi 43

¹A Zeremi sẽn togs nebã fãa goam nins fãa Sẽn-Ka-Saab sẽn yaa bãmb Wẽnnaamã sẽn yeel yẽnda t'a togs bãmbã n sɛ,

²a Osaya biig a Azariya ne a Kareyak biig a Yohanande, ne nin-bãmbã fãa sẽn yaa tɩta-nebã yeela a Zeremi yaa: «Bũmb ning fo sẽn yetã yaa zĩrẽ! Sẽn-Ka-Saab sẽn yaa tõnd Wẽnnaamã ka tʋm foom tɩ f wa yeel tõnd tɩ d ra kẽng n tɩ zĩnd sãand Ezɩpt ye.

³Yaa a Neriya biig a Baruk bal n pirsd foom n dat tɩ fo kẽes tõnd yellẽ, n bas tõnd ne Kalde nebã tɩ b kʋ-do, wall b yõg-d n tɩ kẽes yembd Babilonde.»

⁴La a Kareyak biig a Yohanan ne tãb-biisã nanambs fãa la nebã fãa ka kelg Sẽn-Ka-Saab sẽn yeel bãmb tɩ b pa Zʋʋda soolmẽ wã ye.

⁵Dẽ, a Kareyak biig a Yohanan ne tãb-biisã nanambs fãa peega Zʋʋda bu-kellã, neb nins b sẽn dag n dig tɩ b kẽng buud a taabã nengẽ tɩ b lebg n wa Zʋʋda wã:

⁶yaa pagba, raopa, kamba, rĩmã kom-dibli. Yaa neb nins fãa gũudbã naab a Nebuzaradan sẽn dag n bas ne a Safan biig a Ayikam biig a Gedaliya wã, n paas ne Wẽnnaam no-rɛɛs a Zeremi, la a Neriya biig a Baruki.

⁷Dẽ, bãmb ka sak n kelg Sẽn-Ka-Saab ye. Bãmb kẽnga Ezɩpte, n ta Takpaneese.

⁸Sẽn-Ka-Saab goma ne a Zeremi Takpanees n yeele:

⁹«Bao kug-bɛd n tu bok n bus-b Takpanees tẽngã pʋga, Faarõ zakã rignoorẽ, Zʋʋda nebã nifẽ.

¹⁰Yeel Zʋʋda nebã tɩ maam a Saasẽ-Pãng-Soabã sẽn yaa Israyɛll Wẽnnaamã yetame: ‹Mam na n kɩtame tɩ b tɩ tall Babilond dĩm a Nebukatnedzaar sẽn yaa m tʋmtʋmdã n wa ka. Mam na n kɩtame t'a tilg a naam geerã kug-kãensã mam sẽn solgã zutu, la a na n tilga a zãndã kug-bãmb zutu.

¹¹Yẽnda na n wa kɩtame tɩ toog paam Ezɩpt tẽngã. Sẽn tog-b ne kũum na n kiime! Sẽn tog-b ne yembd na n looga yembdo! Sẽn tog n pa-a tãpẽ na n paa tãpẽ!

¹²Mam na n kɩtame tɩ Ezɩpt wẽnnaam-dãmbã rot rɩ bugum. A na n ning-b-la bugum, n tall-b n kẽng yembdo. Yẽnda na n fãa Ezɩpt nebã zãnga, wa rũm-kɩɩm sẽn kʋʋd a fuug karense, la a na n tõog-b lame.

¹³Yẽnda na n wãa Bɛt-Semees kug-vigindsã sẽn be Ezɩptã, la a ning Ezɩpt wẽnnaam-dãmbã rot bugum.› »