Read SEBR SÕNGO, 1998 A Zeremi 44 Bible Online

A Zeremi 44 - SEBR SÕNGO, 1998 bible

A Zeremi 44

¹Ad goam nins Sẽn-Ka-Saab sẽn togs a Zeremi, sẽn kẽed ne Zʋʋda neb nins fãa sẽn be Ezɩpte, Migdolle, Takpaneese, la Nof ne Patroos tẽngã wɛɛngẽ:

²Ade, maam a Saasẽ-Pãng-Soabã sẽn yaa Israyɛll Wẽnnaamã yetame: Yãmb yãnda mam sẽn kɩt tɩ tood nins fãa paam Zeruzalɛm ne Zʋʋda soolem tẽmsã fãa wã. Tẽn-bãmb lebga raboodo, tɩ ned ka leb n be beenẽ ye.

³La yaa wẽng ning bãmb sẽn maanã yĩnga. Bãmb yõoga wisd n waoog wẽn-sãams bãmb ne yãmb la y yaab-rãmbã sẽn ka mi, n beeg maam.

⁴Mam tʋma m tʋmtʋmdbã fãa sẽn yaa no-rɛɛsdbã yãmb nengẽ n ka base, tɩ b wa kos yãmb tɩ y ra maan yel-be-kãngã m sẽn kisã ye!

⁵La bãmb yẽda b tʋb n ka kelg ye. B ka wẽnemd n bas wẽng ning b sẽn dag n maandã ye, b rag n kell n yõogda wisd n kõt bu-zẽms wẽnnaam-dãmba.

⁶Woto yĩnga, mam sũ-yikrã ne m sũ-puugrã widga wa bugum n dɩ Zʋʋda tẽmsã ne Zeruzalɛm soayã, tɩ b lebg raboodo, la zĩ-vɩɩdo, n ket n yaa a woto hal tɩ ta rũndã.

⁷Moasã, Sẽn-Ka-Saab sẽn yaa Saasẽ-Pãng-Soab a Wẽnnaam, n yaa Israyɛll Wẽnnaamã sokdame yaa: yaa bõe tɩ y maand y mens wẽng wʋsg a woto, n kɩt tɩ Zʋʋda pagbã ne raopã la kambã ne kom-peelsã menem tɩ ned ka leb n ketẽ?

⁸Yãmb nusã tʋʋm yikda mam sũuri, y sẽn yõogd wisd n waoogd Ezɩpt wẽnnaam-dãmbã yĩnga. Yãmb yaool n yaa sãamb tẽn-kãng pʋgẽ. Yãmb maana y mens tɩ b na n kʋ-yã, la y lebga kãab-beed ne paoogr bũmb dũniyã soolem-dãmbã fãa sʋka.

⁹Yãmb yĩma wẽng ning y yaab-rãmbã ne Zʋʋda rĩm-dãmbã la b pagbã sẽn maanã, la wẽng ning yãmb mensã ne y pagbã sẽn maanã, la bũmb nins fãa sẽn maan Zʋʋda soolmã ne Zeruzalɛm soayã zutã la?

¹⁰Hal tɩ ta rũndã, bãmb ka sãam b sũuri, b ka maan dabeem, la b ka sak tõodã ne noy nins mam sẽn kõ yãmb ne y yaab-rãmbã ye.

¹¹Woto yĩnga, maam a Saasẽ-Pãng-Soabã sẽn yaa Israyɛll Wẽnnaamã yetame: «Mam yãka yam n na n sɩbg-yã, la m na n menesa Zʋʋda nebã fãa.

¹²Mam na n deega Zʋʋda bu-kellã, neb nins sẽn yãk yam n na n tɩ zĩnd sãand Ezɩptã fãa n kɩt tɩ b ki beenẽ. Zabr sʋʋg ne kom na n kʋʋ bãmba. Bãmb fãa na n kiime, sẽn sɩng ne nin-talsã tɩ ta nanambsã. Zabr ne kom n na n kʋ bãmba, la neb nins fãa sẽn na n yãnd bãmbã, rabeem-kãseng n na n yõk-ba. B na n geta bãmb wa bũmb sẽn kẽesd rabeem, kãab-beedo, la paoogr bũmbu.

¹³Mam na n sɩbga neb nins sẽn be Ezɩptã ne zabr sʋʋga, la kom ne bã-longdse, wa m sẽn dag n sɩbg Zeruzalɛm nebã.

¹⁴Zʋʋda bu-kellã sẽn wa n na n zĩnd sãand Ezɩpti, n dag n tagsd n dat n lebg n leb Zʋʋda wã, ned ba a yembr bãmb sʋkã ka na n põse, wall a zoe ye. Bala, bãmb ka na n tõog n lebg n kuil ye. Yaa neb bilf bal n na n põse.»

¹⁵Raop nins fãa sẽn dag n mi tɩ b pagbã rag n yõogda wisd n kõt wẽn-sãamsã, la pagb nins sẽn dag n tigim be wʋsgã, ne neb nins fãa sẽn dag n be Patroos Ezɩpt soolmã pʋgẽ wã leoka a Zeremi yaa:

¹⁶«Tõnd ka rat n kelg goam nins fo sẽn togs tõnd ne Sẽn-Ka-Saab yʋʋrã ye.

¹⁷Tõnd dat n maana bũmb nins tõnd sẽn dag n yeelã: d na n yõoga wisd n kõ saasẽ dĩm-poakã, la d kõ-a bõn-yũudl kũuni, wa tõnd mensã ne d yaab-rãmbã, la d rĩm-dãmbã ne d nanambsã sẽn dag n maan Zʋʋda soolem tẽmsã pʋs ne Zeruzalɛm soayã zutã. Wakat-kãnga, tõnd dag n dɩtame n tɩgda, d sũy rag n yaa noogo, la toog ka tol n paam tõnd ye.

¹⁸La sẽn sɩng ne wakat ning tõnd sẽn bas n ka leb n yõogd wisd la d maand bõn-yũudl kũun n kõt saasẽ dĩm-poakã, tõnd konga bũmb fãa, la zabr sʋʋg ne kom kʋʋ tõndo.»

¹⁹La pagbã yeela a Zeremi yaa: «Dẽ yĩnga, tõnd sẽn yõogd wisd saasẽ dĩm-poakã yĩng la d kõt-a bõn-yũudl kũunã, tõnd sɩdbã ka mi tɩ tõnd maand miisd sẽn yaa a mamsgo, la d kõt-a bõn-yũudl kũun la?»

²⁰Dẽ, a Zeremi yeela nin-bãmbã, pagbã ne raopã fãa sẽn dag n leok a woto wã yaa:

²¹«Dẽ yĩnga, Sẽn-Ka-Saab yĩma wisdã yãmb ne y yaab-rãmbã, la y rĩm-dãmbã ne y nanambsã la tẽngã nebã fãa sẽn yõog Zʋʋda tẽmsã ne Zeruzalɛm soayã zutã yell la? Bãmb ka leb n tẽr a yell la?

²²Sẽn-Ka-Saab yam dag n yii ne yãmb tʋʋm-wẽnsã ne yel-beed nins yãmb sẽn maanã. La yãmb tẽngã lebga raboogo, la zĩ-vɩʋʋgo, ne kãab-beedo, tɩ ned ba a yembr ka leb n be beenẽ ye. Yaa rẽ n kɩt t'a ya a woto hal tɩ ta rũndã.

²³Yãmb sẽn yõog wisdã yĩnga, la y sẽn maan yel-wẽn n beeg Sẽn-Ka-Saabã yĩnga, la yãmb sẽn ka kelg Sẽn-Ka-Saabã yĩnga, la y sẽn ka sak n tũ bãmb tõogã ne b noyã la b tʋlsmã yĩng n kɩte, tɩ toog a woto paam-yã, la rẽ me n kɩt tɩ ket n yaa a woto hal tɩ ta rũndã wã.»

²⁴A Zeremi leb n yeela nebã fãa la pagbã fãa yaa: Yãmb fãa sẽn yaa Zʋʋda neb n be Ezɩptã, kelg-y Sẽn-Ka-Saab koɛɛgã!

²⁵Saasẽ-Pãng-Soabã sẽn yaa Israyɛll Wẽnnaamã yetame: Yãmb ne y pagbã pidsa bũmb nins y noyã sẽn togsã. Bala, yãmb yeelame: «Tõnd dat n pidsa d sẽn pʋlem tɩ d na n maana bũmb ninsã. D na n yõoga wisd n tɩ kõ saasẽ dĩm-poakã, la d kõ-a bõn-yũudl kũuni!» Dẽ yĩngã, bɩ y maan wa y sẽn yeelã. Pids-y y sẽn pʋlem bũmb ningã.

²⁶Woto yĩnga, yãmb dãmb fãa sẽn yaa Zʋʋda neb n be Ezɩptã, kelg-y Sẽn-Ka-Saab koɛɛgã! Maam a Sẽn-Ka-Saab yetame: «Mam wẽenda ne m mengã yʋ-kãsengã, tɩ Zʋʋda ned ba a yembr kõn tol n leb n pʋd mam yʋʋrã ye. Ezɩpt tẽngã gill fãa pʋga, ned ba a yembr ka na n leb n wẽen ne Zu-soabã Sẽn-Ka-Saab sẽn vɩ wã yʋʋr ye!

²⁷Mam na n gũusa bãmba, la ka b manegr yĩng ye. Yaa sẽn na n yɩlẽ tɩ toog paam-ba. Zabr sʋʋg ne kom na n kʋʋ Zʋʋda neb nins fãa sẽn be Ezɩptã, hal n sãam-b zãnga.

²⁸Neb bilf nins sẽn na n põs zabr sʋʋgã na n yii Ezɩpt n lebg n wa Zʋʋda tẽngã pʋga. La Zʋʋda bu-kellã fãa, neb nins fãa sẽn wa n na n zĩnd sãand Ezɩptã na n bãnga sã n yaa mam gomdã, wall bãmb gomdã n na n paam pidsgu.»

²⁹Maam a Sẽn-Ka-Saab yetame: «Ad bãnd ning sẽn na n wilg tɩ mam na n sɩbga yãmb zĩ-kãngã pʋgẽ, tɩ y tõe n bãng tɩ mam sẽn gom yãmb wɛɛngẽ wã na n paama pidsgu, n wa ne toog yãmb zugu.

³⁰Ad maam a Sẽn-Ka-Saab sẽn yeta: Mam na n basa Ezɩpt rĩm a Faarõ Hofra a bɛɛbã sẽn dat n kʋ-a wã nugẽ, wa m sẽn dag n bas Zʋʋda rĩm a Sedesiyaas Babilond dĩm a Nebukatnedzaar sẽn yaa yẽnda bɛ n dag n baood n kʋ-a wã nugẽ wã.»