Read SEBR SÕNGO, 1998 A Zeremi 47 Bible Online

A Zeremi 47 - SEBR SÕNGO, 1998 bible

A Zeremi 47

¹Ad goam nins Sẽn-Ka-Saab sẽn yeel b no-rɛɛs a Zeremi Filistẽ-dãmbã wɛɛngẽ, sẽn deng Faarõ sẽn na n sãam Gaaza wã:

²Sẽn-Ka-Saab yetame: Ade, koom zẽka wĩntoog sẽn lʋɩtẽ dɩtg tẽngã sẽnẽ, a lebga ko-zoetem sẽn tar pãnga. A fõtame n limd tẽngã ne bũmb nins fãa sẽn be a pʋgẽ wã, a lima tẽngã ne a nebã fãa. Nebã kelemdame, tẽngã nebã fãa wiisdame,

³bãmb sẽn wʋmd wiidã naobend rãamde, la saar-dãmbã nao rãamdã yĩnga. Ba-rãmb ka wẽnemded b poorẽ n na n peeg b kamb ye, bala, b fãa raood boogame.

⁴Filisti tẽngã gill fãa sãoong taame. Yaa daar b sẽn na n sãam neb nins sẽn be Tɩɩr ne Sɩdõ n sõngdẽ wã, bala Sẽn-Ka-Saab wãa Filisti, ne Kaftoor sẽn yaa tẽng koom sẽn gũbgã.

⁵B kõoga Gaaza t'a lebg zĩ-peelle. B ka leb n wʋmd ned rãamd Askelon pʋgẽ ye, neb nins sẽn dag n ket tẽn-nabdrẽ wã me ka leb n be ye. Yãmb na n boga y mens hal tɩ ta dabʋre?

⁶Kayto! Sẽn-Ka-Saab sʋʋga, fo na n vargame n tɩ tek zĩ-bʋg n ka tol n vʋʋse? Leb f wʋʋgẽ, pa be n vʋʋs la f bas woto.

⁷La f na n yɩ a wãn n vʋʋse? Yaa Sẽn-Ka-Saab n kõ-a noor t'a kẽng Askelon ne ko-kãsengã sẽnẽ! Yaa beenẽ la b yeel-a t'a teese!