Read SEBR SÕNGO, 1998 A Zeremi 51 Bible Online

A Zeremi 51 - SEBR SÕNGO, 1998 bible

A Zeremi 51

¹Ade, Sẽn-Ka-Saab yetame: «Mam kɩtame tɩ sãoong sob-kẽeng na n yik n sãam Babilond ne Kalde nebã.

²Mam na n tʋma bu-zẽms tɩ b wa sãeeg Babilond n bas tẽngã vɩʋʋgo. Bala, a toogã daar sã n ta, neb na n yii zĩig fãa n wa zab ne-a.

³Bɩ b yãag tãp n tees sẽn yãag-a a tãpã, yãag-y n tees-y sẽn yeelg-a a gãntik n wukd a mengã! Da bas-y-yã a bi-bɩɩg ba a yembr t'a põs ye! Kʋ-y-yã a tãb-biisã fãa gilli!

⁴Bɩ b pogl n lʋɩ n ki Kalde nebã tẽngẽ, bɩ b kõs-b tɩ b ki n dʋr Babilond soayã zutu.

⁵Bala, Israyɛll ne Zʋʋda Wẽnnaamã ka bas-b pʋg-kõt ye. Saasẽ-Pãng-Soabã ka bas-ba, baa ne b sẽn pids b tẽngã ne wẽng n beeg Israyɛll Pʋ-Peelem-Soabã ye.

⁶Zoe-y n yi-y Babilonde! Bɩ ned kam fãa zoe n fãag a menga! Da naag-y Babilond n sãam a kongrã yĩng ye! Bala, yaa wakat Sẽn-Ka-Saab sẽn dokd b sũuri, la b na n yaoo Babilond wa sẽn zems a tʋʋmã.

⁷Babilond dag n yaa wa sãnem wamd sẽn pid ne rãam n be Sẽn-Ka-Saab nugẽ, tɩ dũniyã nebã fãa yũ tɩ b nens yilimdẽ. Bu-zẽmsã yũu wamdã pʋg reezẽ rãamã, tɩ rẽ kɩt tɩ b zʋbsdẽ.

⁸La tao-tao bala, Babilond lʋɩɩme, a wãa zãnga! Yãb-y-yã a yĩnga, bao-y kaam n sõog a poglgã, tɩ daarninga, a na sãooge.

⁹Tõnd makame n tɩp Babilonde, la a ka sãoog ye. Wa-y tɩ d bas-a, tɩ ned kam fãa kuil a tẽngẽ. Bala, a sɩbgrã yell zẽk n taa saasã, a zẽkame n tãag sawatã.

¹⁰Sẽn-Ka-Saab kɩtame tɩ tõnd tɩrlem puki. Wa-y tɩ d kẽng Sɩyõ n tɩ togs bũmb ning Sẽn-Ka-Saab sẽn yaa tõnd Wẽnnaamã sẽn maanã.»

¹¹Sɩls-y y pɛɛmã n pids y logdo! Sẽn-Ka-Saab sẽn dat n sãam Babilondã yĩnga, b neka Medi rĩm-dãmbã yam. Bala, Sẽn-Ka-Saab sũ-dokr la woto, yaa sũ-dokr Sẽn-Ka-Saab roogã yĩnga.

¹²Zẽk-y tãb-kaoor tɩ d zab ne Babilond n sãam a lalsã! Paas-y gũudbã sõore. Kɩt-y tɩ gũudbã yals b zĩigẽ. Kɩt-y tɩ neb tɩ soond soayã zutu! Bala, Sẽn-Ka-Saab sẽn yãk yam tɩ b na n maana bũmb ningã, b na n maan-a lame. Yaa b sẽn dag n yeel Babilond nebã wɛɛngẽ wã!

¹³Foom a Babilond sẽn dag n be kʋɩl-kãsems noor n tar arzegs wʋsgã, fo wakat taame, wa sẽn zems f yão-beedã.

¹⁴Saasẽ-Pãng-Soabã wẽena ne b meng n yeele: N-yẽe, mam na n kɩtame tɩ bɛɛbã tãb-biis wʋsg kẽ fo pʋgẽ wa kalwaare, la b na n kaasa fo zugu, wa reezẽ wobr wakat kaasgo.

¹⁵Sẽn-Ka-Saab naana tẽngã ne b meng pãnga. Bãmb yamã kɩtame tɩ dũniyã beẽ, la b yɛdga sa-gãongã ne b bãngrã.

¹⁶Bãmb sã n zẽk b koɛɛgã, koomã sẽn be yĩngrã tigimda taaba. Bãmb kɩtdame tɩ sawat zẽk n ta dũniyã kɩremsã fãa. Bãmb kɩtdame tɩ sa-yãgb sikd sa-koom, la b kɩtdẽ tɩ sebgã yit a sẽn beẽ wã n fugda.

¹⁷Nebã fãa lebga zɩtba, n ka tar bãngr ye. Yõak bõn-naandg yãnd tar-a lame. Bala, bãmb yaa zĩrẽ bõn-naandse, la vɩɩm ka be bãmb pʋgẽ ye.

¹⁸Bãmb yaa zaalem. Bãmb yaa zĩrẽ tʋʋmã. Wakat ning Sẽn-Ka-Saab sẽn na n wa ges b yellã, b na n sãamame.

¹⁹A Zakoob yagensã Wẽnnaam ka woto ye. Bala, bãmb n yaa bũmb fãa naanda, la bãmb yãka Israyɛll buudã n maan b nebã. Bãmb yʋʋr la Saasẽ-Pãng-Soaba.

²⁰Fo yɩɩ mam zãar ne m zab-teoogo. Yaa foom la m tall n beds buud toay-toaya, la m sãam soolem toay-toaya.

²¹Foom la m tall n beds weefã ne a rʋʋdã, la a saarã ne a soabã.

²²Foom la m tall n beds pagbã ne raopã, la nin-kẽembã ne kom-bɩɩsã, la ra-sãmbã ne kom-pugli wã.

²³Mam talla foom n beds pe-kɩɩmb ne b piisi, la ka-koaad ne a niigi, la gʋvɛrneer-dãmb ne taoor dãmba.

²⁴Mam na n lebsa Babilond ne Kalde nebã fãa wẽng ning bãmb sẽn maan Sɩyõ pʋgẽ wã yĩng y nifẽ. Sẽn-Ka-Saab n yeele.

²⁵Sãoong tãnga, fo sẽn dag n sãamd dũni wã gillã, mam zabda ne foom! Mam na n tẽega m nug n tus foom, tɩ f yi pĩisã zut n bilim n lʋɩ. Mam na n kɩtame tɩ f lebg wa tãng sẽn dɩ bugum. Sẽn-Ka-Saab n yeele.

²⁶Ned kõn tõog n yãk roog soakẽ kugri, wall roog yẽbgr kugr fo zug ye. Bala, fo na n lebga zĩ-vɩʋʋg wakat fãa.

²⁷Zẽk-y tãb-kaoor tẽngã pʋgẽ n peeb baorg buud toay-toayã sʋka! Kɩt-y tɩ buud toay-toayã teedg n zab ne Babilonde. Kɩt-y tɩ Ararat ne Minimi la Askenaaz soolem-dãmbã tigim taab n zab ne-a. Yãk-y tãb-biis nanambs tɩ b zab ne-a. Kɩt-y tɩ wiidã wa wa kalwaare.

²⁸Kɩt-y tɩ buud toay-toay ne Medi rĩm-dãmbã la a gʋvɛrneer-dãmbã ne a taoor-dãmbã fãa la tẽngã fãa bãmb sẽn so wã teedg n zab ne-a!

²⁹Tẽngã rigimdame, a miima wakat ning Sẽn-Ka-Saab sẽn pids b saagrã sẽn kẽed ne Babilond wɛɛngẽ wã. Bãmb kɩtame tɩ Babilond lebg zĩ-vɩʋʋgo, tɩ ned ba a yembr ka leb n be a pʋgẽ ye.

³⁰Babilond gãndaadã basa zabr n zĩ b pãng zĩisẽ wã pʋsẽ. Bãmb pãng sɛɛme tɩ b lebg wa pagba. B ninga bãmb dotã bugum, b kaoo tẽngã rignoy kʋɩlen-kũyã.

³¹Koeesã yõsemda taaba, koe-toagsdbã zoet n yõsda taaba, n na n tɩ togs Babilond rĩmã tɩ bɛɛbã reega a tẽngã n yãmb-a zĩig zãnga,

³²tɩ b reega zĩ-rʋʋgdsã la b ning bãtã bugum, tɩ zab-zabdbã pelens yɩke.

³³Bala, Saasẽ-Pãng-Soabã sẽn yaa Israyɛll Wẽnnaamã yetame: «Babilond sẽn dag n yaa tẽn-neerã lebga wa zɛɛg ki pãbr wakate. Sã n yɩ bilfu, a tigsgã wakat na n taame.

³⁴Babilond dĩm a Nebukatnedzaar beesa maam n wãbe. Yẽnda kɩtame tɩ m lebg wa la-vɩʋʋgo. Yẽnda vela maam wa wag-bɛɛga. Yẽnda pidsa a pʋgã ne bõn-sõamy nins mam sẽn dag n tarã, n yaool n wʋk maam.»

³⁵Sɩyõ nebã na n yeelame: «Bɩ wẽng ning Babilond sẽn maan tõndã lʋɩ a zugu! Zeruzalɛm nebã na n yeelame: Bɩ tõnd zɩɩmã raagr yell zĩnd Kalde nebã zugu!»

³⁶Woto yĩnga, Sẽn-Ka-Saab yetame: «Mam na n zaba fo zabre, mam na n doka fo sũuri. Mam na n kʋɩɩsa Babilond ko-kãsengã ne a ko-bundsã.

³⁷Babilond na n lebga kug-rʋre, a na n lebga we-baas yiri, la zĩ-vɩʋʋgo. A na n lebga bõn-yɛɛsdga, la ned kõn leb n zĩnd a pʋgẽ ye.

³⁸Babilond nebã naagda taab n yãbd wa gɩgem-poala, bãmb wũusda wa gɩgem-bi.

³⁹Yão-beed sã n wa tar bãmba, mam na n maana tigr b yĩnga, n kɩt tɩ b yũ rãam tɩ b nens yilim tɩ b maan sũ-noogo, n gũs wakat fãa gõeem n ka leb n nek abada. Sẽn-Ka-Saab n yeele.

⁴⁰Mam na n kɩtame tɩ b yɩ wa pe-bi b sẽn tar n dabd kʋʋb zĩigẽ, la wa pe-raad ne boeese.»

⁴¹Maana a wãn tɩ b tõog n deeg Sesake? Dũniyã gill sẽn dag n pẽgd-a soabã ziir sɛɛme! Maana a wãn tɩ Babilond lebg zĩ-vɩʋʋg buud toay-toayã fãa sʋka?

⁴²Ko-kãsengã rɩɩ Babilonde, a ko-wĩ-kãsemsã lim-a lame.

⁴³A tẽmsã lebga raboodo, tẽngã lebga zĩ-koɛɛnga, la tẽn-nabd-koɛɛnga. Lebga tẽng ned sẽn ka leb n be-a pʋgẽ ye. Ninsaal buud ka leb n tũud be n loogdẽ yɛs ye.

⁴⁴Mam na n sɩbga Babilond nebã wẽnnaam a Bɛlle, n kɩt t'a wʋk a sẽn dag n velã. Bu-zẽmsã ka na n leb n sũ taab a nengẽ yɛs ye. Baa Babilond lalgã lʋɩɩme!

⁴⁵Mam nebã, zoe-y n yi-y tẽn-kãng pʋga! Bɩ yãmb ned kam fãa zoe n fãag a menga, n zãag ne maam a Sẽn-Ka-Saab sũ-puug-kãsengã,

⁴⁶tɩ y raood da wa booge, la tɩ rabeem da wa yõk-yã, koees nins b sẽn na n wa togs tẽngã pʋgẽ wã yĩng ye. Bala, rõandã, b yetame tɩ woto, vẽere, n yet tɩ woto. Tẽngã zĩig fãa lebga wẽnga, naab fãa zabda ne a to!

⁴⁷Woto yĩnga, ade, wakat n wate, tɩ mam na n sɩbg Babilond bõn-naandsã. La tẽngã nebã fãa na n paama yãnde. Sẽn ki-bã fãa kũumã na n pida tẽngã.

⁴⁸Saasẽ la tẽngã ne bũmb nins fãa sẽn be b pʋsẽ wã na n kaasa ne sũ-noogo, bũmb nins sẽn paam Babilondã yĩnga. Sɩd me, sãamdb na n yii nug-rɩtg sẽnẽ, n wa zab ne-a. Sẽn-Ka-Saab n yeele.

⁴⁹Babilond kɩtame tɩ b kʋ neb dũniyã fãa pʋgẽ, la moasã, b na n kʋʋ Babilond nebã, b sẽn kʋ Israyɛll nebã yĩnga.

⁵⁰Yãmb dãmb fãa sẽn põs zabr sʋʋgã, da yals-y ye! Zĩnd-y yɩɩg n tẽeg maam a Sẽn-Ka-Saab yelle, la y ra yĩm Zeruzalɛm yell ye!

⁵¹Yãnd yõka tõndo, d sẽn wʋm paoogr goamã yĩnga. D nens pida ne yãnde, bala, bu-zẽms wa n kẽe Sẽn-Ka-Saab roogã zĩ-sõamẽ wã.

⁵²Yaa woto tɩ Sẽn-Ka-Saab yetẽ: «Wakat n wate, tɩ mam na n sɩbg Babilond bõn-naandsã. A tẽngã fãa pʋgẽ, b na n wʋma sẽn paam-b sãmpoagã fãa wõosgo.

⁵³Baa Babilond sã n dʋ yĩngr n me lalg sẽn tar pãng beenẽ, la ba a sã n kogl a pãng zĩisã tɩ ned ka tõe n ta beenẽ, mam na n tʋma neb tɩ b tɩ sãam-a. Maam a Sẽn-Ka-Saab n yeele.»

⁵⁴B wʋmda kelems Babilond tẽngã pʋgẽ. Sãoong kãseng bʋrg yita Kalde nebã tẽngẽ.

⁵⁵Yaa Sẽn-Ka-Saab n sãamd Babilonde, n kɩt tɩ b ka leb n wʋmd a rãamd ye. A bɛɛbã wata ne bʋr-kãseng wa ko-kãsengã sẽn guglumd to-to wã.

⁵⁶N-yẽe! Sẽn sãamd-a fãa wã watame n na n zab ne Babilonde! B yõga a tãb-biisã, b kaoo a tãbdã, bala, Sẽn-Ka-Saab yaa Wẽnnaam sẽn sɩbgda, la b yaooda ned kam fãa wa sẽn zems a tʋʋmde.

⁵⁷Mam na n yũnuga yẽnda nanambsã, a yam dãmbã, a gʋvɛrneer-dãmbã, ne a taoor dãmbã la a gãndaadã rãam tɩ b gũs wakat fãa gõeem n ka leb n nek abada. Rĩm ning yʋʋr sẽn boond tɩ Saasẽ-Pãng-Soabã n yeele.

⁵⁸Saasẽ-Pãng-Soabã yetame: «B na n luba Babilond lal-tagdã, la b yõog a tẽngã rignoy kʋɩlen-zãntlsã bugum. Nebã namsda b mens zaalem, tɩ tẽmsã yaool n na n dɩ bugum. La bãmb namsgã yaa zaalem bala.»

⁵⁹Woto yaa koɛɛg no-rɛɛs a Zeremi sẽn kõ a Maaseya biig a Neriya biig a Seraya. Yaa wakat ning a Seraya sẽn tũ Zʋʋda rĩm a Sedesiyaas n na n kẽng Babilondã, la rẽ tɩ yaa rĩm a Sedesiyaas sẽn deeg a naamã tɩ yʋʋm naaslẽ wã. A Seraya rag n yaa sõgen-kãsenga.

⁶⁰A Zeremi gʋlsa sebr n wilg tood nins fãa sẽn na n paam Babilondã, la goam nins fãa sẽn kẽed ne Babilond wɛɛngẽ wã.

⁶¹A Zeremi yeela a Seraya yaa: «Fo sã n ta Babilonde, bɩ f mao n karem gom-kãensã fãa.

⁶²Karem-b n yeel yaa: ‹Sẽn-Ka-Saabo, yãmb meng n gom zĩ-kãngã wɛɛngẽ, n yeel tɩ b na n sãam-a lame n kɩt t'a lebg zĩ-vɩʋʋg wakat fãa, tɩ ninsaalb wall rũms ra leb n zĩnd a pʋgẽ ye.›

⁶³Fo sã n karem seb-kãngã n sɛ, bɩ f loe-a ne kugr n tɩ lob Efrat kʋɩlgẽ wã,

⁶⁴la f yeel tɩ yaa a woto la Babilond na n lis n ka leb n duk yĩngri, toog ning mam sẽn na n kɩt tɩ wa yẽnda zugã yĩnga.› » «La bãmb namsgã yaa zaalem bala.» A Zeremi goamã baoosg la woto.