Read SEBR SÕNGO, 1998 A Zeremi 52 Bible Online

A Zeremi 52 - SEBR SÕNGO, 1998 bible

A Zeremi 52

¹A Sedesiyaas sẽn wa n na n lebg rĩmã t'a tara yʋʋm pisi la a yembre, la yẽnda rɩɩ naamã Zeruzalɛm yʋʋm piig la a yembre. A ma yʋʋr dag n yaa a Amutalle, n yaa Libna tẽng ned a Zeremi bi-pugla.

²A Sedesiyaas maana sẽn yaa wẽng Sẽn-Ka-Saab nifẽ wa a Yoyakim.

³Sẽn-Ka-Saab sũ-puugrã yĩng n kɩt tɩ yel-kãngã paam Zeruzalɛm ne Zʋʋda nebã, hal tɩ Sẽn-Ka-Saab tol n dig-b n zãag ne b menga. A Sedesiyaas kɩɩsa Babilond dĩmã noore.

⁴A Sedesiyaas sẽn deeg a naamã tɩ yʋʋm-wɛɛlẽ, kiuug piig soabã rasem piig daare, Babilond dĩm a Nebukatnedzaar yika ne a tãb-biisã fãa n zab ne Zeruzalɛm. Bãmb tilga b tãb-sikã n gũbg tẽngã, la b tu bok n gilg-a zĩig zãnga.

⁵Babilond nebã gũbga Zeruzalɛm tẽngã n tãag a Sedesiyaas sẽn deeg a naamã tɩ yʋʋm piig la a yembrẽ.

⁶Kiuug a naas soabã rasem a wɛ daare, komã wɩnga tẽngã pʋga, hal tɩ tẽngã nebã ka leb n tar dɩɩb baa bilf n na n dɩ ye.

⁷Dẽ, Babilond dãmbã pooga võor tẽngã lalgẽ. La rĩm a Sedesiyaas ne a tãb-biisã fãa soosa ne yʋngo, n tũ tẽngã noor ning sẽn be lals a yiibã sʋk rĩmã zẽed zĩig sɛɛgẽ wã, n yi n zoe n kẽng Araba tẽn-nabdrã sẽnẽ. La Kalde rãmbã rag n gũbga tẽngã.

⁸Kalde rãmbã tãb-biisã riga rĩm a Sedesiyaas n tɩ paam-a Zeriko tẽn-nabd-koɛɛngã zĩigẽ, la rĩmã tãb-biisã zoe n sãeegame.

⁹Dẽ, bãmb yõka rĩmã n tall n kẽng Ribla sẽn be Hamat soolmẽ wã, Babilond dĩmã nengẽ, t'a bʋ a bʋʋdo.

¹⁰Babilond dĩmã kɩtame tɩ b kood rĩm a Sedesiyaas kom-dibli wã a Sedesiyaas nifẽ, la a kɩt tɩ b kood Zʋʋda nanambs nins fãa sẽn be Ribla wã.

¹¹Dẽ poore, yẽnda kɩtame tɩ b kɩɩd a Sedesiyaas ninã, la b sẽb-a ne zũud bãense. Babilond dĩmã talla yẽnda n tɩ kẽes bi-bees roog Babilond t'a pa be n tãag a kũum.

¹²Babilond dĩm a Nebukatnedzaar sẽn deeg a naamã tɩ yʋʋm piig la a wɛɛlẽ, kiuug a nu soabã rasem piig daare, a Nebuzaradan sẽn dag n yaa Babilond dĩmã gũudb naabã waa Zeruzalɛm.

¹³Yẽnda ninga Sẽn-Ka-Saab roogã ne rĩmã zakã, la Zeruzalɛm dotã fãa bugum. Yẽnda ninga ro-bɛdã fãa bugum.

¹⁴Kalde tãb-biisã fãa sẽn dag n be ne gũudbã naabã sãama lals nins sẽn karg n gũbg Zeruzalɛmã.

¹⁵Gũudbã naab a Nebuzaradan talla tẽngã neb kẽer sẽn yaa naong rãmbã, ne sẽn kell-bã, la neb nins sẽn dag n dɩk b mens n kõ Babilond dĩmã, n paas tʋʋm-mitb nins sẽn kellã, n tɩ kẽes yembdo.

¹⁶La yẽnda yãka naong rãmb kẽer n bas tɩ b pa tẽngã pʋgẽ n ko reezẽ tɩɩsã la b ko pʋtã.

¹⁷Kalde rãmbã wãa zũud ra-lugdsã sẽn dag n be Sẽn-Ka-Saab roogã pʋgẽ wã, ne tebendsã la zũud sĩn-bedrã sẽn be beenẽ wã, n wʋk zũudã fãa n tall n kẽng Babilonde.

¹⁸Bãmb wʋka tompeglem laasã ne pɛll-dãmbã la sʋʋsã, ne zɩɩm mesb laasã, la wisd yõogr laasã, n paas zũud teed nins fãa b sẽn tar n maand Sẽn-Ka-Saab roogã tʋʋmdã.

¹⁹Gũudbã naab leb n wʋka sĩn-bãoonegã ne bugum laasã, la zɩɩm mesb laasã ne tompeglem laasã, la fɩtl dogendsã ne wisd yõogr laasã, la bõn-yũudl wamã, la bũmb nins fãa sẽn maan ne sãnem la wanzuri wã.

²⁰Rĩm a Salmo sẽn dag n maan ra-lugds a yiibã ne sĩn-bedrã, la niig piig la a yiibã sẽn dag n yaa tebendsã Sẽn-Ka-Saab roogã yĩngã fãa rag n yaa teed sẽn maan ne zũudu, la b rag n ka tõe n bãng b zɩslmã tɛk ye.

²¹Ra-lugds a yiibã rag n zema taaba. B zãntlmã rag n yaa kãntɩɩg piig la a nii, tɩ wĩir woglem sẽn yaa kãntɩɩg piig la a yiib gilg-ba. B pʋsã yaa yogdo, t'a yembr fãa taglem tat nug-bil woglem.

²²Zũud pugl n be ra-lugdg fãa zugu, la pugl fãa zãntlem dag n yaa kãntɩɩg a nu. La b rõoga gãmbr ne gernaad biis sẽn maan ne zũud gilli. La b rag n maana ra-lugdg a to wã ne a gernaad-dãmbã me a woto.

²³Gernaad biis pis-wɛ la a yoob n dag n be ra-lugdsã kɩremsã, tɩ gernaad-dãmb koabg rag n karg n gũbg gãmbrã.

²⁴Gũudbã naab yõka maan-kʋʋr kãsem a Seraya ne maan-kʋʋr kãsem-pʋgdg a Sofoni, n paas rigno-gũudb a tãabã.

²⁵Tẽngã pʋga, yẽnda yõka tãb-biis naab a yembre, la a yõg rĩmã kug-zĩidbã sʋk neb a yopoe sẽn dag n be tẽngã pʋga, ne tãb-biis naabã seb-gʋlsd ning sẽn dag n get-a tẽngã tãb-biis yãkr yellã, n paas nebã sʋk neb pis-yoob sẽn dag n be tẽngã tẽn-sʋka.

²⁶Gũudbã naab a Nebuzaradan talla bãmb n kẽng Babilond dĩmã nengẽ Ribla.

²⁷La Babilond dĩmã kɩtame tɩ b kʋ bãmb Ribla, Hamat soolmã pʋgẽ. Yɩɩ woto la b tall Zʋʋda nebã n tɩ kẽes yembd n zãag ne b tẽngã.

²⁸Ad neb nins a Nebukatnedzaar sẽn yõg n tall n kẽng yembdã sõore: yʋʋmd a yopoe soabã pʋgẽ, yɩɩ Zʋʋda neb tus a tã la pisi la a tã.

²⁹A Nebukatnedzaar sẽn deeg a naamã tɩ yʋʋm piig la a niinẽ, yẽnda yõga Zeruzalɛm neb kobs nii la pistã la a yiibu n tall n loog yembdo.

³⁰A sẽn deeg a naamã tɩ yʋʋm pisi la a tãablẽ, gũudbã naab a Nebuzaradan yõga Zʋʋda neb 745 n tall n loog yembdo. B sẽn yõg neb ninsã fãa sõor yaa neb.

³¹B sẽn tall Zʋʋda rĩm a Yoyakẽ n tɩ kẽes yembdã tɩ yʋʋm pis-tã la a yopoɛɛlẽ, kiuug piig la a yiib soabã rasem pisi la a nu daare, Babilond dĩm a Evɩll-Merodak sẽn deeg a naamã yʋʋmde, a yiisa Zʋʋda rĩm a Yoyakẽ bi-bees roogo.

³²A Evɩll-Merodak goma gom-nood ne a Yoyakẽ, n maan-a neere, n kõ-a naam sẽn yɩɩd rĩm-dãmb nins fãa sẽn dag n be ne yẽnda Babilond tẽngã.

³³Woto, Babilond dĩm a Evɩll-Merodak kɩtame t'a Yoyakẽ yees a bi-bees roog futã n toeem futu, la a rag n naagda yẽnda n dɩt daar fãa hal n tãag a yõor tɛka.

³⁴Dẽ, yɩɩ Babilond dĩm a Evɩll-Merodak n ges rĩm a Yoyakẽ yell daar fãa, hal n tãag a Yoyakẽ yõor tɛka.