Read SEBR SÕNGO, 1998 A Zeremi 7 Bible Online

A Zeremi 7 - SEBR SÕNGO, 1998 bible

A Zeremi 7

¹Ad koɛɛg ning Sẽn-Ka-Saab sẽn yeel a Zeremi:

²Kẽng n tɩ yals Sẽn-Ka-Saab roogã zak rignoor n moon n yeel yaa: Yãmb fãa sẽn yaa Zʋʋda neb sẽn tũud rigno-kãensã n kẽed n wõgemded n waoogd Sẽn-Ka-Saabã, kelg-y-yã!

³Saasẽ-Pãng-Soabã sẽn yaa Israyɛll Wẽnnaamã yetame: «Maneg-y y yel-manesmã ne y tʋʋmã, tɩ m bas-y tɩ y zĩnd zĩ-kãngã.

⁴Ra teeg-y zĩrẽ goamã nebã sẽn togsdã ye. B yetame tɩ Sẽn-Ka-Saab roogã la woto, Sẽn-Ka-Saab roogã la woto!»

⁵Yãmb sã n maneg y yel-manesmã ne y tʋʋmã, la y maan wa sẽn zems ne taaba,

⁶la y ka nams sãambã ne kɩɩbsã la pʋg-kõapã, yãmb sã n ka raag bʋʋm dãmbã zɩɩm zĩ-kãngã, la y ka pʋg bu-zẽms wẽnnaam-dãmb n wa ne toog y meng zugu,

⁷mam na n kɩtame tɩ y kell n zĩnd zĩ-kãngã, tẽng ning mam sẽn dag n kõ y yaab-rãmbã kʋdem-wẽndẽ tɩ b soog zamaan woo zamaanã.

⁸La gese, yãmb teega zĩrẽ goam sẽn ka yõodo.

⁹Rẽ yĩnga, yãmb tõeeme n zuud la y kʋʋda, la y yooda, la y wẽend zĩrẽ wẽenego, la y yõogd wisd n kõt wẽn-naandg a Baalle, la y waoogd bu-zẽms wẽnnaam-dãmb yãmb sẽn ka mi,

¹⁰n yaool n wat n yas mam taoor do-kãngã mam yʋʋrã sẽn be-a pʋgẽ wã pʋg n maand yel-be-kãensã, n yetẽ tɩ yãmb paama fãagre?

¹¹Rẽ yĩnga, yãmb geta ro-kãngã b sẽn boond mam yʋʋrã a pʋgẽ wã wa wagda soondg zĩig la? Mam nee fãa. Maam a Sẽn-Ka-Saab n yeele.

¹²M kot-y lame tɩ y kẽng Sɩlo sẽn yaa mam zĩigã, zĩig ning mam sẽn dag n kɩt tɩ m yʋʋrã zĩnd kʋdem-wẽndẽ wã. Tɩ ges-y mam sẽn maan-a bũmb ninga, wẽng ning Israyɛll sẽn yaa mam nebã sẽn maanã yĩnga.

¹³Maam a Sẽn-Ka-Saab yetame: «Yãmb sẽn maan bõn-kãens fãa wã yĩnga, mam sẽn gom ne yãmb n leb n gom n ka tol n bas tɩ yãmb ka kelgã, mam sẽn bool yãmb tɩ y ka sakã yĩnga,

¹⁴ad mam sẽn na n maan ro-kãngã b sẽn boond mam yʋʋrã a pʋgẽ wã, roog ning yãmb sẽn teeg-a wã, la zĩig ning mam sẽn dag n kõ yãmb ne y yaab-rãmbã to-to: Mam na n maan-a-la wa m sẽn dag n maan Sɩlo wã.

¹⁵Mam na n diga yãmb tɩ y zãag ne-ma, wa m sẽn dag n dig y saam-biisã sẽn yaa Efrayiim buudã fãa wã.»

¹⁶La foom a Zeremi, ra pʋʋs maam nin-kãensã yĩng ye. Ra zẽk f koɛɛg wall f yõk maam sɛɛg ye. Bala, mam ka na n kelg-f ye.

¹⁷Fo ka ne bãmb sẽn maand bũmb nins Zʋʋda tẽmsã pʋs ne Zeruzalɛm soayã zutã la?

¹⁸Kambã wʋkda raado, tɩ ba-rãmbã tugund bugum, tɩ pagbã nagd zom n maand miisd saasẽ dĩm-poakã yĩnga. La bãmb toogda reezẽ rãam n kõt wẽnnaam-dãmb a taab n sãamd mam sũuri.

¹⁹La maam a Sẽn-Ka-Saab yetame: Rẽ yĩnga, yaa mam sũur la b sãamd sɩda? Ka b mensã sũy la b sãamd n ningd b mens yãnd sɩda?

²⁰Bõn-kãng yĩng kɩtame tɩ maam a Sẽn-Ka-Saab sẽn yaa Zu-soabã yetẽ: «Ade, mam sũ-puug-kãsengã na n siga zĩ-kãngã zugu, la a sig nebã ne rũmsã, la tɩɩsã ne pʋtã la tẽngã bɩle zugu. A na n dɩɩ wa bugum sẽn ka kiida.»

²¹Saasẽ-Pãng-Soabã sẽn yaa Israyɛll Wẽnnaamã yetame: «Y sã n dat bɩ y naag-y maand sẽn yõogd bugmã ne y maand a taabã nemd n wãbe!

²²Bala, wakat ning mam sẽn yiis y yaab-rãmbã Ezɩptã, mam ka yeel bãmb tɩ bũmbu, la m ka kõ-b noor sẽn kẽed ne maand sẽn yõogd bugum ne maand a taab wɛɛngẽ ye.»

²³Ad mam sẽn kõ bãmb noor ninga: «Sak m koɛɛgã tɩ m na n yɩɩ yãmb Wẽnnaam, tɩ yãmb yɩ mam nebã. Sak-y n maan-y bũmb nins fãa mam sẽn yeel bãmb tɩ y maanã tɩ y vɩɩm yɩ noogo.»

²⁴La bãmb ka sak n kelge, bãmb yẽda b tʋba. Bãmb maana wa sẽn zems b sũ-keglmã, n tõdg b na ges maam n tud b kudga.

²⁵Hal sẽn sɩng ne wakat ning y yaab-rãmbã sẽn yi Ezɩptã n tãag rũndã, mam tʋma m tʋmtʋmdbã fãa sẽn yaa m no-rɛɛsdbã yãmb nengẽ wakat fãa n ka bas ye.

²⁶La bãmb ka sak n kelg ye, bãmb yẽda b tʋba. Bãmb kenga b sũur n maan sẽn yaa wẽng n yɩɩd b yaab-rãmbã.

²⁷Zeremi, baa fo sã n togs bãmb gom-kãensã fãa, b ka na n kelg ye. Fo sã n bool-ba, b ka na n leok-f ye.

²⁸Dẽ, bɩ f yeel-ba: «Bu-kãngã ka sak n kelg maam a Sẽn-Ka-Saab sẽn yaa bãmb Wẽnnaamã, la b reeg m demsgã ye. Sɩdã ka leb n be ye, bãmb noy ka leb n togsd sɩd ye.»

²⁹Zeruzalɛm nebã, põng-y y zutã n lob y pʋleng zoobdã! Rʋ-y tãn-bɛɛlã zut n yãb n wiisi! Bala, Sẽn-Ka-Saab basa buud ning sẽn kɩt tɩ b sũurã yikã, la b zãgs-a.

³⁰Maam a Sẽn-Ka-Saab yetame yaa: «Zʋʋda nebã beega maam. Bãmb dɩka b bõn-naands nins mam sẽn kisã n ning roog ning b sẽn boond mam yʋʋrã a pʋgẽ wã pʋga, n dẽgm-a.

³¹Bãmb mee maoong kʋʋb zĩisi, zĩig ning b sẽn boond tɩ Tofɛtã sẽn be Bɛn-Hinom longã pʋgẽ wã, n dɩk b kom-pugli la b kom-dibli n maan maand n yõog bugum b zutu. Bõn-kãng yaa bũmb mam sẽn ka yeel bãmb tɩ b maan ye. M nan zɩ n tags bũmb a woto yell meng ye.»

³²Maam a Sẽn-Ka-Saab yetame: «Bõn-kãng yĩnga, wakat n wate, tɩ b ka na n leb n bool-a tɩ Tofɛt bɩ Bɛn-Hinom ye. B na n bool-a lame tɩ kʋʋb longo. Bala, b na n mumda kũum Tofɛte, weer sẽn ka be yĩnga.

³³Nin-kãensã kũum na n lebga yĩngr bõn-yɩgdɩ ne we-rũms rɩɩbo, tɩ ned ka be n na n dig bãmb ye.

³⁴Mam na n kɩtame tɩ kɩdeng ne sũ-noog yɩɩla, la pʋg-paal ne pʋg-paal sɩd yɩɩl sɛ Zʋʋda soolem tẽmsã pʋse, ne Zeruzalɛm soayã zutu: tẽngã na n lebga vɩʋʋgo.»