Read SEBR SÕNGO, 1998 A Zeremi 8 Bible Online

A Zeremi 8 - SEBR SÕNGO, 1998 bible

A Zeremi 8

¹Maam a Sẽn-Ka-Saab yetame yaa: «Wakat-kãnga, b na n vaaga Zʋʋda rĩm-dãmbã ne a nanambsã la maan-kʋʋdbã ne no-rɛɛsdbã, la Zeruzalɛm nebã fãa kõabã b yaadã pʋse,

²n dʋʋg wĩndgã ne kiuugã la yĩngr ãdsã bãmb sẽn dag n nong la b waoogdẽ la b pʋgd la b baoodẽ la b wõgemded b taoor n waoogd-bã vẽenemẽ. B ka na n naag-b taaba, la b ka na n mum-b me ye. B na n lebga birg tẽn-gãongã yĩnga.

³La bu-wẽn-kãng neb nins fãa sẽn ket n be dũniyã zugã, zĩis nins fãa mam sẽn na n dig-b tɩ b tɩ kẽngã, b na n yeelame tɩ b sẽn kiid n são. Saasẽ-Pãng-Soabã n yeele.»

⁴Yeel-b tɩ maam a Sẽn-Ka-Saab sokdame yaa: «Ned lʋɩtame n ka yik bɩ? Bɩ ned sã n bʋdge, a ka lebgd n wa sor zugu?

⁵La yaa bõe tɩ Zeruzalɛm nin-kãensã bas maam n kɩɩsd maam wakat fãa? Bãmb kẽngda taoor ne zãmbã maanego, bãmb ka sak n na n lebg n wa mam nengẽ ye.

⁶Mam maaga m meng n kelge, la sɩd ka be bãmb goamẽ wã ye. Bãmb ned ba a yembr ka maand a bãngẽ ne wẽng ning a sẽn maanã ye. Bãmb ka sokde: «Bõe la d maan sẽn yaa wẽnga.» Ned kam fãa maanda wa a sẽn date, wa wed-moaag sẽn zoet n kẽed zabr pʋgẽ.

⁷Baa raong sẽn yɩgd yĩngrã mi a sẽn na n toeem tẽng wakate, la wall ne sɩlaall la kʋɩl-peosg me mi b sẽn tog n lebg wakat ninga. La mam nebã ka mi maam a Sẽn-Ka-Saab no-tũudsã ye.»

⁸Yãmb yetame tɩ y yaa yam dãmba, y sẽn tar Sẽn-Ka-Saab tõogã yĩnga. Yaa sɩda, la maana a wãn tɩ gʋlsdbã gʋlsd n tekd tõogã t'a lebgd zĩrẽ?

⁹Yam dãmbã ninga b mens yãnde. Bãmb yɛɛsame n ka leb n mi b sẽn dabdẽ ye. Bãmb sẽn zãgs Sẽn-Ka-Saab goamã, bõe yam la bãmb tara?

¹⁰Yaa woto yĩnga, tɩ mam na n dɩk b pagbã n kõ neb a taaba, la neb a taab na n deega bãmb pʋto. Bala, kom-bãoonegã ne nin-kẽembã fãa baooda b mens nafr bala. No-rɛɛsdbã ne maan-kʋʋdbã fãa yagda zĩrẽ.

¹¹Bãmb ka tɩpd mam nin-nongdsã poglg sõama ye. Bãmb yetame tɩ laafɩ beeme, tɩ laafɩ yaool n ka beẽ ye.

¹²Bãmb sẽn maan yel-beedã yãnd tar-b lame bɩ? Baa bilfu! Bãmb ka mi yãn-zoeer ye. Woto yĩnga, bãmb na n naaga neb nins sẽn lʋɩtã n lʋɩ. Mam sã n wa sɩbg-ba, b na n lʋɩɩme. Maam a Sẽn-Ka-Saab n yeele.

¹³Maam a Sẽn-Ka-Saab yetame: «Mam na n woba b biisã fãa, la reezẽ biis ka na n leb n zĩnd reezẽ tɩɩg zug ye. Kankam ka na n leb n zĩnd kankang zug ye. Hal ba b vãadã na n kʋɩɩme. Bũmb ning mam sẽn dag n kõ bãmbã loogame.»

¹⁴Nebã yeelame: «Yaa bõe tɩ d zĩ zaalem? Wa-y tɩ d lagem taab n yik n kẽng tẽms nins sẽn gũbg ne lalsã n tɩ kẽ be n ki, bala Sẽn-Ka-Saab sẽn yaa tõnd Wẽnnaamã na n kɩtame tɩ tõnd ki. Bãmb yũnuga tõnd koom sẽn tar zẽnem, tõnd sẽn beeg bãmbã yĩnga.

¹⁵Tõnd dag n gũuda vɩ-bãane, la bõn-sõng ka wat ye. Tõnd dag n gũuda maagre, la rabeem bal n tar tõndo.

¹⁶Tõnd wʋmda d bɛɛbã wiidi sɛsg Dan sẽnẽ. B wed-raadã sã n kelme, tẽn-gãongã fãa rigimdidame. Bãmb watame n na n sãam tẽngã ne bũmb nins fãa sẽn be a pʋgẽ wã, la tẽngã nebã fãa.»

¹⁷Bala, maam a Sẽn-Ka-Saab yetame: «Mam na n tʋma wiis la wag-toose, la ka wiis b sẽn tõe n nanem[1] ye. B na n kɛ-y lame.»

¹⁸Mam toogã yɩɩda maam, mam sũur sãama hal wʋsgo.

¹⁹Mam wʋmda m nebã m sẽn nongã sẽn be tẽn-zãrgẽ n kelemd n yetẽ: «Sẽn-Ka-Saab ka leb n be Sɩyõ la? Sɩyõ rĩmã ka leb n beẽ la?» La Sẽn-Ka-Saab sokdame: «Bõe yĩng tɩ b waoogd b bõn-naandse, ne bu-zẽmsã yel-yoodã n sãamd m sũuri?»

²⁰Tigsg wakat loogame, tʋʋlg wakat rabda a sɛɛbo, la tõnd ket n nan ka paam fãagr ye.

²¹Mam sũur sãamame, mam nebã m sẽn nongã sãoong yĩnga. Mam bee lik pʋgẽ, la sãoong rɩta maam.

²²Tɩɩm ka leb n be Galaad la? Tɩp ka leb n be beenẽ la? Bõe yĩng tɩ m nebã m sẽn nongã bãag ka sãoogdẽ?

²³Mam sã n dag n tõeẽ tɩ m zugã yɩ wa bulga, tɩ m ninã bul nintãm wa bulg ko-nini, m dag n na n yãbẽ-la wĩntoog ne yʋngo, mam nebã m sẽn nongã sẽn ki wã yĩnga!