Read SEBR SÕNGO, 1998 A Zeremi 9 Bible Online

A Zeremi 9 - SEBR SÕNGO, 1998 bible

A Zeremi 9

¹Mam nong n paamẽ-la sik zĩig we-raoogã pʋg wa so-toagdba, n bas m nebã n looge. Bala, b fãa yaa yoaadba, b fãa yaa zãmb dãmba.

²Bãmb rõnega b zɛlmã wa tãpo, n yagd zĩrẽ. Bãmb sẽn tar pãng tẽngã pʋgẽ wã ka sɩd la b maand ye. Bãmb tʋʋmd yaa wẽng woo wẽng maanego, la bãmb ka mi maam ye. Maam a Sẽn-Ka-Saab n yeele.

³Bɩ ned kam fãa gũus a meng ne a to, la bɩ ned ra leb n tẽ a saam-biis me ye. Bala, neb maanda zãmb n belgd b saam-biisi, la zoa kãnegda neb ne taaba.

⁴Bãmb fãa zãmbda taaba, sẽn togsd-a sɩd ka be ye. Bãmb zãmsa b zɛlma wã zĩrẽ yagbo, bãmb maana wẽng n ka leb n tõe n tek ye.

⁵Bãmb tʋʋmd yaa zãmbg woo zãmbgo. Bãmb maanda zãmb n ka rat n leb n bãng maam ye. Maam a Sẽn-Ka-Saab n yeele.

⁶Woto yĩnga, Saasẽ-Pãng-Soabã yeelame: «Mam na n ninga bãmb boaag pʋg n mak-ba. M nebã maana wẽnga. Yaa bõe la m na n maan-b moasã?

⁷Bãmb zɛlma wã yaa wa pe-zẽnem. Bãmb goamã yaa belgr bala. Bãmb gomda laafɩ goam ne b yags n bẽt-ba.»

⁸Mam na n sɩbga bãmb bõn-kãens yĩnga. Mam kõn dok m sũur ne buud a woto sɩda? Maam a Sẽn-Ka-Saab n yeele.

⁹Mam na n zĩnda tãmsã zut n yãb n wiisi. Mam na n zĩnda rũmsã wãbneg zĩisẽ we-raoogẽ wã n wiisi. Bala, b wãkame, tɩ ned ka leb n pɩʋʋgd be ye. B ka leb n wʋmd rũms rãamd beenẽ ye. Yĩngr bõn-yɩgdɩ wã ne we-rũmsã fãa zoeeme.

¹⁰Mam na n kɩtame tɩ Zeruzalɛm lebg kug-rʋre, la we-baas yiri. Mam na n kɩtame tɩ Zʋʋda tẽmsã lebg zĩ-vɩɩdo, tɩ ned ka leb n zĩnd beenẽ yɛs ye.

¹¹Ãnda soab n tar yam n tõe wʋm bõn-kãensã võore? Bɩ Sẽn-Ka-Saab sẽn kõ ned ning bõn-kãens bilgrã togse. Bõe yĩng tɩ tẽngã sãame, n lebg wa we-raoog sẽn dɩ bugum tɩ ned ka leb n tũud be n loogdẽ?

¹²La Sẽn-Ka-Saab yeela maam yaa: «Yaa bãmb sẽn bas m tõog ning mam sẽn kõ bãmba, n ka kelg m noorã yĩnga.

¹³La bãmb loba b nens kɛɛng n maan wa sẽn zems b sũ-keglmã, n waoog Baall-dãmb wa b yaab-rãmbã sẽn dag n zãms bãmbã.

¹⁴Woto yĩnga, maam a Saasẽ-Pãng-Soabã sẽn yaa Israyɛll Wẽnnaamã yetame: Mam na n kõo bãmb zẽed sẽn yaa toog liga tɩ b rɩ, la m kõ-b ko-zẽnem tɩ b yũ.

¹⁵Mam na n kɩtame tɩ b sãeeg n kẽng bu-zẽms bãmb ne b yaab-rãmbã sẽn ka mi sʋka. La m na n kɩtame tɩ b rig bãmb ne zabr sʋʋga, hal tɩ m menes-b zãnga.»

¹⁶Saasẽ-Pãng-Soabã yetame: Tags-y-yã! Bool-y pagb sẽn mi yãbrã tɩ b wa. Kẽng-y n tɩ bool-y sẽn mi-b yãbr sõamã wã tɩ b wa!

¹⁷Bɩ b wa tao-tao n wa wiis tõnd yĩnga. La bɩ d yãb tɩ d nintãmã yi wa ko-bundum.

¹⁸Bala, b wʋmda wiisg sẽn yit Sɩyõ n yetẽ: «Kayto! Tõnd sãamame! Yãnd tara tõndo! Bala, tõnd yi n basa tẽngã. B luba tõnd dotã.

¹⁹Pagba, kelg-y Sẽn-Ka-Saab goamã. Wʋm-y bũmb nins bãmb sẽn yetã! Zãms-y y kom-pugli yãbre, la y zãms y pʋg-taabã wiisgu.

²⁰Kũum tũu tõnd dotã võyẽ n kẽ. A kẽe tõnd do-neebã pʋse. A kɩtame tɩ kamb menem soay zutu, la a kɩt tɩ ra-sãmb menem daas pʋse.

²¹Bɩ foom a Zeremi yeel tɩ maam a Sẽn-Ka-Saab yeelame tɩ kũum na n dʋra tẽng wa birg sẽn be pʋt pʋsẽ, la wa b sẽn kẽeb ki n dʋʋg n bas n loog tɩ ned ka wʋk-a ye!»

²²Sẽn-Ka-Saab yetame: «Bɩ yam soab ra maan sũ-noog ne a yamã ye. Bɩ gãndaoog ra maan sũ-noog ne a gãndaalmã ye. Bɩ arzɛk soab me ra maan sũ-noog ne a arzɛkã ye!

²³Ned sã n dat n maan sũ-noogo, bɩ a maan sũ-noog a sẽn tar yam la a mi maam, la a miẽ tɩ mam yaa Sẽn-Ka-Saab sẽn tʋmd ne nonglem la tɩrlem ne zemsg dũniyã zugã yĩnga. Bala, yaa bõn-kãens n noom maam.» Maam a Sẽn-Ka-Saab n yeele.

²⁴Maam a Sẽn-Ka-Saab yetame: «Wakat n wate, tɩ m na n sɩbg neb nins fãa sẽn kẽ yĩng bãongã:

²⁵Yaa Ezɩpt ne Zʋʋda la Edom ne Amo nebã, la Moaab ne we-raoogã neb nins sẽn kõogd b yɛɛmã. Bala, buud toay-toayã fãa ka kẽ bãong ye, la Israyɛll buudã fãa sũyã ka kẽ bãong ye.»