Read SEBR SÕNGO, 1998 A Zeremi wiisgu 1 Bible Online

A Zeremi wiisgu 1 - SEBR SÕNGO, 1998 bible

A Zeremi wiisgu 1

¹Kayto! Tẽng ning neb wʋsg sẽn dag n be a pʋgã lebga tẽn-vɩʋʋgo. A lebga wa pʋg-kõore. Yẽnda rag n yaa kãseng buudã fãa sʋka, yẽnda rag n yaa rĩm-poaka, n so soolem wʋsgo, la b kẽes-a-la tʋʋm-wɛgl pʋga.

²Yẽnda yãbda yʋngã tõre, la a nintãmã sedgda a yegdsã zutu. Neb nins sẽn dag n nong yẽnda wã, ned baa a ye ka belsd yẽnda ye. Yẽnda zo-rãmbã fãa zãmba yẽnda, b lebga yẽnda bɛɛba.

³B namsa Zʋʋda n yiis-a n kẽng tẽng a to n tɩ kẽes yembd sẽn yaa toog pʋga. Yẽnda zĩnda buud a taab sʋk n ka yã vʋʋsg ye. Neb nins sẽn da rigd yẽnda wã paama yẽnda a sũ-sãangã pʋga.

⁴Sɩyõ soayã bee sũ-sãang pʋga, bala, ned ka leb n be b zut n wat tigr ye. Tẽngã noyã fãa sãamame. A maan-kʋʋdbã wõosdame. A pʋg-sadbã sũy sãamame. A meng tara sũ-toogo.

⁵Yẽnda bɛɛbã tõog-a lame, a bɛɛba zĩi ne yam-gãnega. Bala, Sẽn-Ka-Saab kõo yẽnda sũ-sãanga, a beegrã sẽn yaa wʋsgã yĩnga, la bɛyã yiisa yẽnda kom-bãoonegã n kẽes yembd pʋga.

⁶Sɩyõ tẽn-neerã ziir sɛɛme. A nanambsã yaa wa yãgs sẽn ka yãt yam-maasa, la b ka tar pãng tɩ zoe n põs sẽn digd-a bãmbã ye.

⁷Zeruzalɛm namsgã ne a toogã wakate, yẽnda tẽega bõn-neeb nins fãa yẽnda sẽn dag n tar pĩndã yelle. Bɛyã sẽn lubd a nebã tɩ sõangd kaẽ wã, bɛɛbã yãnda yẽnda n la a lʋɩɩsã.

⁸Zeruzalɛm maana yel-wẽn wʋsgo, rẽ kɩtame t'a lebg bõn-dẽgdo. Neb nins fãa sẽn da waoogd yẽnda wã paoogda yẽnda moasã. Bãmb yãame t'a yaa zaala. La yẽnda meng wẽeda sir n tarda.

⁹A rẽgda bee a fuugã zugu, la yẽnda ka tags yẽnda a sẽn na n yɩ a soab beoog ye. Yẽnda lʋɩɩ yaoolg kãseng pʋga. La ned ka be n na n bels-a ye. Sẽn-Ka-Saabo, ges-y mam namsgã, bala, bɛyã tõogame!

¹⁰Bɛyã tẽega a nug n deeg Zeruzalɛm bõn-sõama wã. Buud a taabã waa n kẽe yẽnda zĩ-sõngã pʋgẽ. Yaa buud ning yãmb sẽn yeel tɩ b ra wa yãmb nebã tiging pʋgẽ wã.

¹¹Yẽnda nebã fãa wõosdame n baood dɩɩbo. Bãmb dɩgsa b bõn-neebã n tek ne rɩɩbo, tɩ b tõe n paam n fãag b yõyã. Sẽn-Ka-Saabo, ges-y-yã, ges-y mam sẽn paamd paoogr to-to.

¹²Yãmb fãa sẽn tũud ka n loogdẽ wã, bɩ y tags n gese. Toog bee sẽn zem toog ning sẽn paam maamã bɩ? Sẽn-Ka-Saab namsa maam daar ning bãmb sũ-puugrã sẽn wɩngã.

¹³Bãmb zĩnda yĩngr n tʋm bugum tɩ sig n dɩ mam kõabã, bãmb tab-b lame. Bãmb ninga gãmbr mam naoã tẽngre. Bãmb kɩtame tɩ mam targ n leb poorẽ. Bãmb kõo maam yam-yoogo, la mam sũur sãamda daar fãa.

¹⁴Bãmb nugã wʋga mam beegrã mam beegrã kala taaba, b zẽkdame n yẽt mam koakoayã. Bãmb kɩtame tɩ mam pãngã sɛ. Sẽn-Ka-Saab rɩka maam n kõ mam sẽn ka tõe-b rãmbã.

¹⁵Zu-soabã basa gãndaad nins fãa sẽn dag n be ne maamã. Bãmb boola tãb-biisã tɩ b wa tigim n zab ne maam n menes mam kom-bɩɩsã. Zu-soabã taba Zʋʋda tẽn-neerã reezẽ rãam wẽkr koglg pʋgẽ.

¹⁶Yaa bãmb yĩng la mam yãbd tɩ m nintãm daagdẽ. Bala, bɛlsd ning sẽn dag n tõe n kɩt tɩ mam vɩɩm yɩ noogã zãaga ne maam. Mam kambã tara sũ-sãanga, bala, bɛyã tõogame.

¹⁷Sɩyõ teesda a nusi, la ned ka bels-a ye. Sẽn-Ka-Saab yeelame tɩ neb nins sẽn gũbg a Zakoob buudã na n yɩɩ bãmb bɛɛba. Zeruzalɛm lebga bõn-dẽgd bãmb sʋka.

¹⁸Zu-soabã yaa tɩrga, yaa maam n kɩɩs bãmb noore. Nebã fãa, m kotame tɩ y kelge, la y ges mam sũ-sãangã. Mam pʋg-sadbã ne m da-sãmbã kẽe yembd pʋga.

¹⁹Mam boola m zo-rãmba, la bãmb zãmba maam. Mam maan-kʋʋdbã ne m kãsem-dãmbã kii tẽngã pʋgẽ, wakat ning b sẽn dag n baood dɩɩb n na n fãag b yõyã.

²⁰Sẽn-Ka-Saabo, ges-y mam toogã. Mam pʋga bendgame. Mam sũurã digda m pʋgẽ. Bala, mam kɩɩsa wʋsgo. Zabr sʋʋg kʋʋ mam kambã soay zutu, la yiyã pʋs me yaa kũum n be be.

²¹B wʋma mam sẽn wẽed siri, la ned ka be sẽn belsd maam ye. Mam bɛɛbã fãa wʋma mam toogã yell n maand sũ-noogo, bala, yaa yãmb n maane. Yãmb kɩtame tɩ daar ning yãmb sẽn yãkã wa, bɩ y kɩt tɩ bãmb me yɩ wa maam.

²²Bɩ y kɩt tɩ bãmb wẽngã fãa wa yãmb taoore, la y maan bãmb wa yãmb sẽn maan maam m yel-wẽnã fãa yĩngã. Bala, mam wẽeda sir wʋsgo, la m sũur sãamame.