Read SEBR SÕNGO, 1998 A Zeremi wiisgu 2 Bible Online

A Zeremi wiisgu 2 - SEBR SÕNGO, 1998 bible

A Zeremi wiisgu 2

¹Kayto! Zu-soabã sũ-puugr pʋga, b luda Sɩyõ tẽn-neerã ne sawato! Zu-soabã tusa Israyɛll ziirã t'a yi saasẽ n wa lʋɩ dũni zugu. Bãmb ka tẽeg b naoã roagendgã yell bãmb sũ-puugrã daar ye.

²Zu-soabã sãama a Zakoob yagensã yiyã fãa n ka zoe bãmb nimbãaneg ye. Bãmb sũ-yikrã pʋga, bãmb luba Zʋʋda tẽn-neerã pãng zĩisi. Bãmb sika soolmã ne a nanambse, n kɩt tɩ b ta tẽng ne paoogre.

³Bãmb sãama Israyɛll pãngã fãa b sũ-kãbrã pʋga. Bãmb fooga b nug-rɩtgã n lob poorẽ n bas bãmb b bɛɛbã taoore. Bãmb widga bug-witim a Zakoob tẽngã pʋg t'a rɩt n gilgd zĩigã fãa.

⁴Bãmb dʋʋsa b tãp wa bɛy sẽn maanda, n zẽk b nug-rɩtg wa ned sẽn maand ne a zabd-n-taaga, n sãam bũmb nins fãa sẽn dag n yaa neerã. Bãmb kiiga b sũ-kãbrã wa bugum Sɩyõ tẽn-neerã roog zugu.

⁵Zu-soabã lebga wa bɛyã. Bãmb sãama Israyɛlle. Bãmb sãama a naam dotã fãa n pãb a pãng zĩisã n lubi. Bãmb kɩtame tɩ Zʋʋda tẽn-neerã wõosgã ne a wiisgã lebg wʋsgo.

⁶Bãmb sãama bãmb doogã wa zẽed zĩiga. Bãmb sãama bãmb sɛk-zĩigã. Sẽn-Ka-Saab kɩtame tɩ b yĩm tigr la vʋʋsg rayã Sɩyõ tẽngã pʋga. Bãmb sũ-yik-kãsengã pʋgẽ, bãmb paooga rĩm-dãmbã ne maan-kʋʋdbã.

⁷Sẽn-Ka-Saab yam yii ne bãmb tẽn-kugrã, bãmb ka leb n nand bãmb sɛk-zĩigã. Bãmb dɩka Sɩyõ na-yirã lalsã n bas ne bɛyã. Kelems yika Sẽn-Ka-Saab roog pʋgẽ wa tigr daare.

⁸Sẽn-Ka-Saab yãka yam n dat n sãam Sɩyõ tẽn-neerã lalse. Bãmb tẽega wĩiri, la b ka yõbg b nugã hal tɩ b sãam fãa. Bãmb kɩtame tɩ pãng zĩigã ne lalgã siigi. Bãmb ned kam fãa lʋɩɩme.

⁹A kʋɩlemsã suda tẽngã pʋga. Bãmb sãama a ra-bɩlmã, b kaoo a kʋɩlen-kuyã. A rĩmã ne a nanambsã bee buud toay-toay sʋka. Tõog ka leb n beẽ ye. Yẽnda Wẽnnaamã no-rɛɛsdb ka leb n paamd vẽnegre sẽn yit Sẽn-Ka-Saab nengẽ ye.

¹⁰Sɩyõ tẽn-neerã kãsem-dãmbã zĩi tẽnga, bãmb mukame. Bãmb yuga b zut tom. Bãmb yeelga boto. Zeruzalɛm pʋg-sadbã sulga b zut tẽnga.

¹¹Mam yãbame tɩ ninã pãng sɛ. Mam sũur pida ne sũ-sãanga. Mam yam bondga m pʋgẽ, mam nebã tẽn-neerã sẽn sãamdã yĩnga. Bala, kom-bãoonegã ne nusẽ kambã sobdame n lʋɩt tẽng zĩ-sõsdsẽ.

¹²Kambã sẽn sobd n lʋɩt tẽngã soay zut wa neb sẽn paam poglgã, la b sẽn be b ma-rãmbã nusẽ n dat n ki wã, b sokda b ma-rãmbã yaa: «Ki ne reezẽ rãam bee yɛɛnẽ?»

¹³Zeruzalɛm nebã, mam na n yeelame tɩ bõe ne yãmb yellã? Mam na n maka yãmb ne bõe? Sɩyõ tẽn-neere, mam na n yãnda bõe sẽn zem foom, la mam na n yãnda bõe belsg n bels foom? Bala, fo sãoongã yaa kãseng wa ko-kãsenga. Ãnda n na n tõog n maag foom?

¹⁴Fo no-rɛɛsdbã paama zĩrẽ vẽnegre sẽn yaa zaalem n kõ foom. Bãmb ka puk f yel-wẽnã n fãag foom ne yembd ye. Bãmb togsa foom zĩrẽ bãngr goam sẽn yaa belgre.

¹⁵Neb nins fãa sẽn loogd be wã pãbda b nus yãmb wɛɛngẽ. Bãmb fɩɩndame, la b gõmsd b zut Zeruzalɛm tẽn-neerã wɛɛngẽ n yetẽ: «Tẽng ning b sẽn boond tɩ ‹neer zãngã› la dũniyã gill sũ-noogã la woto bɩ?»

¹⁶Fo bɛɛbã fãa yaagda b noy n gomd foom wẽnga. Bãmb fɩɩndame, n wãbd b yẽna. Bãmb yetame: «Tõnd vela yẽnda. Yaa ra-kãngã la tõnd sɩd da gũuda. Tõnd ta-a lame! Tõnd yãnd-a lame!»

¹⁷Sẽn-Ka-Saab maana bãmb sẽn dag n dat n maan bũmb ningã. Bãmb pidsa b gomdã bãmb sẽn dag n togs hal kʋdem-wẽndẽ wã. Bãmb sãamda yãmb tɩ nimbãan-zoeer kaẽ ye. Bãmb kɩtame tɩ yãmb bɛɛbã maan sũ-noog yãmb sãoongã yĩnga. Bãmb paasa yãmb namsdbã pãnga.

¹⁸Bãmb boonda Zu-soabã ne b sũyã fãa. Sɩyõ tẽn-neerã lalga, bɩ f bas f nintãm tɩ raag wa ko-zoetem wĩntoog ne yʋngo. Ra kõ f meng vʋʋsg ye. Ra bas f ninã tɩ b vʋʋs ye.

¹⁹Yiki! Kelem yʋng gũudum wakat sɩngr n togs f pʋgã fãa Zu-soabã taoore. Zẽk f nus n tees bãmb n kos f kom-bãoonegã vɩɩm yĩnga, kom sẽn tar bãmb tɩ b sobd n lʋɩt soayã fãa zutã yĩnga.

²⁰Sẽn-Ka-Saabo, tags-y n ges-y-yã. Yaa ãnda la yãmb sẽn maand woto wã? A zemsame tɩ pagbã wãb kamb nins b sẽn dogã bɩ, kom-bãooneg nins bãmb sẽn sɩd nongã? A zemsame tɩ b kʋ maan-kʋʋdbã ne Wẽnnaam no-rɛɛsdbã Zu-soabã sɛk-zĩigã pʋgẽ bɩ?

²¹Nin-kẽembã ne kom-pogdã gãee tẽngã soay zutu. B kʋʋ mam da-sãmbã ne m pʋg-sadbã ne zabr sʋʋga. Yaa yãmb n kʋ bãmb yãmb sũ-puugrã daare. Yãmb kooda bãmb n ka bas ba a yembr ye.

²²Yãmb boola mam pelen-yɩgrã t'a yi zĩigã fãa n wa, wa tigr daare. Daar ning Sẽn-Ka-Saab sũur sẽn puugã, ned ka põse, wall kell ye. Mam bɛyã sãama neb nins mam sẽn dag n wub n nongẽ wã.