Read SEBR SÕNGO, 1998 A Ezekɩyɛlle 13 Bible Online

A Ezekɩyɛlle 13 - SEBR SÕNGO, 1998 bible

A Ezekɩyɛlle 13

¹Sẽn-Ka-Saab goma ne maam n yeele:

²«Ninsaala, gom pĩnd-n-bãngr goam Israyɛll no-rɛɛsdbã wɛɛngẽ.» Bɩ f yeel no-rɛɛsdb nins sẽn togsd b mens tagsgã yaa: «Kelg-y Sẽn-Ka-Saab koɛɛga!

³Ade, Zu-soab a Sẽn-Ka-Saab yetame: ‹No-rɛɛsdb nins sẽn yaa yalemb n togsd b mens tagsgo, n yaool n ka yã baa fɩ wã na n paama toogo!›

⁴Israyɛll nebã, yãmb no-rɛɛsdbã wẽnda we-baas sẽn be rabood sʋka!

⁵Yãmb ka kẽng lalgã zĩis nins sẽn lʋɩ wã, n tɩ lebs n me n gũbg Israyɛll nebã n sõng-b ne zabrã Sẽn-Ka-Saab daarã daar ye.»

⁶Bãmb vẽnegrã yaa belgre, la bãmb sẽn togsdã yaa zĩrẽ-beedo. Bãmb yetame: «Sẽn-Ka-Saab yetame tɩ Sẽn-Ka-Saab yaool n ka tʋm bãmb ye. La bãmb yaool n gũuda b goamã pidsgu.

⁷Vẽnegr nins yãmb sẽn tarã ka belgr sɩda? Yãmb goamã ka zĩrẽ sɩda? Yãmb gomdame n yetẽ tɩ ad Sẽn-Ka-Saab sẽn yeta! Tɩ mam yaool n ka yeel tɩ bũmb ye.»

⁸Woto yĩnga, Zu-soab a Sẽn-Ka-Saab yetame: «Yãmb goamã sẽn yaa belgr tɩ y vẽnegrã yaa zĩrẽ-beedã yĩnga, mam na n zaba ne yãmba. Maam a Zu-soab a Sẽn-Ka-Saab n yeele.

⁹Mam na n sɩbga no-rɛɛsdb nins vẽnegr sẽn yaa belgrã, la b togsd zĩrẽ-be-goamã. Bãmb ka na n leb n paam zĩig mam nebã tiging pʋg ye, b ka na n gʋls bãmb yʋy Israyɛll buudã sebr pʋgẽ ye, la bãmb ka na n leb n tɩ kẽ Israyɛll tẽngã pʋg ye. Woto, yãmb na bãng tɩ mam yaa Zu-soab a Sẽn-Ka-Saabo.»

¹⁰Bãmb sẽn tudgd mam nebã n yetẽ tɩ vɩ-bãan beeme, tɩ vɩ-bãan yaool n kaẽ wã yĩng kɩtame tɩ mam nebã met lalga, tɩ bãmb pʋgd n bond ne goore.

¹¹Woto, bɩ f yeel neb nins sẽn bond-b lalgã ne goorã yaa: «Lalgã na n lʋɩɩme! Sa-kẽeng n wate, la sapɩlmã na n dʋʋgame. La sob-bɛd n na n kɩt tɩ fãa wã.

¹²Dẽ yĩnga, lalgã sã n lʋɩ, b ka na n sok yãmb n ges goorã y sẽn bolgã bee yɛɛnẽ sɩda?»

¹³Woto yĩnga, Zu-soab a Sẽn-Ka-Saab yetame: «Mam sũ-yikrã pʋga, mam na n kɩtame tɩ sob-bɛd fugi. La m sũ-puugrã pʋga, sa-kẽeng n na n wa, la sapɩlem n na n dʋʋg ne sũ-puugri, n wa ne sãoongo.

¹⁴Mam na n pãba lalg ning yãmb sẽn dag n bol ne goorã n wã, mam na n lub-a-la tẽnga, t'a yẽbgrã puki. La a n na n lʋɩɩme n zãb yãmb n menes-y zãnga. Woto la yãmb na n bãng tɩ mam yaa Sẽn-Ka-Saabo.»

¹⁵Mam na n basame tɩ m sũ-puugrã maan a tʋʋmd ne lalgã, la ne neb nins sẽn bond-b lalgã ne goorã n tãag a tɛka. La m na n yeela yãmb yaa: «Lalgã ka leb n be ye! Neb nins sẽn bond-a wã ka leb n be ye.

¹⁶Israyɛll no-rɛɛsdb nins sẽn dag n gomd Zeruzalɛm wɛɛngẽ, la b yetẽ tɩ b yãnda vẽnegr n yetẽ tɩ vɩ-bãan na n zĩndame tɩ vɩ-bãan yaool n kaẽ wã, ka leb n be ye! Maam a Zu-soab a Sẽn-Ka-Saab n yeele.»

¹⁷Foom a ninsaala, wẽnemd f neng n tees f buudã kom-pugli sẽn togsd b mens tagsgã, n togs pĩnd-n-bãngr goam b wɛɛngẽ!

¹⁸Yeel tɩ Zu-soab a Sẽn-Ka-Saab yetame: «Pagb nins sẽn sẽt gãn tɩ nebã tar n loet b nug-sũgsã, la b wʋgd zug pɛɛl neb buud fãa yĩngã, n dat n paam n soog b vɩɩmã na n paama toogo! Yãmb maanda a woto n dat n soog mam nebã vɩɩm, n yaool n kogend y rẽndã bɩ?

¹⁹Nug pʋgẽ Oorz ne rɩɩb bilf yĩnga, yãmb paoogda maam m nebã taoore. Yãmb yagda zĩrẽ ne mam nebã tɩ b kelgd yãmb zirẽ-beedã, la y kɩtdẽ tɩ b kʋʋd neb nins sẽn dag n ka tog n ki wã, la y kɩtdẽ tɩ b basd b sẽn dag n tog n kʋ-b rãmbã tɩ b vɩɩmde.»

²⁰Woto yĩnga, ad Zu-soab a Sẽn-Ka-Saab sẽn yeta: «Mam kisa yãmb nusã gãnã y sẽn tar n yõgd m nebã wa liuuli wã. Mam na n deega bãmb ne pãng yãmb nugẽ, la m fãag neb nins yãmb sẽn yõgd wa liuuli wã.

²¹Mam na n pãrsa y pɛɛlã me, la m fãag m nebã y nugẽ. Yãmb ka na n leb n tall bõn-kãens tɩ yɩ bẽdg yãmb nusẽ ye. Woto la yãmb na n bãng tɩ mam yaa Sẽn-Ka-Saabo.

²²Yãmb sẽn boogd nin-tɩrg raood ne y zirẽ-beedã, tɩ mam yaool n ka sãam a sũurã yĩnga, la yãmb sẽn paasd nin-wẽng raood t'a ka basd a manesem-wẽngã n paam n vɩɩmdã yĩnga,

²³yãmb ka na n leb n paam zĩrẽ vẽnegre, la y ka na n leb togs zĩrẽ pĩnd-n-bãngr goam ye. Mam na n fãaga m nebã yãmb nusẽ. Woto, yãmb na bãng tɩ mam yaa Sẽn-Ka-Saabo.»