Read SEBR SÕNGO, 1998 A Ezekɩyɛlle 22 Bible Online

A Ezekɩyɛlle 22 - SEBR SÕNGO, 1998 bible

A Ezekɩyɛlle 22

¹Sẽn-Ka-Saab goma ne maam n yeele:

²«Foom a ninsaala, fo na n kaoo bʋʋdã bɩ? Fo na n kaoo tẽng ning sẽn daagd zɩɩmã bʋʋd bɩ? Wilg yẽnda a tʋʋm-beedã fãa!

³Yeel tɩ maam a Zu-soab a Sẽn-Ka-Saab yetame: ‹Ad tẽng sẽn daagd zɩɩm a pʋgẽ, n na n kɩt t'a daarã ta, la a maand wẽn-naands n dẽgemd a menga!›

⁴Fo raaga zɩɩm n mong f meng bʋʋm, la f rẽgem f meng ne wẽn-naandsã fo sẽn maanã. Fo sẽn maan a woto wã kɩtame tɩ f daarã na n ta tao-tao, la fo wakatã ta a tɛka. Yaa woto yĩng n kɩt tɩ mam bas tɩ buud a taabã paoog foom, la m bas tɩ tẽmsã fãa yaal foom.

⁵Sẽn pẽ-b foomã ne sẽn zãr-b ne foomã na n yaala foom, fo yʋʋrã sẽn sãamã ne f tʋʋm-lɛblã sẽn yaa wʋsgã yĩnga.

⁶Ad Israyɛll nanambsã sẽn yaa to-to: Bãmb ned kam fãa rɩkda a pãngã n daagd zɩɩm fo pʋgẽ.

⁷Ned toog ka leb n be ne a ba ne a ma fo pʋgẽ ye. B maanda sãambã pãng fo pʋgẽ. B kɩtdame tɩ kɩɩbs ne pʋg-kõap tʋmd fo pʋgẽ tɩ b ka yaood-b ye.

⁸Fo paoogda bũmb nins sẽn welg toor mam yĩngã, fo rẽgemda mam vʋʋsg rayã.

⁹Tẽn-kãn-neb n be fo pʋgẽ n kãnd neb tɩ b raagd taab zɩɩm. Neb n dɩt maand nemd tãmsã zut fo pʋgẽ. La b maand yãn-tʋʋm f pʋgẽ.

¹⁰Neb n gãe b ba-rãmb pagb fo pʋgẽ. Neb n yõgd pagb b sẽn yãnd b kiuug n lebg rẽgd wakate.

¹¹Rao fãa maanda yel-beed ne a to paga, rao fãa maanda yãn-tʋʋm n dẽgemd a bi-paga. Ned fãa yõgda a tão-poak sẽn yaa a baaba bi-puglã.

¹²Neb n sakd n deegd kũun n daagd zɩɩm fo pʋgẽ. Fo pengda ligd n modgdẽ tɩ b lebs-f ne roaglenga. Fo maanda f taab pãng n wẽgd-ba, n yaool n yĩmd mam yelle. Maam a Zu-soab a Sẽn-Ka-Saab n yeele.»

¹³«Ade, mam na n pãba nug-pogs wẽgbã fo sẽn maanã yĩnga, la zɩɩmã b sẽn daag fo pʋgẽ wã yĩnga.

¹⁴Dẽ wã, daar ning mam sẽn na n sɩbg foomã, fo pɛlg na n yɩɩ kãenkãe sɩda? Fo nusã na n talla pãng sɩda? Mam yaa Zu-soab a Sẽn-Ka-Saabo, yaa maam n yeele, la m na n maana wa m sẽn yeelã.

¹⁵Mam na n kɩtame tɩ f sãeeg n kẽ bu-zẽmsã sʋka, n kɩt tɩ f sãeeg n zĩnd tẽmsã fãa pʋse, mam na n kɩtame tɩ f rẽgdã loog zãng n bas-fo.

¹⁶Fo mengã na n dẽgma f meng buud a taabã nifẽ, woto, fo na bãng tɩ mam yaa Sẽn-Ka-Saabo.»

¹⁷Sẽn-Ka-Saab goma ne maam n yeele:

¹⁸«Foom a ninsaala, Israyɛll buudã wẽnda wãy mam nifẽ. Bãmb fãa wẽnda zũudu, b wẽnda waasdo, b wẽnda kutu, b wẽnda namd b sẽn yẽneg boaagẽ. Bãmb yaa wanzuri wãyã.

¹⁹Woto yĩnga, maam a Zu-soab a Sẽn-Ka-Saab yetame: ‹Yãmb fãa sẽn lebg wa wãyã yĩnga, mam na n tigma yãmb Zeruzalɛm pʋgẽ.›

²⁰B sẽn ningd wanzuri bɩ zũud wall kutu, wall waasd bɩ namd boaagẽ n zugd to-to wã, woto me, mam na n tigma yãmb m sũ-yikrã ne m sũ-puugrã pʋga, m na n zama yãmba, n yẽneg-yã.

²¹Mam na n zama yãmb n zug m sũ-puugrã bugum t'a rɩ yãmba, n yẽneg-y tẽngã pʋga.

²²Wanzuri sẽn yẽnegd to-to boaagẽ wã, b na n yẽnega yãmb tẽngã pʋgẽ me a woto. Dẽ, yãmb na bãng tɩ yaa maam a Sẽn-Ka-Saab n sik m sũ-puugrã yãmb zugu.»

²³Sẽn-Ka-Saab goma ne maam n yeele:

²⁴«Foom a ninsaala, yeel Zeruzalɛm yaa: ‹Fo yaa tẽng sẽn ka paam yɩlgre, la sẽn ka paam tɩ sa-koom tosg a zug sũ-puugrã daar ye.

²⁵Yẽnda no-rɛɛsdbã seta taab a pʋgẽ. Gɩgemd sẽn kelemd la a zendemd rũng a sẽn yõkã to-to wã, woto me, yẽnda no-rɛɛsdbã kʋʋda nebã, n wʋkd b arzegsã, ne b te-sõama wã, n kɩtdẽ tɩ pʋg-kõapã sõor lebgd wʋsg tẽngã pʋgẽ.

²⁶Yẽndã maan-kʋʋdbã kɩɩsda mam tõodã, la b rẽgemd bũmb nins sẽn welg toor mam yĩngã. Bãmb ka mi bũmb ning sẽn welg toorã ne bũmb ning sẽn yaa rẽgdã n bak ye. Bãmb ka kɩtd tɩ nebã bãng bũmb ning sẽn yaa rẽgdã ne bũmb ning sẽn yaa yɩlemdã n bak ye. Bãmb toog ka ne mam vʋʋsg rayã ye, bãmb paooga m yʋʋrã bãmb sʋka.

²⁷Yẽnda nanambsã bee a pʋg wa rigd-n-yĩids sẽn zendemd rũng b sẽn yõke. Bãmb daagda zɩɩm, b menesda nebã, sẽn na n yɩl n tõog n maan b wẽgbã.

²⁸Yẽnda no-rɛɛsdbã tara goor b sẽn bonda, b tara belgr vẽnegre, ne zĩrẽ bagre. Bãmb yetame: Ade, Zu-soab a Sẽn-Ka-Saab yetame!› Tɩ Sẽn-Ka-Saab yaool n ka yeel tɩ bũmb ye.

²⁹Tẽngã neb maanda taab pãnga, bãmb wẽgda taaba, bãmb kɩtdame tɩ naong rãmb ne nimbãan-neb tʋmdẽ tɩ b ka yaood-ba, la b maand sãan pãng n ka tũud tɩrlem sor ye.

³⁰Mam baoo ned bãmb sʋkã sẽn na n me lalga, ned sẽn na n yals mam taoor lalgã võorẽ, n yõk maam sɛɛg tẽngã yĩnga, tɩ m da sãam-a, la mam ka yãnd ye.

³¹Mam sikda m sũ-yikrã bãmb zugu, mam menesda bãmb ne m sũ-puugrã bugum. Mam na n kɩtame tɩ b yel-manesmã taal lebg n lʋɩ b zugu. Maam a Zu-soab a Sẽn-Ka-Saab n yeele.»