Read SEBR SÕNGO, 1998 A Ezekɩyɛlle 28 Bible Online

A Ezekɩyɛlle 28 - SEBR SÕNGO, 1998 bible

A Ezekɩyɛlle 28

¹Sẽn-Ka-Saab goma ne maam n yeele:

²«Ninsaala, yeel Tɩɩr naabã tɩ Zu-soab a Sẽn-Ka-Saab yetame: ‹Fo wuka f meng n yeele: Mam yaa wẽnnaam, mam zĩi wẽnnaam-dãmbã sʋka, ko-kãsemsã sʋka.› Fo yaool n ka wẽnnaam ye. Fo yaa ninsaal bala. Fo rɩkda f tagsgã wa wẽnnaam tagsgo!

³Ade, fo tara yam n yɩɩd a Dãniyɛlle, la bũmb ba a yembr ka solg ne foom ye.

⁴Fo sẽn tar yam ne bãngrã yĩnga, fo paama arzegse. Fo paama sãnem ne wanzuri n bĩng f laogã roogẽ.

⁵Fo sẽn mi leebg sõama wã yĩnga, fo arzegsã lebga wʋsgo. La fo wuka f meng f arzɛkã yĩnga.»

⁶Bõn-kãng yĩnga, maam a Zu-soab a Sẽn-Ka-Saab yetame: «Fo sẽn tagsd tɩ fo tagsgã yaa wa wẽnnaam tagsgã yĩnga,

⁷mam na n kɩtame tɩ nin-sãams wa zab ne foom. Bãmb yaa nin-toos bu-zẽmsã sʋka. Bãmb na n wõ b zabr sʋʋse, n sãam fo yamã sẽn tar ra-sãndã, la b rẽgem f ziirã.

⁸Bãmb na n kɩtame tɩ f sig bokẽ, la fo na n kii kũ-miig ko-kãsemsã sʋka.

⁹Fo kʋʋdbã taoore, fo tõe n leb n yeelame tɩ fo yaa wẽnnaam sɩda? Fo kʋʋdbã nifẽ, fo yaa ninsaal bala, fo ka wẽnnaam ye.

¹⁰Fo na n kii nin-sãamsã sẽn ka kẽ bãongã nugẽ. Bala, yaa maam n gome. Maam a Zu-soab a Sẽn-Ka-Saab n yeele.»

¹¹Sẽn-Ka-Saab goma ne maam n yeele:

¹²«Ninsaala, pʋd sũ-sãang yɩɩll Tɩɩr dĩmã yĩng n yeel tɩ maam a Zu-soab a Sẽn-Ka-Saab yetame: ‹Fo rag n zemsa zãnga, n pid ne yam n yaa neer zãnga.›

¹³Fo rag n bee Wẽnnaam zẽedã zĩigẽ Edɛn. Fo rag n zera f futã ne kug-sõama buud toor-toore: Yaa sardoande, topaaze, diyama, kirzoliti, onigsi, zaspe, lapiis-lazuli, ɛskarbukli, emeroode, n paas sãnem. F sɩlsãgsã ne f wɩɩsã rag n be f yĩng f naanegã daare.

¹⁴Fo rag n yaa serubẽ sẽn yaa gũuda, tɩ f pɩgsã yɛdge. Mam dag n ninga foom maam a Wẽnnaam tãn-sõngã zugu, tɩ f kẽnd kug-sõama sẽn wit bugum sʋka.

¹⁵Fo manesmã rag n zemsa zãng f naanegã wakate, hal n tãag daar ning b sẽn yã tɩ fo maanda wẽngã.

¹⁶Fo leebgã sẽn paam pãngã yĩnga, fo sũurã rag n pida ne wẽnga, la fo maana yel-wẽnã. Woto yĩnga, serubẽ sẽn yaa gũuda, mam digda foom n yiisd maam a Wẽnnaam tãn-sõngẽ wã, la mam na n menesa foom n kɩt tɩ f ra leb n zĩnd kug-sõama sẽn wit bugmã sʋk ye.

¹⁷Fo ra-sãndã yĩnga, fo wuka f menga. La fo ziirã yĩnga, fo sãama f yamã. Woto yĩnga, mam lobda foom tẽnga, n kɩt tɩ f lebg rĩm-dãmb a taabã bõn-gɛtla.

¹⁸Fo kongrã sẽn yaa wʋsgã, ne fo sẽn maan wẽng f leebgã pʋgẽ wã yĩnga, fo rẽgma f pʋʋsg zĩisã. Rẽ yĩngã, mam na n kɩtame tɩ bugum yi fo pʋgẽ n dɩ-fo, la m kɩt tɩ f lebg tompeglem dũni zugu, neb nins fãa sẽn get foomã nifẽ.

¹⁹Buud a taabã neb nins fãa sẽn mi foomã yɛɛsa wʋsg fo yĩnga. Fo lebga bũmb sẽn wat ne pelen-yɩka. Fo ka leb n beẽ, la f kõn tol n leb n zĩnd abada.»

²⁰Sẽn-Ka-Saab goma ne maam n yeele:

²¹«Ninsaala, wẽnemd f neng n tees Sɩdõ tẽngã sẽnẽ n togs pĩnd-n-bãngr goam a yĩnga.

²²Yeel bãmb tɩ maam a Zu-soab a Sẽn-Ka-Saab yetame yaa: ‹Sɩdõ, mam zabda ne foom! Mam na n wilga m ziirã fo pʋgẽ.› Mam sã n wa na n sɩbg yẽnda, b na bãng tɩ mam yaa Zu-soab a Sẽn-Ka-Saabo. Mam na n wilga m pʋ-peelmã yẽnda pʋgẽ.

²³Mam na n tʋma bã-loangdg beenẽ, la m kɩt tɩ zɩɩm daag yẽnda soayã zutu. B na n yii zĩig zãng n wa zab ne yẽnda ne zabr sʋʋga, n kʋ neb wʋsg n dʋʋg tẽngã pʋga. Woto la b na n bãng tɩ mam yaa Sẽn-Ka-Saabo.»

²⁴Dẽ, tẽms nins fãa sẽn karg n gũbg Israyɛll n paoogd-a wã sʋka, yẽnda kõn leb n yɩ gõ-payãndga, wall gõaag sẽn kõsd tɩ zabdẽ, Israyɛll yĩng ye. Woto la b na n bãng tɩ mam yaa Zu-soab a Sẽn-Ka-Saabo.

²⁵Ade, Zu-soab a Sẽn-Ka-Saab yetame: «Mam sã n wa yiis Israyɛll buudã nebã sẽn sãeeg n be buud a taabã sʋkã n wa tigim-ba, mam na n wilga m pʋ-peelmã ne bãmb buud a taabã fãa nifẽ. Bãmb na n zĩnda b tẽngẽ wã, tẽng ning mam sẽn dag n kõ m tʋmtʋmd a Zakoobã.

²⁶Israyɛll buudã neb na n zĩnda beenẽ ne bãane, n me roto, la b sel reezẽ tɩɩse. Mam sã n wa sɩbg neb nins sẽn gũbg Israyɛll n dag n paoogd-a wã, Israyɛll buudã nebã na n zĩnda beenẽ ne bãane. Woto la b na n bãng tɩ mam yaa Sẽn-Ka-Saab sẽn yaa bãmb Wẽnnaam.»