Read SEBR SÕNGO, 1998 A Ezekɩyɛlle 3 Bible Online

A Ezekɩyɛlle 3 - SEBR SÕNGO, 1998 bible

A Ezekɩyɛlle 3

¹Dẽ, sẽn dag n gomd-a ne maamã yeelame yaa: «Ninsaala, wãb bũmb ning fo sẽn ne wã, reeg seb-pind-kãngã n wãbe! La f kẽng n tɩ gom ne Israyɛll nebã.»

²La mam yaaga m noorã, t'a kɩt tɩ mam wãb sebrã.

³La yẽnda yeela maam yaa: «Ninsaala, wãb sebr ning mam sẽn kõ foomã n pids f pʋga!» La mam wãba sebrã, la a yɩɩ noog mam noorẽ wã wa sɩɩdo.

⁴A leb n yeela maam yaa: «Ninsaala, kẽng Israyɛll buudã nengẽ, n tɩ togs-b mam goamã.

⁵Bala, ka buud sẽn gomd goam fo sẽn ka mi, wall goam fo sẽn ka tõe n wʋm a võor nengẽ la mam tʋmd foom ye. Yaa Israyɛll buudã nengẽ.

⁶Ka buud toor-toor sẽn gomd goam fo sẽn ka mi, wall goam fo sẽn ka tõe n wʋm a võor nengẽ la mam tʋmd foom ye. Sã n dag n yaẽ nin-bãmb nengẽ la mam tʋm foom, b rag n na n kelgẽ-la foom.

⁷La Israyɛll buudã ka na n dat n kelg foom ye, bãmb sẽn ka rat n kelg maamã yĩnga. Bala, Israyɛll buudã fãa yaa tõatba, n yaa sũ-keglem dãmba.

⁸Ade, mam na n kɩtame tɩ f nengã yɩ kɛgenga, wa bãmb dẽndã, la m kɩt tɩ f yɩ sũ-keglem soab wa bãmba.

⁹Mam na n kɩtame tɩ f nengã kʋɩ wa diyaama[1] sẽn yaa kɛgeng n yɩɩd pĩigã. Ra zoe-b ye, la f ra bas tɩ b kẽes-f rabeem ye. Bala, b yaa buud sẽn yaa tõata.»

¹⁰Sẽn dag n gomd-a ne maamã yeela maam yaa: «Ninsaala, yok f tʋb n kelg goam nins mam sẽn togsd foomã, n dɩk-a n bĩng f sũurẽ.

¹¹Yik n kẽng f buudã neb sẽn be yembd pʋgã nengẽ n tɩ gom ne bãmba. B kelgẽ woo, b ka kelg woo, bɩ f yeel-b tɩ Zu-soab a Sẽn-Ka-Saab n yeta.»

¹²Dẽ zugẽ, Sɩɩgã zẽka maam, la mam wʋma koe-kãseng mam poorẽ wã sẽn yet yaa: «Bɩ Sẽn-Ka-Saab ziirã paam pẽgre, b sẽn beẽ wã pʋga.»

¹³La mam wʋma bõn-vɩɩs a naasã pɩgsã sẽn pãbd taab bʋrgo, la ruzãnt-rãmbã bʋrgo, la koe-kãseng sẽn sãta.

¹⁴Sɩɩgã zẽka maam n tall n looge. La mam looga ne sũ-toogo, la sũ-puugri, la Sẽn-Ka-Saab nug sẽn tar pãngã rag n sooga maam.

¹⁵La mam taa yembs nins sẽn be Tɛll-Avɩɩv tẽngã sẽn be Kebaar kʋɩlgã noorã nengẽ, la mam paa bãmb sʋk beenẽ rasem a yopoe ne sũ-sãan-kãsenga.

¹⁶La rasem a yopoe wã zugẽ, Sẽn-Ka-Saab goma ne maam n yeele:

¹⁷«Ninsaala, mam kɩtame tɩ fo lebg gũud Israyɛll buudã yĩnga. Kelg gomd ning sẽn na n yi mam noorẽ wã, n keoog-b n kõ-ma.

¹⁸Mam sã n yeel nin-wẽng t'a na n kiime, tɩ fo ka keoog-a, fo sã n ka gome, n keoog nin-wẽngã t'a bas a manesem-wẽngã n fãag a vɩɩmã, a na n ki a kongrã pʋga, la mam na n ning foom taal a zɩɩmã raagr yĩnga.

¹⁹La fo sã n keoog nin-wẽngã t'a baas n ka bas a manesem-wẽngã ne a so-wẽngã, yẽnda na n ki a kongrã pʋga, taal ka nan zĩnd fo zug ye.

²⁰Nin-tɩrg sã n bas a tɩrlmã, n maan wẽnga, mam na n ninga kug-lakdg yẽnda taoore, t'a lak n lʋɩ n ki. Fo sã n ka keoog-a, a na n ki-a yel-wẽnã pʋga. B ka na n leb n tẽeg tɩrlem tʋʋm nins yẽnda sẽn dag n maanã yell ye. La mam na n ninga foom taal a sẽn ki wã yĩnga.

²¹La fo sã n keoog nin-tɩrg n yeel-a t'a ra maan yel-wẽnã, t'a sak n ka maan yel-wẽnã, yẽnda na n põsame n vɩɩmde, a sẽn paam keoogrã yĩnga, la fo na n põsame.»

²²La beenẽ, Sẽn-Ka-Saab nugã leb n siga mam zugu. La Sẽn-Ka-Saab yeela maam yaa: «Yi n kẽng tãn-longẽ wã, tɩ m na n goma ne-f beenẽ.»

²³Dẽ, mam yi n kẽnga tãn-longẽ wã, la mam yãnda Sẽn-Ka-Saab ziirã sẽn be beenẽ, wa mam sẽn dag n yãnd-a Kebaar kʋɩlgã noorã. Dẽ, mam lʋɩɩme n fõgen m neng tẽnga.

²⁴Sɩɩgã kẽe maam n kɩt tɩ mam yik n yals yĩngri. La a yeel-a maam yaa: «Kẽng n tɩ pag f meng f roogẽ wã.

²⁵Foom a ninsaala, b na n sẽba foom ne wĩya, tɩ fo ra yi n kẽng bãmb sʋk ye.

²⁶La mam na n kɩtame tɩ fo zelemdã tabend f ragsendakã, tɩ f lebg muk n ka tõe n leng-b ye. Bala, bãmb yaa buud sẽn yaa tõata.

²⁷La mam sã n wa gom ne foom, m na n laka f zelemdã tɩ f yeel-b yaa: ‹Ade, Zu-soab a Sẽn-Ka-Saab yetame: Sẽn na n kelg-a bɩ a kelge, la sẽn ka rat n kelg-a bɩ a ra kelg ye. Bala, bãmb yaa buud sẽn yaa tõata.› »