Read SEBR SÕNGO, 1998 A Ezekɩyɛlle 34 Bible Online

A Ezekɩyɛlle 34 - SEBR SÕNGO, 1998 bible

A Ezekɩyɛlle 34

¹Sẽn-Ka-Saab goma ne maam n yeele:

²«Ninsaala, togs Israyɛll pe-kɩɩmbã pĩnd-n-bãngr goam n yeel tɩ m yaa Zu-soaba, la m yetame: ‹Israyɛll pe-kɩɩmbã na n paama toogo. Bala, bãmb dɩlgda b mens n basd piisã! La yaool n yaa pe-kɩɩmbã n dag n tog n dɩlg piisã.

³Yãmb dɩlgda y mens ne piisã bĩisim, la y yeelgd fut sẽn maan ne piisã kõbdo, la y kʋʋd pe-nobdsã n wãbdẽ.

⁴Yãmb ka ges pe-wagã yell n paas-b pãng ye. Yãmb ka tɩbs bãad-dãmbã, la sẽn pogl-bã ye. Yãmb ka lek piis nins sẽn dag n bʋdgã ye, la y ka bao sẽn dag n menem-bã ye. Yãmb soog-b-la ne pãng la weoogre.

⁵Woto, pe-kɩɩm sẽn ka be wã yĩnga, piisã sãeegame n lebg we-rũms fãa rɩɩbo.

⁶Mam piisã sãeegã tãmsã la kunkubã fãa zutu, mam piisã sãeega zĩis fãa dũniyã zugu, la ned ba a ye ka be sẽn get b yelle, ned ba a yembr ka baood-ba.› »

⁷Bõn-kãng yĩnga, Israyɛll pe-kɩɩmba, kelg-y Sẽn-Ka-Saab sẽn yeta:

⁸«Maam a Sẽn-Ka-Saab sẽn vɩ wã wẽendame n yetẽ: Hakɩɩka! Mam piisã sẽn sãamã yĩnga, pe-kɩɩmbã sẽn bas m piisã tɩ b yɩ we-rũms rɩɩbã yĩnga, la b sẽn dag n ka get b yellã yĩnga, piisã lebga we-rũms rɩɩbo. M pe-kɩɩmbã ka ges b yell ye. B basa piisã gesg n ges b meng yelle.»

⁹Woto yĩnga, Israyɛll pe-kɩɩmba, kelg-y Sẽn-Ka-Saabo!

¹⁰Ad maam a Zu-soab a Sẽn-Ka-Saab sẽn yeta: «M na n zaba ne-yã, la m na n deega m piisã n ka leb n bas tɩ y zã m piisã, n dɩlg y mens bal ye. M na n fãaga m piisã y noorẽ wã, la b kõn leb n yɩ yãmb dɩɩb ye.»

¹¹Ad maam a Zu-soab a Sẽn-Ka-Saab sẽn yeta: «Moasã, mam meng n na n ges m piisã yell m toore, la m kɩɩm-ba.

¹²Wa piis sẽn mi n sãeeg tɩ pe-kɩɩmã tigimd-b to-to wã, mam me na n tigma m piisã zĩis nins fãa b sẽn dag n sãeeg sãoongã la lik bida daarã.

¹³M na n yiisa bãmb buud a taabã sʋka, n tigim bãmb tẽmsã fãa pʋsẽ, n tall bãmb n wa b tẽngẽ wã. M na n wãbnega bãmb Israyɛll tãmsã zutu, la bãg-faansã pʋse, la tẽngã zĩis nins fãa sẽn tõe n zĩndã pʋse.

¹⁴M na n talla bãmb n kẽng yam-sõmy zĩisẽ. La bãmb zĩig na n yɩɩ Israyɛll tãmsã zutu. Beenẽ b na n paama vʋʋsg la yam-maas zĩiga.

¹⁵Mam na n kɩɩma m piisã m toore, mam na n kõ-b-la vʋʋsgo. Maam a Zu-soab a Sẽn-Ka-Saab n yeele.

¹⁶Mam na n baoo peosg ning sẽn menem-a wã, mam na n talla sẽn kẽ-a moogã n wa. Mam na n tɩbsa karg sẽn kaoog-a wã, m na tɩpsa sẽn bẽed-a wã, n kɩt t'a sãoog n paam pãnga. La mam na n kʋʋ peosg ning sẽn nob n tar pãngã. M na n kɩɩma mam piisã ne tɩrlem.

¹⁷La ne yãmba, mam piisi, ade, maam a Zu-soab a Sẽn-Ka-Saab yetame: ‹Mam na n yɩɩ bʋ-kaood piisã ne taab sʋka, la pe-raadã ne boeesã sʋka.

¹⁸Yãmb sẽn wãbd yam-maasã ka sek yãmb tɩ y bas n tabd yamdã sẽn ketã? Yãmb sẽn yũud ko-yɩlemdã ka sek yãmb tɩ y bas n bendgd koomã ne y naoã,

¹⁹n kɩt tɩ mam piisã na n wãb yamd nins y sẽn tabã, la b yũ koom ning y naoã sẽn bendgã!»

²⁰Bõn-kãng yĩnga maam a Zu-soab a Sẽn-Ka-Saab yetame: «Mam meng n na n bʋ bʋʋd ning sẽn be rũm-waga ne rũm-nobdsã sʋkã.

²¹Bala, yãmb a pe-nobdsã tusa pe-wagã ne y lʋga, la y bãgdo, la y tã bãmb ne y yɩɩlã halɩ tɩ b fãa yi bãgrẽ wã n sãeege.

²²Mam na n fãaga m piisã tɩ b ra leb n lʋɩ fãadb nugẽ ye. La mam na n kaoo piisã ne taab bʋʋdo.

²³La mam na n yãka pe-kɩɩm a yembr bal sẽn yaa mam tʋmtʋmd a Davɩɩd t'a lʋɩ bãmb taoore, n kɩɩm-ba. Yaa yẽnda n na n yɩ b pe-kɩɩma.

²⁴Maam a Sẽn-Ka-Saab na n yɩɩ bãmb Wẽnnaam, la mam tʋmtʋmd a Davɩɩd n na n yɩ bãmb naaba. Yaa maam a Zu-soab a Sẽn-Ka-Saab n yeele.

²⁵Mam na n maana vɩ-bãan kaool ne bãmba, n kɩt tɩ rũm-toosã menem tẽngã pʋga, la bãmb na n zĩnda we-raoogã pʋg ne bãane.

²⁶Mam na n kɩtame tɩ bãmb ne sẽn gũbg mam tãn-sõngã fãa zĩnd barka. Mam na n kɩtame tɩ saag ni a wakate, la na n yɩɩ bark saaga.

²⁷Tɩɩsã na n womame, la tẽngã koodã me na n womame, bãmb na n zĩnda b tẽngã pʋg ne bãane. Mam sã n wa kao bãmb balgrã loeese, la m fãag bãmb neb nins sẽn kẽes bãmb yembdã nusẽ, bãmb na bãng tɩ mam yaa Sẽn-Ka-Saabo.

²⁸Bu-zẽmsã kõn leb n fã bãmb ye. La we-rũmsã me kõn leb n wãb bãmb ye. Bãmb na n vɩɩmda ne bãane, tɩ ned ba a yembr ka be sẽn na n kẽes bãmb dabeem ye.

²⁹Mam na n kõo bãmb pʋt sẽn yaa sõama, la kom kõn leb n yõk bãmb tẽngã pʋg ye. La buud a taabã kõn leb n paoog bãmb ye.

³⁰Woto bãmb na bãng tɩ maam a Sẽn-Ka-Saab sẽn yaa bãmb Wẽnnaamã bee ne bãmb sẽn yaa Israyɛll buudã. Yaa maam a Sẽn-Ka-Saab n yeele.

³¹N-yẽe, yãmb a piisã m sẽn kɩɩmdã, bãng-y tɩ y yaa ninsaalba, la mam yaa yãmb Wẽnnaam! Yaa Zu-soab a Sẽn-Ka-Saab n yeele.»