Read SEBR SÕNGO, 1998 A Ezekɩyɛlle 37 Bible Online

A Ezekɩyɛlle 37 - SEBR SÕNGO, 1998 bible

A Ezekɩyɛlle 37

¹Sẽn-Ka-Saab nugã gãda maam. Sẽn-Ka-Saab Sɩɩgã rɩka maam n tɩ sik tãn-long pʋga. Tãn-longã rag n pida ne kõaba.

²Sẽn-Ka-Saab kɩtame tɩ mam gilg n ges kõabã, la b rag n yaa wʋsg longã pʋga, la b rag n kʋɩɩ hal wʋsgo.

³Sẽn-Ka-Saab soka maam yaa: «Ninsaala, kõb-kãensã tõe n leb n paama vɩɩm bɩ?» La mam leokame: «Zu-soab a Sẽn-Ka-Saabo, yãmb n mi bõn-kãense!»

⁴Dẽ, bãmb yeela maam: «Togs pĩnd-n-bãngr goam n yeel kõabã yaa: ‹Kõb-koeemse, kelg-y Sẽn-Ka-Saab koɛɛga!»

⁵Ade, Zu-soab a Sẽn-Ka-Saab yeta yãmb a kõabã yaa: «Mam na n kɩtame tɩ vʋʋsem wa kẽ yãmba, tɩ y leb n vɩɩmde.

⁶Mam na n kõo yãmb gĩina, n kɩt tɩ yĩn-nemd zĩnd y zugu, la m lud-y ne yĩn-gãongo, la mam na n kõo yãmb vʋʋsem n kɩt tɩ y paam vɩɩm. Woto, yãmb na n bãngame tɩ mam yaa Sẽn-Ka-Saabo.»

⁷Mam togsa pĩnd-n-bãngr goam wa bãmb sẽn yeel maamã. La mam sẽn wa n gomdã wakate, bʋrg n maane. Tẽngã rigimdame, la kõaba sersame n kolg taaba.

⁸Mam gesame, la m yãame tɩ b tara gĩina. Yĩn-nemd sɩngame n tobdẽ, la yĩn-gãong n lud-ba, la b yaool n dag n nan ka tar vʋʋsem b pʋgẽ ye.

⁹Bãmb yeela maam: «Ninsaala, togs vʋʋsmã pĩnd-n-bãngr goamã. Togs pĩnd-n-bãngr goam n yeel vʋʋsmã tɩ Zu-soab a Sẽn-Ka-Saab yetame: ‹Vʋʋsem, yi ween-vɩɩs a naasã n wa! Vʋʋsem, wa fʋʋs nin-bãmbã b sẽn kʋ wã zutu, tɩ b leb n paam vɩɩm.› »

¹⁰Dẽ, mam togsa pĩnd-n-bãngr goam wa b sẽn yeel maamã, la vʋʋsmã wa n kẽ-b lame, tɩ b leb n paam vɩɩm, n yik n yals b nao zutu. Bãmb dag n yaa tãb-biis wʋsgo, b rag n yaa tãb-bi-kʋʋngo.

¹¹Sẽn-Ka-Saab leb n yeela maam: «Ninsaala, kõab-kãensã yaa Israyɛll buudã fãa. Bala bãmb yetame: ‹Tõnd wẽnda kõab sẽn kʋɩ, tõnd saagrã fãa sɛɛme! Tõnd ka tõe n leb n yɩ bũmb ye.› »

¹²Woto yĩnga, togs pĩnd-n-bãngr goam n yeel-b tɩ maam a Zu-soab a Sẽn-Ka-Saab yetame: «Mam nebã, ade, mam na n pagsa y yaadã n yiis yã, la m tall-y n lebg n leb Israyɛll tẽn-gãongã zugu.

¹³Mam nebã, m sã n wa pags y yaadã n yiis-yã, y na yaool n bãng tɩ mam yaa Sẽn-Ka-Saabo.

¹⁴Mam na n ninga m sɩɩgã y pʋsẽ, la y na vɩɩmdame. Mam na n tall-y lame tɩ y leb n wa y tẽngẽ wã! Woto, yãmb na yaool n bãng tɩ mam yaa Sẽn-Ka-Saabo. Maam a Sẽn-Ka-Saab n yeele.»

¹⁵Sẽn-Ka-Saab goma ne maam n yeele:

¹⁶«Foom, a ninsaala, rɩk ra-peok n gʋls a zug woto: ‹Zʋʋda ne Israyɛll nebã sẽn naag yẽnda wã yĩnga.› Rɩk raoog a to n gʋls a zugu: ‹A Zozɛf sẽn yaa a Efrayiim daoogã, ne Israyɛll buudã fãa sẽn naag yẽnda wã yĩnga.›

¹⁷Rɩk raadã n kolg taaba, tɩ b yɩ wa raoog a yembr fo nugã pʋgẽ.

¹⁸La fo buudã neb sã n wa kos-f tɩ f bilg-b bõn-kãng võore,

¹⁹bɩ f yeel-b tɩ maam a Zu-soab a Sẽn-Ka-Saab yetame: ‹Mam dɩkda a Zozɛf raoogã sẽn be a Efrayiim nugẽ wã ne Israyɛll buud nins sẽn naag yẽnda wã. Mam na n lagem-b-la ne Zʋʋda raoogã n kɩt tɩ b yɩ raoog a yembre. La bãmb na n yɩɩ bũmb a yembr mam nugã pʋga.›

²⁰La raad nins fo sẽn na n gʋls b zutã, fo na n zã-b-la f nugẽ bãmb nifẽ.

²¹Yeel bãmb tɩ maam a Zu-soab a Sẽn-Ka-Saab yetame: ‹Ade, mam na n yiisa Israyɛll nebã buud nins sʋk bãmb sẽn kẽngẽ wã. Mam na n tigma bãmb zĩig zãng n tall-b n leb n wa b tẽngẽ wã.

²²Mam na n kɩtame tɩ bãmb lebg bu-yɛng tẽngã pʋgẽ, Israyɛll tãmsã zutu. Rĩm-yɛng bal n na n soog bãmba, bãmb ka na n leb n yɩ buud a yiib ye, la b ka na n leb n welg n yɩ soolem-dãmb a yiib ye.

²³Bãmb kõn leb n dẽgem b mens ne b wẽn-naandsã, la b yel-yoodã, la ne b beegrã buud fãa ye. Mam na n fãaga bãmb ne zĩis nins fãa bãmb sẽn zĩnd n maan yel-wẽnã, la m yɩlg-ba. Bãmb na n yɩɩ mam neba, la maam, mam na n yɩɩ bãmb Wẽnnaam.

²⁴Mam tʋmtʋmd a Davɩɩd n na n yɩ bãmb dĩma, la bãmb pe-kɩɩm na n yɩ a yembr bala. Bãmb na n tũu mam noyã, la b sak mam no-tũudsã n dɩk-b n ning b nao-kẽndr zugu.

²⁵Bãmb na n zĩnda tẽng ning mam sẽn kõ m tʋmtʋmd a Zakoobã pʋgẽ, tẽng ning yãmb yaab-rãmbã sẽn dag n zĩnd a pʋgẽ wã. Bãmb ne b kambã la b yagensã na n zĩnda beenẽ wakat fãa yĩnga, la mam tʋmtʋmd a Davɩɩd n na n yɩ bãmb naab wakat fãa yĩnga.

²⁶Mam na n maana vɩ-bãan kaool ne bãmb wakat fãa yĩnga, la a na n yɩɩ kaool sẽn paad wakat fãa. Mam na n vigla bãmba, n kɩt tɩ b fɩɩge, la m vigl m zĩig ning sẽn welg toorã b sʋk wakat fãa yĩnga.

²⁷Mam na n zĩnda b sʋka. Mam na n yɩɩ bãmb Wẽnnaam, la bãmb na n yɩɩ mam nebã.

²⁸B sã n wa vigl mam zĩig ning sẽn welg toorã bãmb sʋk wakat fãa yĩnga, buud a taabã na bãng tɩ maam la Sẽn-Ka-Saabo, la yaa maam n kɩt tɩ Israyɛll nebã yaa buud sẽn welg toore.› »