Read SEBR SÕNGO, 1998 A Ezekɩyɛlle 38 Bible Online

A Ezekɩyɛlle 38 - SEBR SÕNGO, 1998 bible

A Ezekɩyɛlle 38

¹Sẽn-Ka-Saab goma ne maam n yeele:

²«Ninsaala, wẽnemd f neng n tees Goog tẽng sẽn be Magoog soolem pʋgã sẽnẽ, n yaa Roos ne Tuball la Mesɛk tẽmsã naabã, n togs-a pĩnd-n-bãngr goamã.

³Yeel-a tɩ maam a Zu-soab a Sẽn-Ka-Saab yetame: ‹Foom a Goog sẽn yaa Roos ne Mesɛk la Tuball naabã, mam zabda ne foom!

⁴Mam na n ninga fo yɛyã bãnga, n tɛ foom ne f tãb-biisã fãa ne pãng n yiisi, la f wiidã ne f wed-rʋʋdbã fãa sẽn yer fu-neebã, n yaa neb kʋʋng sẽn zãad gãn-bɛd ne gãn-bi, tɩ b fãa mi zabr sʋʋg tall n zabã.

⁵Pɛrs ne Kuus la Put tãb-biisã sẽn zãad gãn-bɛd ne gãn-bi la b fõg kut pugli wã na n tũu bãmb n yi.

⁶Gomeer tãb-bi-sulã fãa ne Togarma buudã neb sẽn yit nug-rɩtg sẽnẽ zĩ-zãrsẽ wã fãa, n yaa kʋʋngã bee ne foom.

⁷Bɩ foom ne f zãmã wã fãa sẽn tigim fo nengẽ n gũbg foomã segl y mense. Segl f meng tɩ foom n na n lebg b gũuda.

⁸Rasem wʋsg loogr zugẽ, b na n lebs n paasa foom pãnga. Yʋʋm sẽn wate, fo na n wa zaba ne tẽng ning neb sẽn põs zabr sʋʋga, n yi buud kʋʋng sʋk n wa tigim Israyɛll tãmsã sẽn dag n yaa rabood wakat fãa wã zutu. Bãmb yii neb buud toor-toor sʋka, la b fãa na n zĩnda ne bãane.

⁹Foom ne f tãb-biisã fãa, la ne bu-kʋʋng ning sẽn be ne foomã na n tɩ buii tẽngã wa sob-kãsenga, la wa sawad-taoko.»

¹⁰Ade, maam a Zu-soab a Sẽn-Ka-Saab yetame: «Badaare, tags-wẽns n na n wa f sũurẽ, la fo na n saaga saag-wẽnga.»

¹¹Fo na n yeelame: «Mam na n kẽng n tɩ zaba ne tẽng sẽn yaa vɩʋʋgo, mam na n zaba ne neb sẽn vɩ ne yam-gãnega, n zĩ ne bãane, tɩ b fãa be tẽms sẽn ka tar lals pʋse, tẽms sẽn ka tar rignoy tɩ b sokd kʋɩlen-kuy ye.

¹²Mam na n zɛɛ teedo, mam na n fãame. Fo na n tẽega f nug n zab ne neb sẽn lebs n me rabood n kẽ, neb sẽn yi buud toay-toay sʋk n lebg n wa, n tar rũmsi, ne arzegse, n be dũniyã tẽn-sʋka.

¹³Seba ne Dedan nebã, la Tarsɩɩs ne a tẽn-kɩremsã lɛɛbdbã, ne b gɩgem-poalã fãa na n soka foom yaa: ‹Fo wat n na n zɛɛ teed la? Fo sẽn tigim zãmã-kãngã wã yaa sẽn wat n na n fã, la f wʋk wanzuri ne sãnem, la f kãag rũms ne arzegse, la f wʋk teed wʋsg n loog la?› »

¹⁴Bõn-kãng yĩnga, ninsaala, togs pĩnd-n-bãngr goam n wilg Goog tɩ maam a Zu-soab a Sẽn-Ka-Saab yetame: «N-yẽe, wakat ning Israyɛll sẽn yaa mam nebã sẽn wat n zĩ ne bãanã, la fo na n bãng bõn-kãnga.

¹⁵Foom ne neb wʋsg ning sẽn be ne foomã, tɩ b fãa zao wiidi, n yaa zãmã kʋʋngo, n yaa tãb-bi-kʋʋngã, na n yii fo sẽn beẽ wã nug-goabg zĩ-zãrgẽ, n wa.

¹⁶Fo na n wa zaba ne Israyɛll sẽn yaa mam nebã, wa sawat sẽn lud tẽngã. Bõn-kãng na n zĩnda wakat sẽn wate. Googe, mam sã n wa wilg m pʋ-peelmã ne foom buud toay-toayã nifẽ, mam na n kɩtame tɩ fo wa zab ne m tẽngã, sẽn na n yɩlẽ tɩ b bãng maam.»

¹⁷Ade, maam a Zu-soab a Sẽn-Ka-Saab yetame: «Rẽ yĩnga, ka fo yell la mam sẽn dag n tũnug mam tʋmtʋmdbã sẽn yaa Israyɛll no-rɛɛsdbã n gom hal kʋdem-wẽndẽ wã sɩda? Wakat-kãense, bãmb dɩka yʋʋm wʋsg n wilg tɩ mam na n kɩtame tɩ fo wa zab ne mam nebã.

¹⁸Wakat-kãnga, daar ning Goog sẽn na n wa zab ne Israyɛll tẽngã, badaare, mam sũurã na n puuga wʋsgo, hal tɩ m nengã gãneme. Maam a Zu-soab a Sẽn-Ka-Saab n yeele.

¹⁹Mam sũ-ki-kãsengã ne m sũ-puugrã sẽn wit wa bugmã pʋga, hakɩɩka, mam yetame tɩ baraare, tẽn-digimd-kãseng na n zĩnda Israyɛlle.

²⁰Ko-kãsengã pʋgẽ zĩmã ne yĩngr liuuli wã, ne we-rũmsã, ne bõn-vuudsã sẽn saagd tẽn-gãongã zugã, la ninsaalbã sẽn be dũni zugã fãa na n diga mam taoore. B na n kõoga tãmsã, la pĩisã kɩrems na n siigame, lals buudã fãa na n lʋɩɩ tẽnga.

²¹Mam na n kɩtame tɩ b zab ne yẽnda ne zabr sʋʋg mam tãmsã fãa zutu, ned kam fãa na n dɩka a zabr sʋʋg n wẽnemd n zab ne a ba-biiga. Maam a Zu-soab a Sẽn-Ka-Saab n yeele.

²²Mam na n sɩbga yẽnda ne bã-loangdga, la ne zɩɩm daagre. Mam na n kɩtame tɩ sa-bɛd ni, tɩ sapɩlem dʋʋge, la m kɩt tɩ bugum ne kidbr sig yẽnda ne a tãb-bi-sulã zutu, la b sig neb kʋʋng nins sẽn be ne yẽnda wã zugu.

²³Mam na wilga m kãosengã ne m pʋ-peelmã, la m kɩt tɩ buud wʋsg bãng maam. Woto, bãmb na n bãngame tɩ mam yaa Sẽn-Ka-Saabo.»