Read SEBR SÕNGO, 1998 A Ezekɩyɛlle 40 Bible Online

A Ezekɩyɛlle 40 - SEBR SÕNGO, 1998 bible

A Ezekɩyɛlle 40

¹Tõnd sẽn loog yembdã tɩ yʋʋm pisi la a nuunẽ, yʋʋmdã sɩngre, pipi kiuugã rasem piig soabã daare, Zeruzalɛm sãoongã loogr tɩ yʋʋm piig la a naaslẽ, Sẽn-Ka-Saab nugã gãda maam, n tall maam n kẽng beenẽ.

²Wẽnnaam talla maam vẽnegr toay-toay pʋgẽ, n kẽng Israyɛll n tɩ sik maam tãng a yembr sẽn yaa tãn-luglug zugu. La tãngã nug-goabg sẽnẽ, rot n dag n be beenẽ n wẽnd tẽnga.

³La b sẽn tall maam n tɩ sik beenẽ wã, mam yãnda rao a yembre, t'a yalẽ wã wẽnd zũudu. Yẽnda rag n zãada lamd gĩs-bãaneg wĩir ne raoog sẽn tar n magd a nugẽ, n yas tẽngã noore.

⁴Raoã yeela maam yaa: «Ninsaala, puk f nini, la f yok f tʋba! Ges mam sẽn na n wilg foom bũmb ningã neere. Bala, yaa bõn-kãng gesg yĩnga la m sẽn tall foom n wa ka wã. Wilg Israyɛll buudã bũmb nins fãa fo sẽn na n yãndã.»

⁵La ade, mam yãame tɩ lalg n gũbg Wẽnnaam doogã. La raoã rag n zãada raoog woglem sẽn ta kãntɩɩg a yoobe, la kãntɩɩg fãa rag n paasa nug-yakemde. Yẽnda maka lalgã taglem, n mik tɩ yaa kãntɩɩg a yoobe, t'a zãntlmã me yaa kãntɩɩg a yoobe.

⁶La yẽnda kẽnga rignoor ning sẽn be yaangã, n kẽn n dʋ rʋʋdsã n mak rigno-koakã, n mik tɩ yaa kãntɩɩg a yoobe.

⁷B maka ro-bãoonegã n mik tɩ b woglmã ne b yalmã yaa kãntɩɩg a yoob-yoobe. La ro-bil fãa ne a to sʋk yaa kãntɩɩg a nu. Rignoor ning sẽn be hal pʋgẽ n pẽ zãongã taglem yaa kãntɩɩg a yoobe.

⁸Yẽnda maka zãongã sẽn be pʋgẽ rignoorẽ wã, n mik t'a yaa kãntɩɩg a yoobe,

⁹la a mak rignoorẽ zãongã, n mik t'a yaa kãntɩɩg a nii, t'a ra-lugdsã yaa kãntɩɩg a yiibu.

¹⁰La ro-bãooneg nins sẽn tees yaang n tong taab t'a tãab be goabga, t'a tãab be rɩtgã fãa rag n zema taaba, la ra-lugdsã sẽn be kɩreng fãa wã rag n zema taaba.

¹¹Yẽnda maka rignoorã yalem n mik t'a yaa kãntɩɩg piiga, t'a woglmã yaa kãntɩɩg piig la a tãabo.

¹²Ro-bãoonegã taoore, vɩʋʋg n dag n be kɩrems a yiibã fãa t'a yalmã yaa kãntɩɩg a yembre. La ro-bil fãa woglem ne a yalem yaa kãntɩɩg a yoob-yoobe.

¹³Yẽnda maka ro-bil fãa yĩngr ne a to sʋka, la vɩʋʋg ning sẽn dag n be rignoyã ne taab sʋkã yaa kãntɩɩg pisi la a nu.

¹⁴Yẽnda maka ra-lugdsã me n mik tɩ b yaa kãntɩɩg pis-yoobe. La zakã lalg rag n gũbga rignoorẽ zãongã.

¹⁵Vɩʋʋg ning sẽn dag n be yɩng rignoorã ne zãongã sʋkã yaa kãntɩɩg pis-nu.

¹⁶Ro-bãoonegã rag n tara peem-lees sẽn pɩg ne raado, la b ning pʋgẽ ra-lugdsã n gilgi. B rag n ninga zãndã me peem-lees n gilg pʋgẽ wã, n teesd pʋgẽ zakã sẽnẽ. B rag n gʋla koms vãad naand pugẽ ra-lugdsã zutu.

¹⁷Raoã talla maam n kẽ pipi samandã pʋgẽ. La beenẽ, b mee roto, la b rag n manega zakã n gãneg ne kug n pam n gilgi. Rotã rag n yaa bãmb pis-tã.

¹⁸B sẽn maneg n pamã woglem zemsa ne rotã noy woglem. Rag n yaa zag-yɩngã b sẽn pamã.

¹⁹Raoã maka vɩʋʋg ning sẽn be sẽn sɩng ne yɩngã no-bilã, n tãag pʋgẽ zakã yɩng tɛka, n mik tɩ yaang n tãag nug-goabga yaa kãntɩɩg koabga.

²⁰Raoã maka pipi samandã noor ning sẽn tees nug-rɩtg sẽnẽ wã zãntlmã ne a yalmã.

²¹Yẽnda ro-bãoonegã rag n yaa bãmb b yoobe: a tãab kɩreng a yembre, a tãab kɩreng a to, la a ra-lugdsã ne a zãondã zãntlmã ne a yalmã rag n zema pipi rignoorã: a zãntlmã rag n yaa kãntɩɩg pis-nu, t'a woglmã yaa kãntɩɩg pisi la a nu.

²²Yẽnda peem-leesã ne a zãondã, la a komsã b sẽn dag n gʋlã rag n yaa a yembr ne rignoor ning sẽn be yaangã rẽndã. B rag n tũuda rʋʋdg sẽn tar kogs a yopoe, n paamd n kẽed yẽnda zãondã sẽn be rʋʋdsã neng-taoorã pʋse.

²³Rignoor n dag n be pʋgẽ zakã n tot ne nug-rɩtg rignoorã, wa a to wã me sẽn be yaangã. Raoã maka vɩʋʋg ning sẽn be rignoor ne a to sʋka, n mik tɩ yaa kãntɩɩg koabga.

²⁴Dẽ poore, raoã talla maam n kẽng rignoor ning sẽn be nug-goabgã. Yẽnda maka a ra-lugdsã ne a zãondã n mik tɩ b zema taaba.

²⁵Rignoorã ne a zãondã rag n tara peem-lees wa peem-lees a taabã n gilgi. Bãmb woglmã rag n yaa kãntɩɩg pis-nu, tɩ b yalmã yaa kãntɩɩg pisi la a nu.

²⁶B rag n tũuda rʋʋdg sẽn tar kogs a yopoe, n paamd n kẽed yẽnda zãondã sẽn be rʋʋdsã neng-taoorã pʋse. B rag n gʋla koms vãad naand ra-ludgsã kɩrems fãa.

²⁷Pʋgẽ zakã rag n tara rignoor sẽn tees nug-goabga. Raoã maka vɩʋʋg ning sẽn be rignoor ne a to sʋka, sẽn teesd nug-goabg sẽnẽ wã, n mik tɩ yaa kãntɩɩg koabga.

²⁸Rẽ poore, raoã talla maam n tũ nug-goabg noorã n kẽ pʋgẽ zakẽ wã. Yẽnda maka rigno-kãnga, la a rag n yaa a yembr ne rignoy a taabã.

²⁹Zakã ro-bãoonegã ne a ra-lugdsã la a zãondã rag n yaa a yembr ne b taabã. Rigno-kãng ne a zãondã rag n tara peem-lees n gilgi. B woglmã rag n yaa kãntɩɩg pis-nu, tɩ b yalmã yaa kãntɩɩg pisi la a nu.

³⁰Zãond wʋsg n dag n be beenẽ n gilgi, la b woglmã yaa kãntɩɩg pisi la a nu, tɩ yalmã yaa kãntɩɩg a nu-nu.

³¹Zakã zãondã rag n tota ne pipi samandã. B rag n gʋla koms vãad a ra-lugdsã zutu, la a rag n tara rʋʋdg sẽn tar koag a nii tɩ b tũud n dʋʋdã.

³²Raoã talla maam n kẽng pʋgẽ zakã pʋg sẽn teesd yaang sẽnẽ wã. Yẽnda maka rignoorã, la a yaa a yembr ne a taabã.

³³Yẽnda ro-bãoonegã ne a ra-lugdsã la a zãondã fãa rag n zema taaba. Rigno-kãng ne ro-bãoonegã rag n tara peem-lees n gilgi. Bãmb woglmã rag n yaa kãntɩɩg pis-nu, tɩ b yalmã yaa kãntɩɩg pisi la a nu.

³⁴A zãondã rag n tota ne pipi samandã. B rag n gʋla koms vãad naand ra-lugdsã kɩremsã fãa, a rag n tara rʋʋdg sẽn tar koag a nii tɩ b tũud n dʋʋda.

³⁵La raoã talla maam n kẽng nug-rɩtg rignoorã. A makame, la no-kãng me yaa a yembr wa a taabã.

³⁶Yẽnda rag n tara ro-bãoonego, ne ra-lugdsi, la zãond sẽn ning peem-lees n gilgi. A woglmã rag n yaa kãntɩɩg pis-nu, t'a yalmã yaa kãntɩɩg pisi la a nu.

³⁷Yẽnda zãondã rag n tota ne pipi samandã. La b rag n gʋla koms vãad naand a ra-lugdsã zutu, rʋʋdg sẽn tar koag a nii tɩ b tũud n dʋʋda.

³⁸Roog a yembr n dag n be beenẽ t'a rignoorã be rignoyã ra-lugds sʋka. Yaa beenẽ la b rag n pekd maoong sẽn yõog bugmã rũmsi.

³⁹Zakã rignoorẽ zãongã pʋga, taabl-dãmb a yiib n dag n be kɩreng a yembre, t'a yiib me be kɩreng a to. Yaa taabl-bãmb zut la b rag n maand maand sẽn yõogd bugmã, ne yel-wẽnã sugr kũun maandã, la beegr maandã.

⁴⁰Ned sã n dag n kẽed nug-goabg rignoorã, yɩngã yaa taabl-dãmb a yiib n be kɩreng a yembre, tɩ taabl-dãmb a yiib be rignoorẽ zãongã sẽnẽ.

⁴¹Rignoorẽ wã rag yaa taabl-dãmb a nii n be beenẽ, a naas n be kɩreng a yembrã t'a naas be kɩreng a to wã. B rag n tog n kʋʋ maoongã taabl-bãmb zutu.

⁴²Taabl-dãmb a naas me n dag n be, b sẽn pees ne kuga, maand sẽn yõogd bugmã maaneg yĩnga. B woglmã ne b yalmã yaa kãntɩɩg a yembr la pʋɩ-sʋk-sʋka, tɩ b zãntlmã yaa kãntɩɩg a yembre. Yaa bãmb zut la b rag n tog n dogl teed nins sẽn tar n kʋʋd maand sẽn yõogd bugmã ne maand a taabã.

⁴³Taabl-dãmbã kɩrems rag n tara kogs sẽn ta nug-pʋg yalem n gilgi. B rag tog n dogla kũunã maand nemd taabl-dãmbã zutu.

⁴⁴Pʋgẽ dignoorã yɩnga, yɩɩn-yɩɩndbã rot dag n bee beenẽ, pʋgẽ zakã pʋga. A yembr n dag be nug-rɩtg rignoorã, t'a noorã teesd nug-goabga, t'a to wã be nug-goabg rignoorã, t'a noorã teesd nug-rɩtgo.

⁴⁵Dẽ, raoã yeela maam yaa: «Roog ning sẽn tees-a nug-rɩtgã yaa maan-kʋʋdb nins sẽn tʋmd Wẽnd doogã tʋʋmdã yĩnga.

⁴⁶Roog ning neng sẽn tees-a nug-goabgã yaa maan-kʋʋdb nins sẽn tʋmd tẽn-kugrã tʋʋmdã yĩnga. Leevi yagensã sʋka, yaa a Sadok yagensã bal n tõe n kolg Sẽn-Ka-Saab n tʋm maan-kʋʋrã tʋʋmde.»

⁴⁷Raoã maka Wẽnd doogã zakã, la a yaa zem taaba, a woglmã yaa kãntɩɩg koabga, t'a yalmã yaa kãntɩɩg koabga, a kɩremsã ka yɩɩd to ye. Tẽn-kugrã rag n dɩga Wẽnd doogã neng-taoore.

⁴⁸Raoã talla maam n kẽes Wẽnd doogã zãongẽ. Yẽnda maka zãongã ra-lugdsi, n mik tɩ kɩreng fãa yaa kãntɩɩg a nu. Rignoyã sẽn be kɩrems a yiibã fãa yalem yaa kãntɩɩg a tãab-tãabo.

⁴⁹Zãong ning sẽn tũud n kẽed Wẽnd doogã noorã woglmã yaa kãntɩɩg pisi, t'a yalmã yaa kãntɩɩg piig la a yembre. B rag n tũuda rʋʋds n kẽedẽ. Ra-lugd-bɛd n dag n yeg ra-lugdsã goabg la a rɩtgo.