Read SEBR SÕNGO, 1998 A Ezekɩyɛlle 41 Bible Online

A Ezekɩyɛlle 41 - SEBR SÕNGO, 1998 bible

A Ezekɩyɛlle 41

¹Raoã talla maam n kẽ Wẽnd doogã pʋga. La a maka ra-lugdsã n mik tɩ b yalmã yaa kãntɩɩg a yoob-yoobe, wa sẽn zems fu-roogã yalmã.

²Roogã noor yalem dag n yaa kãntɩɩg piiga, la a lals nins sẽn be rignoorã kɩremsã goabg la a rɩtgã woglem yaa kãntɩɩg a nu-nu. Raoã maka roogã woglem tɩ yaa kãntɩɩg pis-naase, t'a yalmã yaa kãntɩɩg pisi.

³Dẽ zugẽ, a kẽe ro-taoorã n mak rignoorã ra-lugdsã n mik t'a taglmã yaa kãntɩɩg a yiibu, la rignoorã woglem yaa kãntɩɩg a yoobe, t'a yalmã yaa kãntɩɩg a yopoe.

⁴Yẽnda maka roogã meng woglem n mik t'a yaa kãntɩɩg pisi, t'a yalmã yaa kãntɩɩg pisi. La raoã yeela maam tɩ ro-taoorã yaa zĩig sẽn welg toor n yɩɩd fãa.

⁵Raoã maka Wẽnd doogã pʋgẽ lalgã n mik tɩ yaa kãntɩɩg a yoobe, tɩ ro-bãooneg nins sẽn be Wẽnd doogã kɩremsã yalem yaa kãntɩɩg a naas-naase.

⁶Ro-bãmb dag n dogla taab zutu, la b sõorã zãng yaa bãmb pis-tã la a tãabo. Ro-bãmb dag n meeme n sok ne zakã lalga, la b rag n ka tõk Wẽnd doogã meng ye.

⁷Rotã sẽn dogl taab zutã yalem dag n paasdame n dʋʋd yĩngri, la ned sã n dat n dʋ yĩngrã, a rʋʋd n gilgdame. Bala, rʋʋdg n dag n gilg roogã n dabd yĩngr dotã. Woto, yĩngr dotã rag n tara vɩʋʋg n yɩɩd rot a taabã. Ned sã n be tẽngr doogã n dat n dʋ hal yĩngr soabã, a tũuda tẽn-sʋk roogã.

⁸Mam gesa rotã sẽn dag n gilg Wẽnd doogã zãntlem. Rotã sẽn dag n gilgã zãntlem dag n yaa kãntɩ-wogd a yoobe, sẽn sɩng ne b yẽbgrã n tãag b yĩngrã.

⁹Ro-bãmb yɩng lalsã taglem dag n yaa kãntɩɩg a nu. Vɩʋʋg n dag n be rot nins sẽn gũbg Wẽnd doogã,

¹⁰ne ro-bãooneg nins sẽn tom taab yɩng lalgã zugã sʋka, tɩ b yalem dag n yaa kãntɩɩg pisi n gilgi.

¹¹Rot nins sẽn tom taab yɩng lalgã zugã roog fãa rignoor teesa vɩʋʋgã. Noor a yembr n dag n be goabga, t'a yembr be rɩtgo, la vɩʋʋgã sẽn gilgã yalem yaa kãntɩɩg a nu.

¹²Roog ning sẽn dag n be Wẽnd doogã taoor n teesd zakã pʋgẽ wã yalem dag n yaa kãntɩɩg pis-yopoe. Roogã lalg sẽn gilgã taglem dag n yaa kãntɩɩg a nu, t'a woglmã rag n yaa kãntɩɩg pis-wɛ.

¹³Raoã maka Wẽnd doogã, n mik t'a woglmã yaa kãntɩɩg koabga. Wẽnd doogã neng taoor vɩʋʋgã ne roogã menga, la roogã lals woglem me rag n yaa kãntɩɩg koabga.

¹⁴Wẽnd doogã taoor neng yalem ne vɩʋʋg ning sẽn tees yaang sẽnẽ wã yalem me yaa kãntɩɩg koabga.

¹⁵Raoã maka roog ning sẽn dag n me Wẽnd doogã poorã woglem, ne vɩʋʋg ning sẽn be goabg la rɩtgã woglem, n mik tɩ yaa kãntɩɩg koabga. Wẽnd doogã pʋgẽ doogã ne yɩng zãondã,

¹⁶la rigno-kogsã ne peem-leesã b sẽn dag n ning yãrsã[7] la vɩʋʋg ning sẽn be tẽngr n gilg ro-toam a tãab-tãabã n tees rigno-kogsã, bãmb fãa rag n maneg n luda ne raado, sẽn sɩng ne a tẽngã n tɩ tãag peem-leesã, la peem-leesã rag n pagame.

¹⁷Wẽnd doogã rignoorã yĩngrã n tɩ tãag a pʋgẽ wã, la yɩng lalgã zãng sẽn gilgã, pʋgẽ ne yɩng fãa, b rag n magame,

¹⁸n gʋl serubẽ-rãmb ne koms tɩɩs vãad naande. La serubẽ ne a to sʋka, b rag n ninga koang tɩɩg vãoogo. Serubẽ fãa rag n tara nens a yiibu:

¹⁹neng a yembrã sẽn yaa ninsaal nengã wẽnemd n teesa koang tɩɩgã vãoogo, tɩ neng a to wã sẽn yaa gɩgem-poll nengã wẽnemd n tees koang tɩɩgã vãoog a to wã. La Wẽnd doogã zĩigã fãa sẽn gilgã rag n yaa a woto.

²⁰Sẽn sɩng ne roogã tẽng n tɩ tãag rignoorã yĩngrã, b rag n gʋla serubẽ-rãmb ne koang tɩɩg vãado.

²¹Wẽnd doogã rignoyã yĩngr da-lugdsã rag n yaa magdo, la zĩig sẽn welg toor n yɩɩdã taoor me rag n yaa maoko.

²²Tẽn-kugrã rag n maana ne raado, t'a zãntlmã yaa kãntɩɩg a tãabo, t'a woglmã yaa kãntɩɩg a yiibu. A pẽgsã sẽn be a woglmã sɛtmẽ wã ne pʋgẽ wã gãnega ne raado. Raoã yeela maam yaa: «Yõwã yaa taabl ning sẽn be Sẽn-Ka-Saab taoorã.»

²³Wẽnd doogã ne zĩig sẽn welg toorã rag n tara rignoy a yiibu.

²⁴Rignoyã rag n tara kʋɩlems a yiib-yiibu, la kʋɩleng fãa rag n pakd n della a to. Kʋɩlems a yiib rellda kʋɩleng a yembre, tɩ kʋɩlems a yiib rell kʋɩleng a to wã.

²⁵Wẽnd doogã rignoy zutu, b rag n gʋla serubẽ-rãmb la koang tɩɩg vãado, wa b sẽn dag n gʋl lalsã zutã. Zãong ning sẽn be Wẽnd doogã yɩngã neng zugu, b rag kaa ra-neeba.

²⁶Peem-lees sẽn dag n tar yãrs ne koms tɩɩs vãad n dag n be zãongã zĩig fãa. B rag n bee Wẽnd doogã rot nins sẽn tom taab n gilgã zutu, ne ra-neebã b sẽn ka wã zutu.