Read SEBR SÕNGO, 1998 A Ezekɩyɛlle 44 Bible Online

A Ezekɩyɛlle 44 - SEBR SÕNGO, 1998 bible

A Ezekɩyɛlle 44

¹Raoã talla maam n lebg n kẽng zĩig sẽn welg toorã yɩng rignoor ning sẽn be yaang sẽnẽ wã. Rigno-kãng rag n pagame.

²Sẽn-Ka-Saab yeela maam yaa: «Rigno-kãngã tog n paga wakat fãa, la b ka tog n pak-a ye. Ned ka tog n tũ beenẽ n kẽ ye. Bala, yaa beenẽ la maam a Sẽn-Ka-Saab sẽn yaa Israyɛll Wẽnnaamã tũ n kẽ. A tog n kell n pagame n pa woto.

³La naabã tõe n zĩnda beenẽ n dɩ a rɩɩbã Sẽn-Ka-Saab taoore, a sẽn yaa naabã yĩnga. Yẽnda na n tũuda rignoorẽ zãongã n kẽedẽ la a tũud be n yita.»

⁴Raoã talla maam n kẽng rignoor ning sẽn be nug-rɩtg sẽnẽ wã, Wẽnd doogã taoore. Mam gesame, la Sẽn-Ka-Saab ziirã rag n pita Sẽn-Ka-Saab roogã! Mam lʋɩɩme n fõgen m neng tẽnga.

⁵Sẽn-Ka-Saab yeela maam yaa: «Ninsaala, maan gũusgu! Puk f nin n gese, la f yok f tʋb n kelg bũmb nins fãa mam sẽn na n wilg foomã, sẽn kẽed ne Sẽn-Ka-Saab roogã no-tũudsã ne a tõodã fãa wɛɛngẽ wã. Maan gũusg ne Wẽnd doogã pʋgẽ kõom, la ne zĩig sẽn welg toorã yiib zĩisã fãa.

⁶Yeel Israyɛll buudã sẽn yaa tõatbã tɩ maam a Zu-soab a Sẽn-Ka-Saab yetame yaa: ‹Israyɛll buudu, mam yamã ya n yii ne y yel-beedã fãa!

⁷Yãmb basame tɩ sãamb sẽn ka sakd maam, la sẽn ka kẽ bãong kẽed mam zĩig ning sẽn welg toorã pʋgẽ, n dẽgemd mam doogã. Wakat ning y sẽn wat ne mam burã ne nem-kaamã, la ne zɩɩmã, yãmb sãama m kaoolã, n maand y yel-beedã fãa.

⁸Yãmb ka maan bũmb ning sẽn welg toor mam yĩngã tʋʋm ye. Yãmb dɩka nin-bãmbã tɩ b ledg yãmb zĩig n maand tʋʋmdã mam zĩig ning sẽn welg toorã pʋgẽ.»

⁹Ade, Zu-soab a Wẽnnaam yetame: «Sãan ba a yembr sũur sẽn ka paam tekre, la yĩng sẽn ka kẽ bãong ka na n kẽ mam zĩig ning sẽn welg toorã pʋg ye. Sãamb nins sẽn be Israyɛll nebã sʋkã ned ba a yembr ka na n kẽ be ye.»

¹⁰Sẽn kẽed ne Leevi neb nins sẽn zãag b mens ne maamã wɛɛngẽ, wakat ning Israyɛll nebã sẽn kẽ moogo, n wẽnemd n bas maam n pʋgd b wẽn-naandsã, bãmb kongrã na n lʋɩ b mens zutu.

¹¹Bãmb na n tʋma mam zĩig ning sẽn welg toorã pʋga, bãmb na n yɩɩ Wẽnd doogã noy gũudba. B na n tʋma mam doogã yĩnga. Bãmb na n maana maand sẽn yõogd bugum ne maand a taabã nebã yĩnga. Bãmb na n yalsa Sẽn-Ka-Saab taoor n maan b tʋʋmdã nebã yĩnga.

¹²Bãmb sẽn maan maand n kõ wẽn-naandsã, n yɩ kug-lakdg Israyɛll buudã yĩngã, b sẽn wa ne kongrã yĩnga, maam a Zu-soab a Sẽn-Ka-Saab zẽkda m nug n wẽend n yetẽ tɩ bãmb kongrã taal na n lʋɩ b zugu.

¹³Bãmb kõn tol n leb n kolg maam n maan maan-kʋʋr tʋʋmdã mam yĩng ye. Bãmb kõn leb n kolg bũmb nins fãa sẽn welg toor mam yĩngã, ne bũmb nins sẽn welg toor n yɩɩdã ye. Bãmb yãndã ne yel-beedã b sẽn maanã taal na n lʋɩ b zugu.

¹⁴Mam na n kɩtame tɩ b maan Wẽnd doogã tʋʋmde. Bãmb na n maana Wẽnd doogã tʋʋm fãa ne tʋʋm nins fãa sẽn be beenẽ n segd ne maanegã.

¹⁵Sã n yaa ne Leevi buudã maan-kʋʋdbã sẽn yaa a Sadok yagensã sẽn ges m zĩig ning sẽn welg toorã yelle, wakat ning Israyɛll nebã sẽn wa n kẽ moog n zãag ne maamã, bãmb na n waa mam taoore, n maan tʋʋmdã mam yĩnga. Bãmb na n yalsa mam taoore, n dɩk nem-kaamã ne zɩɩmã n kõ maam. Maam a Zu-soab a Sẽn-Ka-Saab n yeele.

¹⁶Bãmb na n kẽeda mam zĩig ning sẽn welg toorã pʋga. Bãmb na n yalsa mam taablã taoore, n maand tʋʋmdã mam yĩnga, la yaa bãmb n na n get mam tʋʋmdã yelle.

¹⁷Bãmb sã n wa ta pʋgẽ zakã rignoyẽ, bãmb na n yeelga b fut nins sẽn wʋg ne lamd gĩs-bãanegã. B ka tog n yeelg fuug ba a yembr sẽn wʋg ne pe-kõbd ye. Bãmb ka tog n kẽ zakã pʋga, wall Wẽnd doogã pʋg ne fuug sẽn wʋg ne pe-kõbd ye.

¹⁸Bãmb na n vila b zutã ne lamd gĩs-bãaneg peende, la b sẽgen bɛnd sẽn wʋg ne lamd gĩs-bãanega. Bãmb ka tog n sẽbg sẽbdg sẽn midgd yĩng ye.

¹⁹Bãmb sã n wa yit n na n kẽ yɩng zakã pʋg n kẽng nebã sẽn beẽ wã, b tog n deng n yeesa fut nins b sẽn yeelg n maan tʋʋmdã n dʋʋg zĩig ning sẽn welg toorã rot pʋse. Bãmb na n dɩka fut a taab n yeelge, tɩ nebã ra wa sɩɩs b futã n lebg neb sẽn welg toor ye.

²⁰Maan-kʋʋdbã ka tog n põng b zutã koɛɛl ye. B ka tog n bas b zoobdã me tɩ kẽ wʋsg n loog ye. Bãmb tog wõrsda b zoobdã.

²¹Maan-kʋʋd ba a yembr sẽn yũ reezẽ rãam ka tog n kẽ pʋgẽ zakã pʋg ye.

²²Bãmb ka tog n kẽ kãadem ne pʋg-kõore, wall ne pag a sɩd sẽn bas ye. Bãmb tog n kẽe kãadem ne Israyɛll buudã bi-pugl sẽn ka mi raoa, wall ne pʋg-kõor sẽn yaa maan-kʋʋd a to sẽn ki n base.

²³Maan-kʋʋdbã na n zãmsa mam nebã, tɩ b bãng bũmb ning sẽn welg toorã, ne bũmb ning sẽn yaa bõn-zaalsã n bake. Bãmb tog n kɩtame tɩ mam nebã bãng bũmb sẽn yaa rẽgdã ne bũmb ning sẽn yaa yɩlemdã n bake.

²⁴Yell sã n wa beẽ, bãmb n na n kɩt tɩ b tũ wala sẽn zemsã, la b kao bʋʋdã wa sẽn zems mam noyã. Bãmb na n saka mam tõodã ne m no-tũudsã mam tigã fãa pʋse, la b kɩt mam vʋʋsg rayã yɩ ray sẽn welg toore.

²⁵Maan-kʋʋd ka tog n kolg kũum n dẽgem a meng ye. Yẽnda sẽn tõe n kolg kũum ning n dẽgem a menga, yaa a ba bɩ a ma, a bi-ribl bɩ a bi-pugla, a ba-bi-raoog bɩ a ba-bi-poak sẽn nan ka kẽ kãadem kũum.

²⁶Maan-kʋʋdã sã n wa yɩlg a meng n sɛ, b tog n kõo yẽnda rasem a yopoe.

²⁷La daar ning yẽnda sẽn na n leb n kẽ zĩig ning sẽn welg toorã sẽn be pʋgẽ zakã pʋgã n na maan a tʋʋmdã zĩig ning sẽn welg toorã pʋgẽ wã, a tog n maana maoong a meng yel-wẽnã sugr kosg yĩnga. Maam a Zu-soab a Sẽn-Ka-Saab n yeele.

²⁸Ad maan-kʋʋdbã pʋɩɩre: maam a Sẽn-Ka-Saab n yaa bãmb pʋɩɩre. Bɩ y ra kõ bãmb zĩig Israyɛll tẽngã pʋg ye. Maam n yaa bãmb pʋɩɩre.

²⁹Bãmb dɩɩb na n yɩɩ bõn-koaadl kũunã, ne yel-wẽnã sugr kosg maandã ne zems-n-taar maandã. La bũmb ning fãa b sẽn welg toor mam yĩng Israyɛll pʋgẽ wã na n yɩɩ bãmb dẽnda.

³⁰Bõn-koaadl buudã fãa dẽenem biisi, la yãmb sẽn na n yãk bũmb ning fãa mam yĩng yaa maan-kʋʋdbã n so. Yãk-y zom-nagdgã me dẽenem pʋɩɩr n kõ maan-kʋʋdã tɩ barkã tõe n sig y yiyã pʋse.

³¹Maan-kʋʋdbã ka tog n wãb rũng sẽn ki a toore, wall rũnga, rũng a to sẽn zendem nemd ye, sã n yaa liuula, wall rũnga.