Read SEBR SÕNGO, 1998 A Ezekɩyɛlle 48 Bible Online

A Ezekɩyɛlle 48 - SEBR SÕNGO, 1998 bible

A Ezekɩyɛlle 48

¹Ad Israyɛll buud toay-toayã yʋya: «Sẽn sɩng ne nug-rɩtg sẽnẽ kɩrengã sẽn yegd Ɛtlon sẽn be Hamatã sor wogellã, ne Hatsaar-Eyinonde, la Damaas toadgã sẽn be nug-rɩtg Hamat sẽnẽ wã, sẽn sɩng ne yaang n tɩ tãag nin-taoorã, yaa Dan buudã pʋɩɩre.

²Sẽn yegd a Dan buudã toadg sẽn sɩng ne yaang n ta nin-taoore, yaa Asɛɛr buudã pʋɩɩre.

³Sẽn yegd Asɛɛr buudã toadg sẽn sɩng ne yaang n tɩ ta nin-taoore, yaa Neftali buudã pʋɩɩre.

⁴Sẽn yegd Neftali buudã toadg sẽn sɩng ne yaang n tɩ ta nin-taoore, yaa Manaase buudã pʋɩɩre.

⁵Sẽn yegd Manaase buudã toadg sẽn sɩng ne yaang n tɩ ta nin-taoore, yaa Efrayiim buudã pʋɩɩre.

⁶Sẽn yegd Efrayiim buudã toadg sẽn sɩng ne yaang n tɩ ta nin-taoore, yaa Rubɛn buudã pʋɩɩre.

⁷La sẽn yegd Rubɛn buudã toadg sẽn sɩng ne yaang n tɩ ta nin-taoore, yaa Zʋʋda buudã pʋɩɩre.»

⁸Sẽn yegd Zʋʋda buudã toadgã, sẽn sɩng ne yaang n tɩ ta nin-taoorã, yãmb na n yãka zĩig yalem sẽn tat kãntɩɩg tus pisi la a nu, t'a woglmã yaa wa pʋɩɩr nins sẽn sɩng yaang n tɩ ta nin-taoorã sʋk a yembre, la zĩig ning sẽn welg toorã na n zĩnda yẽnda tẽn-sʋka.

⁹Zĩig ning yãmb sẽn na n yãk Sẽn-Ka-Saab yĩngã woglem na n yɩɩ kãntɩɩg tus pisi la a nu, t'a yalmã yaa kãntɩɩg tus piiga.

¹⁰Zĩ-kãng b sẽn yãk t'a yaa toorã na n yɩɩ maan-kʋʋdbã rẽnda. A nug-rɩtg sẽnẽ kɩrengã woglem na n yɩɩ kãntɩɩg tus pisi la a nu, a nin-taoor sẽnẽ kɩrengã yalem na n yɩɩ kãntɩɩg tus piiga, a yaang sẽnẽ kɩrengã yalem na n yɩɩ kãntɩɩg tus piiga, la a nug-goabg sẽnẽ kɩrengã woglem na n yɩɩ kãntɩɩg tus pisi la a nu. La Sẽn-Ka-Saab zĩigã sẽn welg toorã na n zĩnda zĩ-kãng tẽn-sʋka.

¹¹Zĩ-kãng na n yɩɩ maan-kʋʋdb nins b sẽn yãk a Sadok yagensã sʋk n welg toorã rẽnda. Bãmb dag n maanda mam tʋʋmdã, la b ka kẽ moog wakat ning Israyɛll nebã sẽn dag n kẽ moogã, la wa Leevi nebã me sẽn dag n kẽ moogã ye.

¹²Zĩ-kãng na n yɩɩ bãmb dẽnda, n yɩ zĩig sẽn welg toor n yɩɩda, zĩig b sẽn yãke, tẽngã zĩis nins b sẽn yãkã sʋka, n yegl Leevi buudã toadgã.

¹³Leevi buudã zĩig na n yegla maan-kʋʋdbã zĩig toadga. A nug-rɩtg sẽnẽ kɩrengã woglem na n yɩɩ kãntɩɩg tus pisi la a nu, a nin-taoor sẽnẽ kɩrengã yalem na n yɩɩ kãntɩɩg tus piiga, a yaang sẽnẽ kɩrengã yalem na n yɩɩ kãntɩɩg tus piiga, la a nug-goabg sẽnẽ kɩrengã woglem na n yɩɩ kãntɩɩg tus pisi la a nu.

¹⁴Bãmb ka tõe n yãk zĩig ba a yembr beenẽ n koos ye. B ka tõe n dɩk tẽngã zĩ-kãens b sẽn yãkã n tek ne bũmbu, wall b rɩk-b n kõ ned ye. Bala, b welga toor Sẽn-Ka-Saab yĩnga.

¹⁵Zĩig ning b sẽn yãk n welg toor t'a yalmã yaa kãntɩɩg tus pisi la a nu wã pʋgẽ, zĩig n na n kelle, t'a yalmã yaa kãntɩɩg tus a nu. Zĩ-kãng sẽn na n kellã na n yɩ zĩ-zaalle, la neb yiya, ne zĩ-vɩɩdo. Tẽngã na n zĩnda tẽn-sʋka.

¹⁶Ad tẽngã b sẽn mag tɩ yaa to-to: a nug-rɩtg sẽnẽ kɩrengã woglem yaa kãntɩɩg tus a naas la kobs-nu, t'a nug-goabg sẽnẽ kɩrengã woglem yaa kãntɩɩg tus a naas la kobs-nu, t'a yaang sẽnẽ kɩrengã woglem yaa kãntɩɩg tus a naas la kobs-nu, t'a nin-taoor sẽnẽ kɩrengã woglem yaa kãntɩɩg tus a naas la kobs-nu.

¹⁷Zĩisã sẽn be tẽngã kɩremsã b sẽn magã la woto: nug-rɩtg sẽnẽ kɩrengã yaa kãntɩɩg kobessi la pis-nu, t'a nug-goabg sẽnẽ kɩrengã yaa kãntɩɩg kobessi la pis-nu, t'a yaang sẽnẽ kɩrengã yaa kãntɩɩg kobessi la pis-nu, t'a nin-taoor sẽnẽ kɩrengã yaa kãntɩɩg kobessi la pis-nu.

¹⁸Zĩig ning b sẽn yãk n welg toorã woglmã sẽn kellã, yaang sẽnẽ kɩrengã yaa kãntɩɩg tus piiga, t'a nin-taoor sẽnẽ kɩrengã yaa kãntɩɩg tus piiga. Zĩ-kãng bõn-koaadlã n dɩlgd neb nins sẽn tʋmd tẽngã yĩngã.

¹⁹Neb nins sẽn na n ko beenẽ wã na n yii Israyɛll buud toor-toorã fãa pʋgẽ.

²⁰Zĩig ning b sẽn na n yãkã tõr woglem yãmb sẽn na n welg toor Sẽn-Ka-Saab yĩngã, woglem na n yɩɩ kãntɩɩg tus pisi la a nu, t'a yalmã me yaa kãntɩɩg tus pisi la a nu. Zĩig ning b sẽn yãk tɩ yaa zĩig sẽn welg toorã pʋgẽ, yãmb na n yãka pʋɩɩr a yembr pʋɩɩr a naas sʋka, tɩ yɩ tẽngã rẽnda.

²¹Zĩig ning sẽn na n kell-a wã na n yɩɩ naabã rẽnda. Yaa kɩrems a yiibu: zĩig ning b sẽn yãk tɩ yaa zĩig sẽn welg toorã kɩreng a yembre, ne zĩig ning b sẽn yãk tɩ yaa tẽngã rẽndã kɩreng a yembre, sẽn sɩng ne kɩreng ning woglem sẽn yaa kãntɩɩg tus pisi la a nu wã, hal n tãag yaang sẽnẽ toadgã, ne sẽn sɩng ne nin-taoor sẽnẽ kɩreng ning woglem sẽn yaa kãntɩɩg tus pisi la a nu wã, hal n tãag nin-taoor sẽnẽ toadgã. Pʋɩ-kãng sẽn yaa wa pʋɩɩr a taabã na n yɩɩ naabã rẽnda. Zĩig ning b sẽn yãk tɩ yaa toorã ne Wẽnd doogã zĩig ning sẽn welg toorã na n zĩnda tẽn-sʋka.

²²Leevi nebã sẽn so zĩig ningã wogellã, ne zĩig ning sẽn yaa tẽngã rẽndã wogellã, naabã sẽn na n soog-a soabã na n zĩnda tẽn-sʋka, Zʋʋda toadgã ne Benzame toadgã sʋka. Zĩ-kãng na n yɩɩ naabã pʋɩɩre.

²³Ad Israyɛll buud a taabã pʋɩɩre: Sẽn sɩng ne yaang n tɩ ta nin-taoorã, yaa Benzame buudã pʋɩɩre.

²⁴Sẽn yegd Benzame buudã pʋɩɩrã, sẽn sɩng ne yaang n tɩ ta nin-taoorã yaa Sɩmyõ buudã pʋɩɩre.

²⁵Sẽn yegd Sɩmyõ buudã pʋɩɩrã, sẽn sɩng ne yaang n tɩ ta nin-taoorã yaa a Isakaar buudã pʋɩɩre.

²⁶Sẽn yegd Isakaar buudã pʋɩɩrã, sẽn sɩng ne yaang n tɩ ta nin-taoorã yaa Zabulõ buudã pʋɩɩre.

²⁷Sẽn yegd Zabulõ buudã pʋɩɩrã, sẽn sɩng ne yaang n tɩ ta nin-taoorã yaa Gaad buudã pʋɩɩre.

²⁸Sẽn yegd Gaad buudã toadgã, nug-goabg sẽnẽ kɩrengã sẽn dabd nug-goabg sẽnẽ wã, toadgã na n yɩɩ sẽn sɩng ne Tamaar tẽngã, n tɩ tãag Meriba sẽn be Kadɛɛsã koomã, hal n tãag Ezɩpt ko-soogã, n dabd ko-kãsengã sẽnẽ.

²⁹Woto n yaa tẽng ning yãmb sẽn na n maan poeer n pʋɩ n kõ Israyɛll buud toay-toayã. Rẽndã n na n yɩ bãmb pʋɩɩre. Maam a Zu-soab a Sẽn-Ka-Saab n yeele.

³⁰Ad tẽngã rignoyã: nug-rɩtg sẽnẽ kɩrengã woglem sẽn yaa kãntɩɩg tus a naas la kobs-nu wã,

³¹yaa rignoy nins Israyɛll buud toay-toayã yʋy sẽn be b zutã. Rignoy a tãab n be nug-rɩtgo: rignoor a yembre yaa Rubɛn buudã yĩnga, t'a yembr yaa Zʋʋda yĩngã, t'a yembr yaa Leevi buudã yĩnga.

³²Yaang sẽnẽ kɩrengã woglem sẽn yaa kãntɩɩg tus a naas la kobs-nu wã, yaa rignoy a tãab n be beenẽ: a yembr yaa Zozɛf buudã yĩnga, a yembr Benzame yĩnga, a yembr Dan buudã yĩnga.

³³Nug-goabg sẽnẽ kɩrengã woglem sẽn yaa kãntɩɩg tus a naas la kobs-nu wã, rignoy a tãab n be beenẽ: a yembr yaa Simeyõ buudã yĩnga, a yembr Isakaar buudã yĩnga, a yembr Zabulõ buudã yĩnga.

³⁴Nin-taoor sẽnẽ kɩrengã woglem sẽn yaa kãntɩɩg tus a naas la kobs-nu wã, rignoy a tãab n be beenẽ: a yembr yaa Gaad buudã yĩnga, a yembr Asɛɛr buudã yĩnga, a yembr Neftali buudã yĩnga.

³⁵Tẽngã b sẽn mag n gilgã zãng yaa kãntɩɩg tus piig la a nii. La sẽn sɩng ne rũndã, tẽngã yʋʋr na n yɩ Adonayi-Sama, sẽn dat n togs tɩ ‹Sẽn-Ka-Saab bee ka.› »