Read SEBR SÕNGO, 1998 A Ezekɩyɛlle 7 Bible Online

A Ezekɩyɛlle 7 - SEBR SÕNGO, 1998 bible

A Ezekɩyɛlle 7

¹Sẽn-Ka-Saab goma ne maam n yeel yaa:

²«La foom a ninsaala, ad maam a Zu-soab a Sẽn-Ka-Saab sẽn gomd ne Israyɛll tẽn-gãongã n yetẽ: ‹Sɛɛbã wakat taame! La tẽngã kɩrems a naasã sɛɛb wakat watame.

³Moasã, sɛɛbã wakat taa fo yĩnga. Mam sũurã na n yika ne foom. Mam na n kaoo fo bʋʋd wa sẽn zems f manesmã, mam na n kɩtame tɩ f yel-beedã sɩbgr wa f zugu.

⁴Mam ka na n zoe f nimbãaneg ye. Mam ka na n bas ned ba a yembr t'a põs ye. Bala, mam na n kɩtame tɩ f yel-beedã fãa wa f zugu. Fo yel-beedã na n zĩnda f pʋgẽ. Woto, yãmb na bãng tɩ mam yaa Sẽn-Ka-Saabo.› »

⁵Ad Zu-soab a Sẽn-Ka-Saab sẽn yeta: «Toogo! Toog sẽn ka tar to n wate!

⁶Sɛɛbã watame! Sɛɛbã waame n sɛ! A yik n wata fo yĩnga! A na n waame!

⁷Tẽngã nebã, yãmb me wakatã watame, daarã watame, pelen-yɩk daarã watame! Sũ-noog kaasg ka na n leb n zĩnd tãmsã zut ye!

⁸Moasã, mam segl n sɛɛme, n na n sik m sũ-puugrã fo zugu. Mam na n basame tɩ m sũ-puugrã maan a tʋʋmd n tãag a tɛka. Mam na n kaoo fo bʋʋd wa sẽn zems f manesmã, mam na n kɩtame tɩ f yel-beedã sɩbgr wa f zugu.

⁹Mam ka na n zoe f nimbãaneg ye, mam ka na n bas ned ba a yembr t'a põs ye. Bala, mam na n kɩtame tɩ f yel-beedã wa f zugu. Fo yel-beedã na n zĩnda f pʋgẽ. Woto, yãmb na bãng tɩ mam yaa Sẽn-Ka-Saab sẽn sɩbgda.

¹⁰Ade, daarã waame, a watame! Wakatã watame! Dasaarã ningda puudu! Tɩtaamã lebgda wʋsgo!

¹¹Pãn-maanegã yikame n yals n na n yɩ wẽngã dasaare: Bãmb bũmb ba a yembr ka na n pa ye! Bãmb paoongã na n sɛɛme! Bãmb nebã na n sɛɛme! Bãmb ziirã na n sɛɛme.

¹²Wakat watame, daarã kolgdame! Bɩ sẽn daad-a ra maan sũ-noog ye. Bɩ sẽn koosd-a ra maan sũ-sãang ye! Bala, mam sũ-puug-kãsengã yika ne tẽngã arzegs fãa.

¹³Sɩdã, ned sã n dag n koos a bũmbu, ba a sã n ket n vɩ, a ka na n leb n paam a bũmbã ye. Bala, vẽnegr ning sẽn gomd tẽngã paoongã fãa yellã pidsg ka na n vaal ye. Ned kõn tõog n kogl a vɩɩm a kongr yĩng ye.

¹⁴B peebda baorgo, b segl n sɛɛme, la ned ba a yembr ka kẽnd zabr ye. Bala, mam sũ-puug-kãsengã yika ne tẽngã arzegs fãa.

¹⁵Yɩnga, zabr sʋʋga! Pʋgẽ, bã-longds la kom! Sẽn be-a weoogẽ na n kii ne zabr sʋʋga. La sẽn be-a tẽngã pʋga, kom la bã-loangdg n na n kʋ-a.

¹⁶Bãmb neb nins sẽn põsã zoet n dʋʋda tãmsã zut wa walã sẽn be londã pʋsã. Bãmb ned kam fãa wõosda a meng kongr yĩnga.

¹⁷Bãmb fãa nus pãng sɛɛme, b rũmã fãa komsame.

¹⁸Bãmb sẽgenda boto, la b rigda ne rabeem. Yãnd tara bãmb fãa, bãmb zutã fãa põngame.

¹⁹Bãmb na n loba b wanzuri wã soayã zutu, la bãmb sãnemã na n yɩɩ bõn-dẽgdo, la b wanzuri wã ne b sãnemã, ka na n tõog n fãag-b Sẽn-Ka-Saab sũ-puugrã daar ye. Bãmb wanzuri wã ne b sãnemã ka tõe n dɩk n ning b noorẽ, la b ka tõe n pids bãmb pʋs me ye. Bala, yaa bõn-kãens n yɩ bãmb kug-lakdga, la yaa bõn-kãens n wa ne b kongrã.

²⁰Bãmb wuka b mens ne b fan-teedã, bãmb ninga b yel-beedã ne b yel-yoodã naand b fan-teedã zutu. Yaa rẽ tɩ m na n kɩt tɩ b lebg bõn-dẽgd b yĩnga.

²¹Mam na n kɩtame tɩ sãamb wa fã-ba, la m bas tɩ b lebg tẽngã nin-wẽns laogo, tɩ b tõe n dẽgem-ba.

²²Mam na n tud-b-la m kudga, la b na n dẽgma m laogã bĩngr zĩiga. Fãadb n na n kẽ beenẽ n dẽgm-a.

²³Segl sogle! Bala, tẽngã pida ne zɩɩm daagre, a pida ne pãn-maanego.

²⁴Mam na n kɩtame tɩ buud nins sẽn yaa wẽns n yɩɩd buud a taabã wa reeg b yiyã n sooge. Mam na n kɩtame tɩ pãens-rãmbã wuk-m-meng sɛ, la b na n dẽgma bãmb zĩ-sõama wã.

²⁵Yellã daar watame, nebã na n baoo vɩ-bãane, la vɩ-bãane ka na n zĩnd ye!

²⁶Na n yɩɩ toog woo, toogo, na n yɩɩ koe-beed woo, koe-beedo. Bãmb kota no-rɛɛsdbã tɩ b kõ bãmb vẽnegre, maan-kʋʋdbã ka leb n mi tõogã n na n zãms nebã ye, la kãsem-dãmbã ka leb n tar saglg n na n sagl nebã ye.

²⁷Rĩmã zĩi ne sũ-sãanga, nanambsã sũy pida ne sũ-sãanga, la tẽngã nebã nus rigdame. Mam na n sɩbga bãmb wa sẽn zems b tʋʋmã, mam na n kaoo bãmb bʋʋdo, wa bãmb sẽn kaood bʋʋdã to-to wã. Woto, bãmb na bãng tɩ mam yaa Sẽn-Ka-Saabo.»