Read SEBR SÕNGO, 1998 A Dãniyɛlle 11 Bible Online

A Dãniyɛlle 11 - SEBR SÕNGO, 1998 bible

A Dãniyɛlle 11

¹Mam me zĩnda ne yẽnda n sõng-a la m tebl-a, Meed-rãmbã ned a Daryuus sẽn wa n lebg rĩmã yʋʋmde.

²Moasã, mam sẽn na n togs foomã yaa koɛɛg sẽn yaa sɩda. Ade, rĩm-dãmb a tãab n na n pʋgl taab n yɩ Pɛrs-rãmbã rĩm-dãmba. Rẽ zugẽ, naasẽ soab sẽn tar arzegs wʋsg n yɩɩd a taabã n na n zĩndi. La yẽnda arzegsã na n kɩtame tɩ yẽnda paam pãnga, yẽnda na n maana a sẽn tõe tɛk n yik zabr ne Gɛrk-rãmbã soolem.

³La rĩm a yembr sẽn yaa gãndaoog n na n yik n soog nebã ne pãnga, n maand a sẽn date.[7]

⁴La yẽnda naamã sẽn wat n paam pãngã, a soolmã na n wãame, n welg n kẽ dũniyã ween-vɩɩs a naasã. Yẽnda pendã ned ka na n tol n led a zĩigẽ n dɩ naamã ye. Yaa neb a taab n na n deeg naamã, la bãmb naamã pãng ka na n ta na-kãng rẽndã ye.

⁵La goabg tẽng rĩmã pãng na n tara paasgo. La rĩm-kãng nanambsã ned a yembr pãng na n yɩɩga yẽnda, la na-kãng naamã na n talla pãnga.

⁶La yʋʋm bilf loogr zugẽ, bãmb na n maana kaool ne taaba. La goabg tẽng rĩmã na n dɩka a bi-pugl n kõ rɩtg tẽng rĩmã, n bao zems-n-taare. La bi-puglã ka na n tõog tɩ kaoolã yals ye. Bala, b na n kʋʋ yẽnda, la b kʋ a ba wã ne a sɩdã la biigã ne b tʋmtʋmdbã wakat-kãng bala.

⁷La wakat-kãnga, bi-puglã buudã ned a yembr n na n yik n led a ba wã sẽn yaa Ezɩpt rĩmã zĩigẽ, n kẽng rɩtg rĩmã tãnsobengẽ wã, tẽngã sẽn gũbg ne lalsã pʋgẽ, n tɩ zab ne-a, n deeg a tẽngã n sooge.

⁸La nin-kãng na n wʋka tẽngã laogã sẽn yaa wẽn-naandsã, ne a sãnem la a wanzuri laasã, n tall n kẽng Ezɩpt tẽngã. Rẽ zugẽ, na n maana yʋʋmã, tɩ b ka leb n zab ne rɩtg rĩmã ye.

⁹Rẽ poore, rɩtg rĩmã na n kẽnga Ezɩpt rĩmã soolmẽ, n yaool n lebg n leb a tẽngẽ.

¹⁰Rɩtg rĩmã kom-dibli na n tigsa tãb-bi-kʋʋngo, n segl zabre. La bãmb ned a yembr ne a tãb-biisã na n yika zabre, n pasg toadgã n fõt wa kʋɩlg sẽn pid n fudgdẽ. La a sã n lebg n watẽ, a na n tees n zaba ne bɛyã tẽng sẽn gũbg ne lalsã.

¹¹La Ezɩpt rĩmã sũur na n yikame t'a yi n kaoog zabr ne rɩtg rĩmã. La rɩtg rĩmã na n yii ne tãb-bi-kʋʋng n seg-a, la Ezɩpt rĩmã na n tõoga tãb-bi-kʋʋn-kãnga.

¹²La Ezɩpt rĩmã na n wuka a meng a tõogrã yĩnga, la baa ne yẽnda sẽn tõog n sãam tãb-biis wʋsgã, yẽnda ka na n paam tõogr ye.

¹³Bala, wakat bilf loogr zugẽ, rɩtg rĩmã na n lebg n tigsa tãb-biis sẽn yaa wʋsg n yɩɩd pipi rãmbã, n lebg n wa. Rɩtg rĩmã na n waa ne tãb-bi-kʋʋng sẽn tar zab-teed sẽn tar pãng wʋsgo.

¹⁴Wakat-kãnga, neb wʋsg na n yikame n dat n zab ne Ezɩpt rĩmã, la neb kẽer sẽn yaa fo meng buud neb sẽn yaa nen-kegems na n yikame n dat n pids vẽnegrã, la b ka na n tõog ye.

¹⁵Rɩtg rĩmã na n yika zabr ne tẽms sẽn gũbg ne lalse, la a na n tõog-b lame. La Ezɩpt tãb-bi-kʋʋngã ne b gãndaadã ka na n paam pãng n tõog n yals n zab ne-a ye.

¹⁶Rɩtg rĩmã na n maana a sẽn dat ne Ezɩpt rĩmã, tɩ ned ka be n na n tõog n yals n zab ne-a ye. La yẽnda na n sãama bũmb nins fãa sẽn be yẽnda sorã zugu, n kẽng n tɩ zĩnd tẽng ning sẽn yaa neer n yɩɩd fãa wã pʋgẽ.

¹⁷Dẽ, rɩtg rĩmã na n baoome n dat n tall a soolmã pãng fãa n wa yõg zood ne Ezɩpt rĩmã, n dɩk a bi-pugl n kõ-a t'a maan a paga, sẽn na yɩl n paam-a n sãame. La sɩlem-kãng ka na n zems ye.

¹⁸Dẽ, rɩtg rĩmã na n wẽnemdame n zab ne tẽms nins koom sẽn gũbgã, n tõog n deeg tẽms wʋsgo. La tãb-biis naab a yembr n na n yik n kɩt tɩ rɩtg rĩmã wuk-m-mengã sɛ, la a kɩt t'a tʋʋm-beedã leb-a.

¹⁹Dẽ zugẽ, rɩtg rĩmã na n lebg n leba a meng tẽngã sẽn gũbg ne lalsã pʋgẽ. La a ka na n paam sõngr ye. Yẽnda na n kiime tɩ b ka leb n wʋm a rãamd ye.

²⁰Ned ning sẽn na n led-a yẽnda zĩigẽ wã na n kɩtame tɩ nin-toaag wa zɛ soolmã roog ning sẽn yaa-a neer n yɩɩd fãa wã [8] teedo. La rasem bilf zugẽ, b na n kʋ-a lame, tɩ ka tũ ne sũ-puugri, wall ne zabr ye.

²¹La nin-yaalg sẽn ka tar waoogre, la sẽn dag n ka tog n yɩ naab n na n deeg yẽnda naamã. Yẽnda na n maana sɩlem, n wa wakat ning soolmã sẽn gãe bãanã, n deeg-a.

²²Tãb-bi-kʋʋng na n yikame n fõt n wat n na n zab ne yẽnda, la yẽnda na n sãam-b lame, la a tol n kʋ kaoolã nebã taoor soaba.

²³Nebã na n maana kaool ne yẽnda, la rẽ zugẽ, yẽnda na n tũnuga rẽ n maan sɩlem, la baa ne yẽnda poorẽ dãmbã sẽn ka waoogã, yẽnda pãngã na n tara paasgo.

²⁴Yẽnda na n kẽe tẽngã zĩis nins sẽn yaa zĩ-sõama wã tɩ ka tũ ne zabr ye. La yẽnda na n maana bũmb a ba-rãmbã ne a yaab-rãmbã sẽn zɩ n maane. A na n wʋka te-zɛɛdmã, laogã, ne arzegsã yẽnda sẽn dag n paamã n pʋɩ nebã, la a maan sɩlem, n tõog tẽms nins sẽn tar pãngã. La bõn-kãng na n kaoosa wakat bilf bala.

²⁵Yẽnda na n lʋɩɩ tãb-bi-kʋʋng taoor ne raoodo, la sẽn tar pãng wʋsgo, n kẽng n tɩ zab ne Ezɩpt rĩmã. La Ezɩpt rĩmã na n yii ne tãb-bi-kʋʋng sẽn tar pãnga, n seg-a n zab ne-a. La Ezɩpt rĩmã ka na n tõog rɩtg rĩmã ye. Bala, b na n zãmb-a lame.

²⁶Yaa neb nins sẽn na n naag Ezɩpt rĩmã n dɩ wã, n na n wẽneg n sãam dĩmã. Zabrã na n yɩɩga tãb-biisã pãnga, la wʋsg na n kiime.

²⁷Rĩm-dãmb a yiibã na n zĩnd n dɩɩ ne taaba, la ned kam fãa sẽn baood a to ne wẽngã yĩnga, b na n goma zĩrẽ goam ne taaba. La b sẽn dag n dat n maanã ka na n tõoge, tɩ sã n ka wakat ning b sẽn yãkã n ta ye.

²⁸Rɩtg rĩmã na n lebg n leba a tẽngẽ wã ne arzegs wʋsgo. Yẽnda sũurã na n yika ne Wẽnnaam nin-sõamyã. La a na n maana a sẽn date, n yaool n lebg n leb a tẽngẽ wã.

²⁹La wakat ning b sẽn yãkã sã n ta, yẽnda na n lebg n tɩ zaba ne Ezɩpt rĩmã. La wakat-kãngã, yɛlã ka na n yɩ wa pipi wã ye.

³⁰Neb n na n yi Kitim ne koom kogend n tɩ zab ne-a. La yẽnda sũurã na n sãamame t'a lebg n na n kuili. Dẽ, yẽnda sũ-puugrã pʋga, a na n tees n zaba ne Wẽnnaam nin-sõamyã. A na n leb n paama zems-n-taar ne neb nins sẽn na n bas Wẽnnaam kãab-sõngã.

³¹Yẽnda na n tʋma tãb-bi-sul tɩ b kẽng zĩ-sõngã b sẽn leb n gũbgã, n tɩ maan bũmb sẽn kisi, n dẽgem-a la b gɩdg tɩ b ra leb n maan daar fãa maoongã n kõ Wẽnnaam ye. La bãmb na n lugla sãamdã bõn-naandgã tẽn-kugrã zugu.

³²Rɩtg rĩmã na n goma no-noom goam n belg neb kẽer tɩ b bas Wẽnnaam kaoolã. La neb nins sẽn ket n sakd Wẽnnaamã na n kell n yalsa kãenkãe.

³³Yam dãmbã sẽn be nebã sʋkã na n zãmsa neb wʋsg tɩ b paam bãngre. La wakat bilf pʋgẽ, b na n kʋʋ neb kẽer bãmb sʋkã ne zabr sʋʋga, la b yõog kẽer bugum, la b yõg kẽer n kẽes yembdo, la b zɛ kẽer paoongo.

³⁴B sẽn wat n kʋʋd neb kẽerã wakate, b na n paama sõngr bilfu. La neb wʋsg sẽn yaa pʋ-libsim dãmb na n naaga bãmba.

³⁵B na n kʋʋ yam dãmbã sʋk neb kẽere, la rẽ na n waa ne nebã yɩlgre, la b pekre, tɩ b lebg sõama, hal tɩ sɛɛbã wakat Wẽnnaam sẽn yãkã ta, bala rag n nan ka sɛɛbã wakat nand ye.

³⁶La rɩtg rĩmã na n maana a sẽn date. A na n wuka a menga, n pẽg a meng n yeel tɩ yẽnda yɩɩda wẽnnaam-dãmbã fãa, la a na n goma gom-bɛd n paoog wẽnnaam-dãmb Wẽnnaamã. La a na n paama tõogr hal tɩ ta Wẽnnaam sũ-puugrã daare. Bala, Wẽnnaam sẽn yeelã na n paama pidsgu.

³⁷Yẽnda ka na n tol n waoog a yaab-rãmbã wẽnnaam-dãmbã, wall pagbã sẽn nong n waoogd Wẽnnaam ningã ye. Yẽnda ka na n waoog Wẽnnaam ba a yembr ye. Bala, yẽnda na n tagsame t'a yɩɩda b fãa.

³⁸A na n basa bãmb fãa, n waoog tẽms nins sẽn gũbg ne lals wẽnnaamã, sẽn yaa Wẽnnaam ning yẽnda yaab-rãmbã sẽn dag n ka mi wã. Yẽnda na n waooga wẽnnaam-kãng ne sãnem la wanzuri, la ne kug buud sẽn tar yõodo, ne kũun buud toor-toore.

³⁹Yẽnda na n teega Wẽnnaam-kãngã, n yik zabr ne tẽms nins sẽn gũbg ne lalsã. La yẽnda na n waooga neb nins sẽn sakd yẽnda wã, n kɩt tɩ b yɩ nanambs n soog neb wʋsgo, la a kõ-b zĩis tɩ yɩ b keoore.

⁴⁰La wakat ning b sẽn yãk tɩ yaa sɛɛbã wakatã sã n ta, Ezɩpt rĩmã na n zaba ne rɩtg rĩmã. La rɩtg rĩmã na n talla a saar-dãmbã, ne a wed-rʋʋdbã, la a koom kogend wʋsg n fõd n kẽ-a wa sob-kẽenga, n kẽ b tẽmsã n pasg n looge.

⁴¹Rɩtg rĩmã na n kẽe tẽng ning sẽn yaa neer n yɩɩd fãa wã pʋgẽ, la a na n kʋʋ neb wʋsgo. La Edom ne Moaab la Amo-rãmbã taoor dãmbã na n zoe n põsame t'a ka paam-b ye.

⁴²Yẽnda na n zab n deega tẽms a taab wʋsgo, la baa Ezɩpt tẽngã ka na n põs ye.

⁴³Yẽnda na n wʋka Ezɩpt tẽngã arzegsã n sooge: Yaa sãnem, wanzuri, ne Ezɩpt tẽngã teed nins fãa sẽn tar yõodã. La Libi ne Kuus nebã na n pʋga yẽnda.

⁴⁴La yẽnda na n wʋma kibay sẽn yit yaang la rɩtgo, tɩ rabeem-kãseng yõk-a, t'a yik ne sũ-puug-kãsenga, n tɩ kʋ neb tus-kẽema.

⁴⁵Yẽnda na n tilga a naamã fu-rot ko-kãsemsã ne tãn-sõngã [9] sẽn yaa neerã sʋka. La kũumã na n linga yẽnda beenẽ, tɩ ned ka be n na n fãag-a ye.