Read SEBR SÕNGO, 1998 A Dãniyɛlle 7 Bible Online

A Dãniyɛlle 7 - SEBR SÕNGO, 1998 bible

A Dãniyɛlle 7

¹Babilond dĩm a Bɛlsatzaar naamã pipi yʋʋmdã pʋgẽ, a Dãniyɛll sẽn wa n be a gãagẽ, a zãmsa zãmsdo, la a paam vẽnegre. La rẽ zugẽ, a Dãniyɛll gʋlsa bõn-kãng n wilg a sẽn yɩ to-to ball-balle.

²A Dãniyɛll yeelame: «Ade, mam yʋngẽ zãmsdã pʋga, mam dag n getame, la mam yãnda sobg sẽn yi dũniyã kɩrems a naasã n wa wẽ ko-kãsengã.

³La rũm-bɛd a naas n yi koomẽ wã, la bãmb baa a yembr dag n ka wẽnd a to ye.

⁴Pipi rũngã ra wẽnda wa gɩgemde, la a rag n tara sɩlg pɩgsa. La mam sẽn ket n getẽ, mam yã b sẽn võ a pɩgsã. La b yik-a lame n yals yĩngr a naoã zutu, wa ninsaal sẽn yas to-to wã, la b kõo yẽnda ninsaal yam.

⁵La mam yãnda rũng a yiibẽ soab sẽn wẽnd rigd-n-yĩidga. Rũn-kãng rag n yik n yas a poorẽ naoã zutu, la a ra zãada sĩ-biis a tãab a noorẽ.» La b yeel-a lame yaa: «Yik n wãb nemd wʋsgo.»

⁶Rẽ zugẽ, mam dag n getame, la mam yãnda rũng a to sẽn wẽnd ãbga, la a rag n tara pɩgs a naas sẽn yaa liuul pɩgs a poorã zugu, la rũn-kãng rag n tara zut a naase, la b kõ-a-la naam.

⁷Dẽ poore, mam dag n ket n geta m yʋngã vẽnegr pʋgẽ, la ade, mam yãnda rũng a naasẽ soab sẽn yaa bõn-bãnde, n kẽesd rabeem, t'a pãngã yaa kãseng wʋsgo. La a rag n tara yẽn-bɛd sẽn yaa kutu. Yẽnda rag n gʋsdame n wãbdẽ la a zendemdẽ, la a tabd sẽn kellã ne a naoã. Yẽnda yaa toor zãnga, n ka tol n wẽnd rũms nins mam sẽn dag n zoe n yãndã ye, la a rag n tara yɩɩl piiga.

⁸La mam sẽn ket n get yɩɩlã wakate, mam yãnda yɩɩn-bil a yembr sẽn yi bãmb sʋkã, n võ pipi yɩɩlã a tãabo, la yɩɩn-bilã rag n tara nin wa ninsaal nini, la a tar noor sẽn gomd tɩtaam goamã.

⁹Mam sẽn wa n getẽ wã, mam yãndame tɩ b vigind naam gɛya, la nin-kẽem kulkuug n wa n zaoond be, bãmb fuugã rag n yaa pɛɛlg faddd... wa lamdo, tɩ b zugã zoobd pelg wa pe-bil kõbdo, bãmb geerã rag n yaa wa bug-witim, t'a naoã yaa wa bug-saala.

¹⁰La bugum n dag n yit bãmb taoorã, n zoet wa kʋɩlg koom. Neb tus kẽema n tʋmd bãmb yĩnga, la neb tus kẽema ka tɛk n yas bãmb taoore. Bʋ-kaoodbã zĩndame, la b laka sɛba.

¹¹Dẽ, mam dag n ket n getame, yɩɩllã sẽn dag n gomd tɩtaam goamã yĩnga. La mam sẽn wa n ket n getẽ wã wakate, mam yãnda b sẽn kʋ rũng a naasẽ soabã, n dɩk-a n lob bugmẽ wã, tɩ bugmã rɩ-a.

¹²La b reega rũms a taabã naamã n bas-ba, la b basame tɩ rũm-kãens na n kell n vɩɩmde, n tãag wakat b sẽn yãke.

¹³Mam dag n ket n geta m yʋng vẽnegrã pʋga, la mam yãnda bũmb sẽn wẽnd ninsaal t'a zao sawatã n sigda. La bũmbã sẽn wẽnd ninsaalbã kẽng n kolga nin-kẽem kulkuugã, la b kɩtame t'a pẽneg nin-kẽem kulkuugã.

¹⁴La b kõo yẽnda ninsaalbã pãnga, waoogre, la naam. La nebã buud fãa, ne soolem-dãmbã fãa, la ninsaalbã sẽn gomd goam buud toor-toorã, tʋmda yẽnda yĩnga. La yẽnda pãnga paada wakat sẽn ka sɛta, la a pãngã ka tar sɛɛb ye. La yẽnda naamã ka na n tol n sãam ye.

¹⁵Maam a Dãniyɛll yamã bondgame, la vẽnegr ning mam sẽn yã wã kẽesa maam dabeem.

¹⁶La mam kolga neb nins sẽn dag n yas beenẽ wã ned a yembr n sok-a n na n bãng bõn-kãensã fãa võore. La yẽnda bilga maam vẽnegrã võor n yeel yaa:

¹⁷«Rũm-bɛd a naasã fo sẽn yãndã mamsda rĩm-dãmb a naas sẽn na n wa zĩnd dũniyã zugu.

¹⁸La Wẽnnaam Sẽn-Ka-To nin-sõamyã na n deega soolmã n soog wakat sẽn kõn sa.»

¹⁹Rẽ zugẽ, mam baoome n na n bãng rũng a naasẽ soabã sẽn yaa toor ne a taabã võore. Rũn-kãng rag n yaa bõn-bande, n tar yẽn sẽn yaa kutu, t'a nao-yẽesã yaa zũudu. La yẽnda wãbdame la a zendemdẽ, la a tabd sẽn kellã ne a naoã.

²⁰La mam baoome me n na n bãng yɩɩl piigã sẽn dag n be yẽnda zugẽ wã, ne yɩɩll ning sẽn yaool n puk-a bãmb sʋk n kɩt tɩ yɩɩl a tãabã lʋɩ wã võore. Yɩɩn-kãng rag n tara nini, la noor sẽn gomd tɩtaam goamã, la yẽnda wẽnda wa a tara pãng n yɩɩd yɩɩl a taabã.

²¹La mam sẽn ket n getẽ, mam yãame tɩ yɩɩn-kãng yika zabr ne Wẽnnaam nin-sõamyã, la a tõoga bãmba,

²²hal tɩ nin-kẽem kulkuugã wa n na n kao Wẽnnaam Sẽn-Ka-To nin-sõamyã bʋʋdo. La wakat wa n taame tɩ nin-sõamyã tõog n deeg naamã n sooge.

²³Nin-kãng goma ne maam n yeele: «Rũng a naasẽ soabã mamsda soolem a naasẽ soab sẽn na n wa n zĩnd dũniyã zugu. La soolem-kãng na n yɩɩ toor ne soolem a taabã. La a na n dɩɩ dũniyã gilli, n tab-a ne a nao n sãame.

²⁴Yɩɩl piigã mamsda rĩm-dãmb piig sẽn na n pʋgl taab n zĩnd soolem-kãng pʋga. La a to n na n pʋgl bãmb n zĩndi. La yẽnda na n yɩɩ toor ne pipi rãmbã, la a na n luba rĩm-dãmb a tãabo.

²⁵Yẽnda na n goma goam sẽn paoogd Wẽnnaam Sẽn-Ka-To, la a na n namsa Wẽnnaam Sẽn-Ka-To nin-sõamyã. A na n makame n na n tek wakatã, la a tek Wẽnnaam nebã wẽn-tũudmã tõodã. La b na n basame t'a soog nin-sõamyã yʋʋm a tãab la pʋɩ-sʋka.

²⁶Rẽ zugẽ, b na n bʋ a bʋʋdo, la b reeg a naamã n bas-a, la b sãam-a t'a menem zãng wakat sẽn kõn sɛ yĩnga.

²⁷La b na n dɩka soolem nins fãa sẽn be dũniyã zugã naamã, ne b pãngã n kõ Wẽnnaam Sẽn-Ka-To nin-sõamyã tɩ b sooge. Wẽnnaam Sẽn-Ka-To soolmã paada wakat fãa, la pãens rãmbã fãa na n waooga bãmba, la b sak-ba.»

²⁸Yaa koɛɛgã baoosg la woto. Dẽ, maam a Dãniyɛll yamã bõdmame, la rabeem kẽe maam wʋsgo, hal tɩ m nengã teke, la mam bĩnga bõn-kãensã fãa m sũurẽ.