Read SEBR SÕNGO, 1998 A Dãniyɛlle 8 Bible Online

A Dãniyɛlle 8 - SEBR SÕNGO, 1998 bible

A Dãniyɛlle 8

¹Rĩm a Bɛlsatzaar naamã reegr yʋʋm a tãab soabã pʋga, maam a Dãniyɛll leb n yãnda vẽnegr a to, la yaa mam pipi vẽnegrã mam sẽn yã tɩ loogã poore.

²Vẽneg-kãng pʋgẽ, mam yãame tɩ mam bee Suuz sẽn yaa Elam soolem na-tẽngã pʋga, Ulayi kʋɩlgã noore.

³Mam zẽka m neng n gese, la mam yãnda pe-raoog sẽn yas kʋɩlgã noore, n tar yɩɩl a yiibu. A yɩɩlã rag n yaa wogdo, la a yembr n dag n yaa wok n yɩɩd a to wã. La sẽn yaa a wokã n yɩ yaoolem soab n yi.

⁴La mam yãndame tɩ pe-raoogã tãad goabg la rɩtgo, la nin-taoore, la rũng baa a yembr rag n ka tõe n yals n zab ne-a ye. La b rag n ka tõe n fãag ned a nugẽ ye. Yẽnda rag n maanda a sẽn date, la a pãngã rag n tara paasgo.

⁵La mam sẽn nan ket n tagsd bõn-kãng yelle, mam nee boɛɛg sẽn yi nin-taoor n zoet n gilgd tẽn-gãongã gilli, t'a naoã yaool n ka sɩɩsd tẽng ye. La boɛɛgã rag n tara yɩɩn-bedr a yembr a ninã sʋka.

⁶Yẽnda sẽn ta pe-raoog ning sẽn tar yɩɩl a yiibã mam sẽn dag n yãnd t'a yas kʋɩlgã noorã sẽn beẽ wã, a wudga ne a pãngã tɛk fãa n babsd-a.

⁷La mam yãnda boɛɛgã sẽn kolgd pe-raoogã ne sũ-yikri. La a tãaga pe-raoogã, n kao a yɩɩl a yiibã fãa, la pe-raoogã rag n ka tar pãng n tõe n zab ne-a ye. La a luba pe-raoogã tẽnga, n tab-a ne a naoã, la ned dag n ka be n na n fãag pe-raoogã boɛɛgã nugẽ ye.

⁸Boɛɛgã pãng rag n tara paoosgo, la a pãngã sẽn wa n lebg wʋsgã, yɩɩn-bedrã kaoome. La yɩɩn-bɛd a naas n led a zĩigẽ n yi n teesd yĩngr ween-vɩɩs a naasã. [1] Rẽ poore, b na n lebsa zĩ-sõngã zĩigẽ.

⁹Yɩɩll sẽn yaa bilf wʋsg n yi yɩɩn-bãmb sʋkã yɩɩll a yembr zĩigẽ, la a lebga bedr wʋsg n tees rɩtgo, yaanga, la tees tẽn-neer n yɩɩdã sẽnẽ.

¹⁰Yɩɩn-bilfã zẽkame n tãag saasẽ tãb-biisã, la a kɩtame tɩ tãb-bi-kãens kẽer ne ãdsã lʋɩ tẽnga, la yẽnda tab-b lame.

¹¹Yẽnda tol n zẽkame n tãag tãb-biisã Naabã, a rẽgma maoong ning sẽn maand daar fãa wã maanego, ne a zĩ-sõngã.

¹²Yɩɩn-bilã tʋʋm-wẽnsã yĩnga, n tõog n soog saasẽ tãb-biisã ne maoong ning sẽn tog n maan daar fãa wã. Yɩɩn-bilã loba sɩdã tẽnga, n paama tõogr a tʋʋmã fãa pʋga.

¹³La mam wʋma pʋ-peelem soab a yembr sẽn gomde, la pʋ-peelem soab a to yeela yẽnda yaa: «Vẽnegrã sẽn kẽed ne daar fãa maoongã wɛɛngẽ wã, ne tʋʋm-wẽnsã wɛɛngẽ wã, la zĩig sẽn welg toorã wɛɛngẽ wã, ne a sẽn tõog tãb-biisã n tabã na n kaoosame n ta dabʋr n yaool n pidsi?»

¹⁴Pipi pʋ-peelem soabã yeela maam yaa: «Yaa zaabr la yibeoog tusr la kobs-tã loogr zugẽ, la b na n lebs n maneg zĩis nins sẽn welg toorã.»

¹⁵La maam a Dãniyɛll sẽn wa n ket n get vẽnegrã, la m baood n wʋm a võorã, mam yãnda bũmb sẽn wẽnd ninsaal sẽn wa n yals mam taoore.

¹⁶La mam wʋma ninsaal koɛɛg sẽn yi Ulayi kʋɩlgã sẽnẽ n kelem n yeel yaa: «Gabriyɛlle, bilg nin-kãngã vẽnegrã võore.

¹⁷Dẽ, malɛɛk a Gabriyɛll kẽngame n kolg zĩig ning mam sẽn dag n be wã, la mam yɛɛsame, n lʋɩ n fõgen m neng tẽnga. La a yeela maam yaa: Ninsaal biiga, bãng tɩ vẽnegrã wilgda yɛlã sẽn na n yɩ to-to yaoolem wakate.»

¹⁸Malɛɛk a Gabriyɛll sẽn wa n ket n gomd ne maamã wakate, mam sobgame tɩ m nengã ket n fõg tẽnga. La a sɩɩsa maam n kɩt tɩ m yik n yals zĩig ning mam sẽn dag n beẽ wã.

¹⁹La malɛɛk a Gabriyɛll yeela maam yaa: Mam na n vẽnega foom bũmb ning sẽn na n zĩnd sũ-puugrã loogr zugẽ, bala, b yãka wakatã sɛɛb daare.

²⁰Pe-raoogã fo sẽn yã ne yɩɩl a yiibã mamsda Meed-rãmbã ne Pɛrs-rãmbã rĩm-dãmba.

²¹Boɛɛgã sẽn tar kõbd wʋsgã mamsda Gɛrɛs rĩmã. La yɩɩn-bedrã sẽn dag n be a ninã sʋkã mamsda pipi rĩmã.

²²La yɩɩllã sẽn kao tɩ yɩɩl a naasã led a zĩigẽ n yi wã mamsda soolem-dãmb a naas sẽn na n wa n zĩnd soolem-kãng pʋgẽ, la soolem-kãens ka na n paam pãng wa yẽnda ye.

²³La soolem a naasã sɛɛb wakat sã n ta, wẽngã maaneg sã n wa n loog nugu, rĩm sẽn yaa tɩta-ned la sɩlem soab n na n zĩndi.

²⁴Rĩm-kãng pãngã na n tara paasgo, la ka na n yɩ ne a meng pãng ye. Yẽnda na n waa ne sãoong-kãsenga, la a na n paama tõogr bũmb ning fãa a sẽn maandã pʋgẽ, la a na n sãama pãens rãmba, ne Wẽnnaam pʋ-peelem dãmbã.[2]

²⁵La a sɩlmã yĩnga, a na n tõog n tudga neb a taabã, la a na n wuka a meng a sũur pʋgẽ, la a na n sãama neb wʋsg sẽn dag n vɩ ne bãane, la a na n yik n zaba ne nanambs naabã. La yẽnda na n sãamame tɩ ka tũ ne ned nug ye.

²⁶Vẽnegr ning sẽn kẽed ne zaabr la yibeoog maandã wɛɛngẽ wã yaa bũmb sẽn yaa sɩda. Bɩ f bĩng-a f sũurẽ n da gom a yell tɩ ned wʋm ye. Bala, a yaa wakat sẽn ket n zãr yelle.

²⁷Maam a Dãniyɛll pãngã sɛɛme, la mam yɩɩ bãad rasem bilfu, la mam yĩnsã sẽn sigi, mam yiime n tɩ tʋm rĩmã yĩnga. La vẽnegrã yɩka mam pɛlenga, la mam ka tol n wʋm a võor ye.