Read SEBR SÕNGO, 1998 A Ooze 12 Bible Online

A Ooze 12 - SEBR SÕNGO, 1998 bible

A Ooze 12

¹Efrayiim nebã gũbga maam ne zĩrẽ, la Israyɛll nebã gũbga maam ne zãmbo. Zʋʋda nebã yam ket n yuusda Wẽnnaam taoore, la b sakda pʋ-peelem soabã.

²Efrayiim nebã kɩɩmda sebgo, la b rigd yaang sogbo. Daar fãa, bãmb zãmbã ne b wẽngã paasdame. Bãmb maanda kaool ne Asiiri, la b maand kaam n talld n kẽngd Ezɩpte.

³Sẽn-Ka-Saab bʋʋda ne Zʋʋda nebã. La b na n kaoo a Zakoob bʋʋdo, n maan-a wa sẽn zems a yel-manesmã ne a tʋʋmã.

⁴ A Zakoob sẽn dag n nan ket n be a ma pʋgẽ, yẽnda soga a kẽem nao-kãsenkãare, la yẽnda sẽn wa n lebg raoa, a maoo ne Wẽnnaam.

⁵Yẽ maoo ne malɛk n tõoge. Yẽnda yãbame n kos-a sõngre. Yẽnda yãnda Wẽnnaam Betɛlle. La yaa beenẽ la bãmb gom ne tõndo.

⁶Sẽn-Ka-Saab yaa Saasẽ-Pãng-Soaba. La b miime tɩ bãmb yʋʋr yaa Sẽn-Ka-Saabo.

⁷La foom, fo na n lebg n wa f Wẽnnaamã nengẽ. Kell n pa f sɩdã pʋga, la f maan sẽn yaa tɩrga. Teeg f Wẽnnaamã wakat fãa!

⁸Kana nebã zãada zãmb makds b nusẽ. Bãmb nong n belgda nebã.

⁹Efrayiim nebã yetame: Sɩda, tõnd lebga arzegs rãmba. Tõnd paama arzegse, la yaa ne tõnd nus tʋʋmã. B kõn yã kongr tõnd zug sẽn yaa yel-wẽnd ye.

¹⁰Mam yaa Sẽn-Ka-Saab n yaa yãmb Wẽnnaam, Hal Ezɩpt tẽnga. Mam na n leb n kɩtame tɩ yãmb zĩnd fu-rotẽ, wa ray nins yãmb sẽn maand y tigã wakate.

¹¹Mam goma ne no-rɛɛsdbã. Mam kɩtame tɩ bõn-makdsã lebg wʋsgo, la m tũnug no-rɛɛsdbã n wẽ yel-bũna.

¹²Galaad nebã maana wẽnga, la bãmb ka zem baa fɩ ye. Bãmb maanda lols maand Gilgalle. La bãmb tẽn-kugã na n yɩɩ wa kug rʋy sẽn be pʋt vũgsẽ,

¹³A Zakoob zoe n kẽnga Siiri, La a Israyɛll tʋm n kõo ned n paam paga. Yẽnda kɩɩma rũms tɩ b kõ-a paga.

¹⁴Sẽn-Ka-Saab kɩtame tɩ no-rɛɛs yiis Israyɛll nebã Ezɩpte, La b kɩt tɩ no-rɛɛs gũ Israyɛll nebã.

¹⁵Efrayiim nebã maan n waa ne sũ-yikr la sũ-toogo. Bãmb Zu-soabã na n kɩtame tɩ b zɩɩmã Efrayiim nebã sẽn daagã zĩnd d mens zutu. La b kɩt tɩ b yellã zĩnd b mens zutu.