Read SEBR SÕNGO, 1998 A Ooze 14 Bible Online

A Ooze 14 - SEBR SÕNGO, 1998 bible

A Ooze 14

¹B na n ninga Samaari nebã taale, Bala, b kɩɩsa b Wẽnnaamã. La b na n paa tãpẽ. B na n f kʋʋ bãmb kom-bãoonegã, la b weed b pagb nins sẽn tʋtã pʋse.

²Israyɛll nebã, lebg-y n wa-y Sẽn-Ka-Saab sẽn yaa yãmb Wẽnnaamã nengẽ. Bala, yãmb lakame n lʋɩ y kongrã pʋga.

³Segl-y goam n lebg n wa Sẽn-Ka-Saab nengẽ, n yeel-y bãmb yaa: Kõ-y-d sugr d beegrã fãa yĩnga. La y reeg bõn-sõamyã nins tõnd sẽn kõt yãmbã. Tõnd na n kõo yãmb la d pẽg yãmba.

⁴Asiiri ka na n fãag tõnd ye. Tõnd ka na n zomb wiidi ye, Tõnd ka na n leb n bool d nus tʋʋmã tɩ d wẽnnaam-dãmb ye. Bala, yaa yãmb nengẽ la kɩɩbsã paamd nimbãan-zoeere.

⁵Mam na n yiisa bãmb ka-tẽebã, Mam na n nong-b-la ne yamleoogo. Bala, mam sũ-puugrã ne-b sɛɛme.

⁶Mam na yɩɩ wa meenem Israyɛll nebã yĩnga. Bãmb na n toba wa tɩ-puudu. La b na n kɩɩ yẽg wa Libã tɩɩse.

⁷A wilã na n tẽeme, la b na n yɩɩ neeb wa oliiv tɩɩse, tɩ b yũ-noogã yɩ wa Libã tɩɩsã yũ-noogo.

⁸Neb nins sẽn zĩ a maasmẽ wã na n lebg n waame. B na n kɩtame tɩ b wom biisi. La b na n toba wa reezẽ tɩɩse. B yʋʋrã na n yii wa Libã tɩɩsã.

⁹Efrayiim nebã, Bõe yõod la mam leb n tar ne wẽn-naandsã? Maam n na n leok yãmb kosgo, la m ges y yelle. Mam na n yɩɩ wa sɩprɛs tɩɩg sẽn tobd wakat fãa wã. Yaa mam nengẽ la yãmb biisã yita.

¹⁰Ãnda n tar yam, n tõe n wʋm bõn-kãensã võore. La a tõe n bãng-ba? Sẽn-Ka-Saab soayã yaa sõama. Nin-tɩrsã na n kẽna b zutu, la kɩɩsdã na n kẽn n lagsame.