Read SEBR SÕNGO, 1998 A Ooze 5 Bible Online

A Ooze 5 - SEBR SÕNGO, 1998 bible

A Ooze 5

¹Maan-kʋʋdba, kelg-y-yã! Israyɛll nebã, kelg-y neere! Na-yir dãmba, yok-y y tʋb n kelge! Yãmb la bʋ-kaoodã sẽn gomd ne wã, bala, yãmb yɩɩ wa kũusr Mitspa, la wa tãoog b sẽn bẽd Taboor tãngã zugu.

²Kɩɩsdbã yel-wẽnã looga nugu, la maam a Sẽn-Ka-Saab na n sɩbga b fãa.

³Mam mii Efrayiim buudã, la Israyɛll ka tar bũmb sẽn solg ne maam ye. Efrayiim nebã, yãmb yoome, la Israyɛll nebã rẽgma b mense.

⁴A Israyɛll nebã manesem kɩtame, tɩ b ka tõe n lebg n wa b Wẽnnaamã nengẽ ye, bala yoobã sɩɩg kẽ-b lame, b sẽn ka mi Wẽnnaamã yĩnga.

⁵Israyɛll nebã wuk-m-mengã kaooda b bʋʋdo. Israyɛll ne Efrayiim nebã kongr na n yɩɩ kug-lakdg b yĩnga, la Zʋʋda buudã me na n naag n lakame.

⁶Bãmb na n kẽnga Sẽn-Ka-Saab nengẽ ne b rũm-bɛd la b rũm-bãoonego, n tɩ bao bãmba, la b kõn tol n yãnd-b ye, bala, Sẽn-Ka-Saab zãaga b meng ne bãmba.

⁷Bãmb zãmba Sẽn-Ka-Saabo, bala, b roga tãmpĩ-bi, la moasã ki-paalgã na n dɩɩ bãmb ne b paoongã.

⁸Peeb-y baorg Gɩbeya, la y peeb baorg Rama! Kaas-y zabr kaasg Bɛt-Avɛn! Benzame nebã, gũus-y y poorẽ!

⁹Sɩbgrã daare, Efrayiim na n sãamame. Mam yeta Israyɛll nebã bũmb sẽn ka na n vaal ye.

¹⁰Zʋʋda nanambsã yaa wa neb sẽn sersd zĩis todse, la mam sũurã na n puuga ne bãmb wa ko-zoetem.

¹¹B namsda Efrayiim nebã, n mongd-b bʋʋm, bala, bãmb pʋgda sebgo.

¹²La mam na n yɩɩ wa mogd Efrayiim nebã yĩnga, la wa solenkẽeg Zʋʋda buudã yĩnga.

¹³Efrayiim nebã yãnda b bãagã, la Zʋʋda nebã yãnda b nod-kɛgengã. Efrayiim nebã kẽnga Asiiri, n tɩ tʋm neb Yarɛɛb rĩmã nengẽ, la rĩm-kãng ka na n tõog n maag y bãagã, wall a tɩp y nodrã ye.

¹⁴Bala, mam yaa wa gɩgemd Efrayiim nebã yĩnga, la wa gɩgem-poll Zʋʋda buudã yĩnga. Mam na n tɛɛ bãmb n gʋs la m looge, Mam na n yõka bãmb n tall n loog tɩ ned ka tõe n fãag bãmb ye.

¹⁵Maam a Sẽn-Ka-Saab na n loogame, la m na n lebg n wa m zĩigẽ wã, hal tɩ b sak n deeg tɩ b kongame, n bao maam. Bãmb yel-pakrã pʋga, b na n baoo maam ne b sũyã fãa.