Read SEBR SÕNGO, 1998 A Ooze 7 Bible Online

A Ooze 7 - SEBR SÕNGO, 1998 bible

A Ooze 7

¹Wakat ning mam sẽn wat n dat n maag Israyɛll nebã, la Efrayiim nebã kongrã ne Samaari nebã tʋʋm-wẽnsã pukda. Bala, bãmb yaa zirẽ-be-nebã. Wagda kaooda rot n kẽedẽ, tɩ fãadb pid yɩnga.

²Bãmb ka tol n tagsd tɩ mam ket n tẽra tʋʋm-wẽns nins fãa b sẽn maandã ye. Moasã, bãmb tʋʋmã gũbg-b lame n be mam taoore.

³Bãmb maanda tʋʋm-wẽns n noogd rĩmã sũuri, la b belgd nanambsã ne b zĩrẽ wã.

⁴Bãmb fãa yaa yoaadba. Bãmb wẽnda wa wʋng bur-wẽed sẽn wɩnge, t'a sã n nag zomã n sɛ, a basdame n ka leb n tusd bugmã, hal tɩ zom-nagdgã wuki.

⁵Tõnd dĩmã tigr daare, nanambsã yũu divẽ tɩ b nens yilme, la rĩmã rɩka a meng n kõ nin-yaalse.

⁶Bãmb sũyã pida ne zãmbo, wa wʋng sẽn pid ne bugum. Yʋngã tõre, a maagdame, la yibeoogo, a widgdame n yãnge.

⁷Bãmb fãa wɩnga wa wʋnga. Bãmb kʋʋda b nanambsã, bãmb dĩm-dãmbã fãa lʋɩtame, la bãmb ned ba a yembr ka boond maam ye.

⁸Efrayiim nebã naaga bu-zẽmsã. Efrayiim lebga wa bur-maas sẽn ka lebge.

⁹Sãambã sɛta b pãnga tɩ b ka miẽ ye. Kʋʋlem yõk-b lame tɩ b ka miẽ ye.

¹⁰Israyɛll nebã tɩtaamã kaooda b bʋʋdo, bãmb ka wa lebg n wa Sẽn-Ka-Saab sẽn yaa b Wẽnnaamã nengẽ ye. La ne rẽ fãa, bãmb ka baood Sẽn-Ka-Saab ye.

¹¹Efrayiim nebã lebga wa manwall sẽn ka yam ye. Bãmb kota Ezɩpt nebã tɩ b wa sõng-ba Bãmb kẽnga Asiiri.

¹²La bãmb sẽn dabd Asiiri wã wakate, mam tẽega m gãmbre n kɩt tɩ b lʋɩ be wa yĩngr liuuli. Mam sɩbg-b-la wa sẽn zems m sẽn dag n keoog-b b nebã sʋkã.

¹³Efrayiim nebã na n paama toogo! Bala, bãmb zoe n zãaga ne maam! Mam yaool n da rat n fãag-b lame! Bãmb yaga maam zĩrẽ.

¹⁴Bãmb ka kelemd n boond maam ne sɩd ye. Bãmb bee b gãagẽ n wiisdẽ Bãmb wãada b mense, n tẽed tɩ b na n paama bõn-koaadl ne divẽ, la b zãagda b mens ne maam.

¹⁵Mam zãmsa bãmba la m kõ-b pãnga, la bãmb segend n dat n maana maam wẽnga.

¹⁶Bãmb ka leb n baood mam zĩig ye. Bãmb yaa wa tãp sẽn golme. Bãmb nanambsã na n paa tãpẽ, b tɩtaam-goamã yĩnga, la b na n yaala bãmb Ezɩpt tẽngã.